خواطر وأخبار نهاد رجب

من كام شهر كنت في حمام السباحة وصديق ليا قالي “متخافش سيب نفسك والمية هترفعك” … | نهاد رجب


من كام شهر كنت في حمام السباحة وصديق ليا قالي “متخافش سيب نفسك والمية هترفعك”

كنت كل ما بحاول اطبق المعلومه اللي بيقولها وكانها شيء مفهوم جدا ومنطقي جدا ، كنت بنزل والمية مش بترفعني ولا حاجه .. كان دايما بيقول كلام من نوعيه “متنشفش ضهرك ، سيب نفسك ، المية هترفعك ، انت عجيب اوي ..

كان بيقولها بنبره صوت واثقه جدا وكنت بحاول اصدقه بس المية مكنتش بترفعني وكنت بنزل .. لحد ما بعدها بعده محاولات على مدار شهور ، سبت نفسي والميه رفعتني فعلا ..

العجيب اني معملتش حاجه مختلفه عن اللي كنت بعمله في البدايه ، وكإن المية هي اللي اسلوبها اتغير معايا لوحدها 😀

بس الاثاره مش هنا .. الاثاره اني روحت حمام سباحة مع قريب ليا وحاولت اعلمه بنفس الطريقه “سيب نفسك والمية هترفعك” كنت بقولها بطبيعيه وتلقائية جدا .. بنبرة صوت “مالك يبني ديه سهله جدا ، انت بس سيب نفسك” ومش فاهم هو ليه مش بيسيب نفسه . ده الموضوع بسيط جدا !

نفس الموضوع حصل قبل كده مع بدايه تعلمي للسواقه .. اللي كان بيعلمني السواقه كان بيقولي “دوس دبرياج وسنة بنزين” ويتك اوي على سنة بنزين ، وانا مش فاهم تماما يعني ايه وازاي سنه بنزين ، وكنت كل مرة بدوس جامد وهو بيكرر نفس الجملة “سنة بنزين” ، “سنة فرامل” .. لحد ما قررت اكمل لوحدي وهوب فجأه بقيت ادوس سنه بنزين عادي جدا وسنه فرامل ! وجيت اعلم مراتي تسوق لاقيت نفسي بقوله “سنة بنزين سنة بنزين” وكإنها برضه حاجه بسيطة جدا وطبيعيه وهبله واي حد يقدر يعملها بسهوله !

عندنا طريقه تفكير عجيبة بس لما هتعرفها هتفهم ايه سر ضعف التواصل بينك وبين الناس .. لما حد يتعلم حاجه ويبقى مهاري فيها ، بينسى مراحل تعلمه وبيفتكر ان الموضوع بسيط وسهل و”اهبل واي حد يقدر يعمله” ، حاجه عامله زي انك تكون جعان جدا ، واخيرا ييجي الاكل وتبدا تاكل كتير جدا وتملى بطنك .. وتشبع ، لدرجة انك ممكن تشوف حد تاني بياكل قدامك تضايق وتقول “هو بياكل كتير كدا ليه!”

او تخيل انك عطشان جدا وموجود لوحدك في الصحرا ، وحد عرض عليك ازازه مية بس هياخد منك مليون جنيه .. انت على شفا الموت واكيد هتوافق ، وتاخد منه الازازه وتشرب وكل ما تشرب كل ماتبدا تفكر “مليون جنيه ايه هما نص مليون بس” تشرب تاني وتفكر “نص مليون ايه العبط ده هما 100 الف بس” تشرب تالت وتقول “100 الف عفريت ، ديه متساويش اتنين جنيه”

احنا بننسى وبنتعامل مع الاخرين من مجال اننا بنطالبهم يكملوا على اللي احنا وصلناله ، وبنكتشف انهم مش عارفين ، فبنعتقد انهم اما اغبيا او مش مهتمين او مش مركزين ، بس اخر حاجه بنفكر فيها هو اننا نفهم انهم بيمروا بنفس مراحل التعلم اللي احنا مرينا بيها . بنقعد ندعي ربنا ونندر ولما بنحصل على اللي احنا عايزينه بننسى كل اوقات الازمات وبنفتكر اننا هنعيش طول العمر في رخاء ولو حصل اي ازمه بنرجع تاني للبؤس وبرضه بننسى النعيم اللي كنا فيه .

الخلاصه :

انت مش بائس ، انت مش ضعيف ، انت مش جبان او مكتئب .. انت بس في اللحظه ديه بائس او ضعيف او جبان او مكتئب بس انت حياتك مليانه لحظات اكتر هتقعد تتقلب ما بينها طلوع ونزول لحد ما تموت

انت مش الناس ، لما تبدا تطلب من الشخص حاجه يعملها ، علمه واحدة واحدة ، افهم انك كنت زيه في يوم من الايام ، من حقه انه يغلط ، او ينسى او ميفهمش ، من حقه لان ديه مراحل التعلم الطبيعيه لاي انسان .

بتتعلم حاجه جديده ؟ استمر مهما غلطت ، مهما المية شدتك لتحت ، في اليوم اللي هتحط في دماغك ان العوم ده شيء طبيعي هتنزل وتطلع وفي النهايه المية هتسمع كلامك وهترفعك .

فكر نفسك بلحظات النعيم وفكر نفسك بنفس القدر بلحظات الحزن بشرط انك لا تفرح فتنسى الألم وتقع فيه تاني ولا تزعل فتنسى النعيم وتكفر .


Source

مقالات مرتبطة

كل حاجة اخترعها الانسان بتوضح قدراته الحقيقية ومفه...
views 149
كل حاجة اخترعها الانسان بتوضح قدراته الحقيقية ومفهومه عن نفسه .. كل حاجة موجودة في حقيقتها وسيلة لتوضيح المفهوم ده لولا قدرة الانسان على التخاطر م...
اللهم إني أسألك بكل إسم سميت به نفسك أو أنزلته في ...
views 836
اللهم إني أسألك بكل إسم سميت به نفسك أو أنزلته في كتابك أن تغفر لنا ذنوبنا وتطمئن قلوبنا اللهم انك أنت الرزاق لا رزاق غيرك ، لا تبديل لكلماتك وخلقتنا...
انت تقدر تحقق أحلامك . انت اتخلقت علشان تنجح . غير...
views 539
انت تقدر تحقق أحلامك . انت اتخلقت علشان تنجح . غير مرحب بيك كفاشل ، تم اختيارك في البداية للتعمير ومبرراتك غير مقبولة . خليك مرن كفاية والعب لعبة مع...
مجرد سؤال تخيلي … مش محتاج تقتنع او لا .. ...
views 471
مجرد سؤال تخيلي ... مش محتاج تقتنع او لا .. لو حصل انك اكتشفت ان حياتك بالكامل نتاج سلوكك انت واعتقاداتك الشخصية وإدراكك بنسبة 100% بدون أي تدخلات م...
ماذا ؟ تحقيق هدفك متى ؟ الآن ! كيف ؟ بأي طريقة ...
views 285
ماذا ؟ تحقيق هدفك متى ؟ الآن ! كيف ؟ بأي طريقة أين ؟ هنا وفي كل مكان والظروف ؟ فكر في حلول اخرى والمشاكل ؟ حلها والأخطاء ؟ صلحها والناس ؟ لا تهت...
الى الإمارات ، دبي مبسوط واشتقت جدا للجميلة دبي ...
views 64
الى الإمارات ، دبي مبسوط واشتقت جدا للجميلة دبي ، اشوفكم على خير في كورس خاص ومجموعه جلسات بفندق سوفيتيل داونتاون دبي للتواصل معي يرجى إرسال رسالة...
راجع للقاهرة ان شاء الملك خلال ساعات وتجهيز للسفر ...
views 122
راجع للقاهرة ان شاء الملك خلال ساعات وتجهيز للسفر الى الولايات المتحدة الامريكية لحضور كورس تدريبي خاص بالأكاديمية الأمريكية للتنويم الإيحائي بألباكير...
– انا خايف اخد خطوة افشل – وانت دلوقت...
views 158
- انا خايف اخد خطوة افشل - وانت دلوقتي ناجح ولا فاشل ؟ Source
من ضمن الاسئلة اللي بتخلي عقلي يتجمد عن التفكير لم...
views 28
من ضمن الاسئلة اللي بتخلي عقلي يتجمد عن التفكير لما حد يسألني "هو انت هتخلص اللي في ايدك امتى ؟" 😀 انا اكتشفت بعد سنين من المحاولات من اني الاقي طر...
لو هتركز على هدفك واللي انت عايزه ، أبدا في الاول ...
views 123
لو هتركز على هدفك واللي انت عايزه ، أبدا في الاول بالتفكير في اللي انت مش عايزه التوازن في التفكير في الهدف مطلوب ، مينفعش تاخد خطوه الا لما تعرف "ب...