خواطر وأخبار نهاد رجب

من صغري كنت بحب اقلد الناس .. كنت بحب اشوف الناس اللي بتعمل حاجات مفيده او عجيبه… | نهاد رجب


من صغري كنت بحب اقلد الناس .. كنت بحب اشوف الناس اللي بتعمل حاجات مفيده او عجيبه بالنسبه لي واقلدهم ..

التقليد فطرة اتولدت معانا .. من اول ما بنتولد واحنا في عمليه غير منتهيه من التقليد .. يعني مثلا في تعلمنا للغه محدش فينا فتح كتاب وقرا فيه وحفظ كلمات علشان يقولها قدام الناس او يستخدمها في التواصل ..

قدرتنا على التقليد هي السبب الوحيد اللي خلانا نتكلم دلوقتي بالشكل الحالي . حتى في القرايه عقلنا بيلقط كلمات وبيبدا يضيفها لمخزون كلماتنا من غير اي تدخل واعي من خلالنا .

كتير لما بفكر في القدرة الذاتيه التلقائيه ديه ، بحس ان كل واحد فينا مخلوق بقدرات خارقه .. اهمها القدرة على التقليد ..

بدانا نقلد الاصوات بكلام غير مفهوم ، مجرد تحريك للشفايف ، شويه شويه بدانا نتلاعب بالصوت علشان نخرج اول كلمه .. الناس بدات تدينا احساس بنجاحنا فبدانا نكرر المهاره العجيبه ديه لحد ما اتكلمنا زيهم ..

لكن الموضوع مبيقفش لحد الكلام .. كنت بشوف مسلسل الباور رينجرز ، ويخلص المسلسل ، واقوم اتنطط واضرب الحيطه واحاول اقلدهم ، كنت بحاول اقلد اكتر حد واثق في نفسه في المدرسه ، عن طريق اني احاول اتكلم زيه او اتحرك زيه .. كنت حتى بحاول اقلد افكار الناس ، او مصطلحاتهم .. احساس الاحتياج الشديد اني انسخ شخصيه واطبقها عليا كان ملازمني وملازمك انت كمان بالمناسبه .

لحد ما كبرت شويه وركزت جدا على المهاره ديه وبقيت اخد خطواتي اوسع . ولما بدات اراقب نفسي اكتشفت ان تقليدي للناس مكنش على مستوى الكم (هما بيقولوا ايه) بس لاقيت نفسي بركز على (هما بيقولوا كده ازاي) او (هما بيتصرفوا كده ازاي)

تدرس البرمجه اللغويه العصبيه وتفهم النمذجه وتكتشف ان ده قريب جدا من اللي كنا بنعمله بالفطره .. تكتشف مثلا ان اتباع سنه انسان وتصرفاته ولبسه وشكله بيخليك توصل اسرع لفهم ايديلوجياته او معتقداته .

فكرة اننا ننفصل عن الاخرين ونقول اننا نقدر نكمل حياتنا من غير مانمشي على اثار خطوات حد تاني ، فكره عجيبه وخاطئة تماما من وجهه نظري .. فكرة اننا نبدأ من البدايه مستحيله .. محدش يقدر يبدأ على بياض . ويمكن ده اللي يأكدلنا ان سيدنا ادم هو البدايه ، وحتى لما اتخلق ربنا علمه “الاسماء كلها” ومن سيدنا ادم لحد اللحظه ديه احنا لسه لحد دلوقتي جوا جيناتنا مزروع برامج في التفكير والتصرف ليها علاقه بيه وبناس عاشوا من آلاف السنين .

فيه ابحاث تثبت اننا لحد دلوقتي بنتصرف زي راجل الكهف !
فيه ابحاث تثبت ان افكارنا هي عباره عن عمليه نسخ كبرى لناس تانيه

وفي القرآن ربنا عز وجل دايما بيتكلم عن ان الكفار ضلوا باتباعهم آبائهم والاولون .. مش مجرد الاباء فقط ولا حدد الاولون دول كام حقبة زمنيه ووجود الانبياء كان من وجهة نظري لارجاع الناس لتقليد الناس اللي على الطريق السليم .

حتى في التنويم الإيحائي دكتور ابراهيم الفقي كان اول مدرب يقولنا ان نقلد الصوت والاداء ، وشويه شويه هتكتشف ان بتقليدك ده انت بتتصل مع وعي اعلى بيربطك فكريا وشعوريا حتى بنفس الشخص اللي انت بتقلده وكإنك بتفكر بدماغه وبتتصرف بنفس طريقته .

محاولات الانفصال عن السنه والالتزام بتعاليم الكتاب – القرآن الكريم – عبث ، كل نبي او رسول كان جاي علشان الناس تقلد خطواته وتتبعه للوصول لله على طريقه .

ولإن طبيعي جدا انك من وقت للتاني تتوه عن الطريق ولإن عقلك مجهز انه يتبع القطيع هتلاقي نفسك بتروح لأقرب جماعه تمشي وراهم لاننا بنحب التقليد بالفطرة وايما بندور على آثار اقدام ..

وطالما ده شئ موجود في نظامنا العقلي (الافكار) والجسدي (الجينات) ، يبقى لازم نختار ناس نمشي وراهم ، بشجعكم على تقليدهم ، تقليد حركاتهم او انفعالاتهم او افكارهم او تصرفاتهم او حتى نبره صوتهم . بشجعكم لده لانه في النهايه كل مره هتقرا فيها سورة الفاتحه هتلاقي نفسك بتدعي بتقول “اهدنا الصراط المستقيم” ولو فكرت في اي صراط هتكتشف ان فيه اولون وسابقون وهتتبعهم للوصول.

نهاد رجب


Source

مقالات مرتبطة

التخلص من الاحبال والمعوقات بالتحرر...
views 3978
  ربنا عز وجل بيديلك ثقتك بنفسك ، بيفهمك انك تقدر تفكر ، تقدر تعرف بنفسك ، تقدر تبص حواليك وتستنتج ، لانه مخلقكش عالة على حد ، خلقك من روحه ، مت...
الحمد لله انتهيت من كورس ممارس التنويم الذاتي (مود...
views 21
الحمد لله انتهيت من كورس ممارس التنويم الذاتي (موديل 1) في الاسكندرية وبستعد علشان خلال ساعات هبدا كورس ممارس التنويم الذاتي (موديل 1) دفعة القاهرة . ...
التنويم الإيحائي هو حالة خاصة من الانسجام العقلي م...
views 48
التنويم الإيحائي هو حالة خاصة من الانسجام العقلي مع العناصر المحيطة من الاصوات او الصور او المشاعر .. وفيها يتقبل العقل كل الاقتراحات المطلوبة والمقدم...
علشان تحافظ على اسطورتك قصاد كل خطوة ياخدها منافس...
views 79
علشان تحافظ على اسطورتك قصاد كل خطوة ياخدها منافس خد ١٠٠٠ خطوة وقصاد كل ميل خد الف ميل وأول ما تعرف انك سبقت خد تاني الف ميل وأول ما تحس انك عايز...
الراجل ده يعتبر اسطوره من اساطير التنويم الايحائي ...
views 432
الراجل ده يعتبر اسطوره من اساطير التنويم الايحائي في العالم ٫ قعد حوالي 60 سنه بيمارس ويدرب التنويم الايحائي واغلب بروتوكلات التنويم الإيحائي تعتمد عل...
مين زرع في دماغ الناس ان الغني لازم يكون مبتلى او ...
views 61
مين زرع في دماغ الناس ان الغني لازم يكون مبتلى او هيموت على حاجة في أيد الفقير ؟ وان ربنا مبيديش كل حاجة ؟ وأنك لما تدعي ربنا بحاجات تتصيب في حاجات وه...
Tips for taking great city photos with your smartp...
views 264
Fingerstache YOLO cred single-origin coffee Shoreditch. Flannel Shoreditch try-hard, mlkshk forage Godard jean shorts quinoa church-key bitters actual...
حتى العلم مسخر لنا وبنحصل عليه بشرط انك تنوي استخد...
views 1276
حتى العلم مسخر لنا وبنحصل عليه بشرط انك تنوي استخدامه Source
جزء من اكتشافي لمعتقداتي الداخليه اللي بتحركني وبد...
views 65
جزء من اكتشافي لمعتقداتي الداخليه اللي بتحركني وبدايه لتبني مفاهيم اللايف كوتشنج في شغلي واللي علمتني اني اولا لازم افهم نفسي قبل ما احاول افهم الاخري...
بتيجي عالواحد لحظات بيبقى عايز ينزل الشارع يكلم ال...
views 73
بتيجي عالواحد لحظات بيبقى عايز ينزل الشارع يكلم الناس عن ربنا ويحكيلهم عن معجزاته زي الطفل اللي بيروح يقول لصحابه ان باباه جابله اتاري وهو عايز الناس ...

1 Comment