خواطر وأخبار نهاد رجب

“اللهم انا لا نقوى على عذابك ولا نقوى على عظمة رحمتك .. ” من يومين كنت مستني ال… | نهاد رجب


“اللهم انا لا نقوى على عذابك ولا نقوى على عظمة رحمتك .. ”

من يومين كنت مستني الاسانسير ، خدت بالي ان فيه حد من الجيران جاي علشان يطلع هو كمان ، كان راجل في الستينات من عمره تقريبا ، شعره شويه ابيض ، ومبتسم ، دخل الاسانسير وسالني طالع الدور الكام ؟ قولتله الرابع . وهو كمان كان طالع الرابع .

لاقيته بيسألني
– بنقول ايه لما بنركب الاسانسير ؟
اترددت لحظه وقولتله “سبحان الذي سخر لنا هذا”
– الله اكبر برافو عليك
– وماكنا له مقرنين ..
– برافو برافو .. وإنا الى ربنا ..
– لمنقلبون
– الله الله عليك برافو عليك

حسيت وانا برد عليه اني طفل صغير وكنت مبسوط والله اني بجاوب صح . لاقيت الراجل قعد يدعيلي ، وقالي “ربنا يبارك فيك ويحميك ويطمنك…” وانا مكنتش عارف ارد غير ب “الله يخليك ، الله يسلمك ، شكرا ليك”

المهم الاسانسير وصل فتح الباب وبصلي وقالي “يبني احنا كلنا ضيوف عليها وكلنا ماشيين منها احنا عايشين برحمته ”

وقفت مكاني للحظة ومردتش بس ابتسمت ومشيت .

كلامه كان ليه وقع عجيب على وداني ، كلنا ضيوف وكلنا ماشيين منها .. احنا عايشين برحمته ..

حكيت الموضوع وانتهى الامر وكملت يومي ، وتاني يوم كنت راكب العربيه وبدات ادعي “اللهم انا لا نقوى على عذابك ولا نقوى على عظمة رحمتك” ، الرفيقة كانت جمبي فسألتني يعني ايه .. انا في اللحظة ديه استغربت من اللي قولته .. وبدات اجمع افكاري .. يعني ايه اللي انا قولته صحيح ! ايه الدعوة العجيبة ديه .. بس لما فكرت في كل حاجه حصلت في حياتي ، كل حاجه غلط عملتها وكان ربنا بيرحمني كل لحظه حياتي كانت هتتبدل للأسوأ وربنا بيسندني ، كل مرة دعيته فيها وانا على معصية واستجاب ، كل مرة عصيته وعصيته وعصيته وكان بيرحمني ويرحمني ويرحمني ، حسيت بوجع والله

وجع عامل زي ان حد يكون بيحبك اوي وانت تإذيه فيحبك وتإذيه ويحبك وتإذيه وفجأه تكتشف اد ايه هو كان جميل اوي معاك وانت اللي كنت وحش ، فيوجعك قلبك ولما تلاقيه لسه بيحبك قلبك يوجعك اكتر لانك مش قادر تنسى انت اد ايه كنت وحش معاه ولا حتى قادر تبطل تإذيه .

اما مع الله فانت بتعصيه ، وربنا كتب على نفسه الرحمة ، فتعصيه ويرحمك ويرضيك ، وتعصيه فيحميك وانت بتعصيه ويرحمك ويطمنك وترجعله وتبعد تاني فيسخر الكون علشانك لحد ما ترجع تاني . هو بيحبك .. ولما بفكر اد ايه انا كنت وحش ولسه ومستمر ، قلبي بيوجعني. لما بفكر في عظمة رحمته ومعصيتي وقوته وضعفي .. بتعب جدا .

يارب انت جميل اوي ، كانت بتيجي عليا لحظات ربنا بيرضيني فيها لدرجة اني والله العظيم ما بلاقي دعوة زيادة ادعيها ، من كتر الاغراق بعطاياه كنت بقوله “اللهم اني اشهدك واشهد جميع خلقك انني دعوتك فاستجبت .. اللهم اني اشهدك علي لتكون هذه الدعوه حجه علي يوم القيامة”

انا معرفش انت مين او فين او عملت ايه في حياتك .. بس انت مسنود .. واللي ساندك مش هيسيبك ، هيطمنك وهيبقى معاك لما تكون فاكر انك بقيت لوحدك .. هو اقرب اليك من نفسك ، كل زفير وشهيق بيخرج وبيدخل جوا جسمك بأمر منه . احمده واشكره وحبه .. لانك لما هتفكر وتفتكر كام مرة رحمك هتعيط زي العيال .

يبني احنا كلنا ضيوف عليها وكلنا ماشيين منها احنا عايشين برحمته

وجمعتكم مباركة


Source

مقالات مرتبطة

غدا ان شاء الله (الخميس 2 مارس 2017) بداية كورس &#...
views 157
غدا ان شاء الله (الخميس 2 مارس 2017) بداية كورس "ممارس التنويم الإيحائي" ولمدة 3 أسابيع بمعدل 3 أيام اسبوعيا .. والحمد لله أفخر انه يكون أعلى كورس خ...
اغلب عربيّات الاوبر هنا في اسكندرية واخدين تقييم س...
views 13
اغلب عربيّات الاوبر هنا في اسكندرية واخدين تقييم سيّء جدا ، مع اني اتعاملت معاهم ولاقيتهم ناس ظريفه جدا ولو موجودين في القاهرة كنت هديلهم تقييم أفضل ...
Entrepreneurship ideas for young and ambitious peo...
views 286
Twee meditation meh readymade Intelligentsia vinyl. Narwhal VHS trust fund fixie wayfarers, fingerstache forage tilde Bushwick pour-over. Hashtag Bank...
مش جايلي نوم وأرق بس من جوايا مبسوط علشان الحالة د...
views 71
مش جايلي نوم وأرق بس من جوايا مبسوط علشان الحالة دي بسبب شغف عندي مش مخليني عايز انام ، اقدر أغمض عيني وأنام بس هتبقى خيانة وعندي طاقه أقوم اكمل بس خ...
اليوم محاضره دكتور عمر عبدالكافي في باريس. تابع...
views 203
اليوم محاضره دكتور عمر عبدالكافي في باريس. تابعوني على السناب شات لحظة بلحظه nihadragab Source...
دعواتكم لدفعة ممارسي التنويم الإيحائي الجدد .. بقا...
views 16
دعواتكم لدفعة ممارسي التنويم الإيحائي الجدد .. بقالهم يومين شايفين الوش التاني للتنويم الإيحائي . وش غريب ، وصعب .. بتشوفه لأول مرة لما تسمح لكل المشا...
كوزمك أكاديمي سنتر ومركز البدر للتدريب ومركز الذبذ...
views 463
كوزمك أكاديمي سنتر ومركز البدر للتدريب ومركز الذبذبات الكونية يقدمون أقوى دورات علوم التنميه البشرية والذاتية البرنامج الذي غير حياه ملايين الاشخاص ...
الصدفة في حياتي لـ نهاد رجب
views 4950
الصدفة في حياتي reflecting on my life اكتشفت ان الصدفة ليها وجود عجيب لو مهتم اعرفها لو مش مهتم تقدر تقراها وكإنك مش مهتم وكده انا عندي 29 سن...
احضن على اد ما تقدر من الناس كل يوم ، متعرفش كام و...
views 176
احضن على اد ما تقدر من الناس كل يوم ، متعرفش كام واحد من الجنة هتحضنه النهاردة وممكن ياخدك معاه Source...