خواطر وأخبار نهاد رجب

الناس حواس مختلفة … اختار الناس اللى هتكون عنيك واللى هتخليك تسمع وتحس لما حوا… | نهاد رجب


الناس حواس مختلفة … اختار الناس اللى هتكون عنيك واللى هتخليك تسمع وتحس لما حواسك تفقد القدرة على العمل

من كام شهر كنت في باريس ، فرنسا ، وقعدنا ايام في فندق قريب من ميدان الاوبرا ، في وسط البلد ، كانت غادة معايا ، كالعادة كان عندي كورس تدريبي في إيفري ، ضاحية من ضواحي باريس وطولت 5 ايام قعدناها في باريس .

طبيعتي واللي محدش مصدقها لحد دلوقتي اني من وسط كل الاماكن اللى روحتها لو سألتني شوفت ايه في الدولة الفلانية .. هسكت كده وهقولك مش فاكر .. الناس مش فاهمة يعني ايه مش فاكر ! بس الحقيقة اني بدخل الفندق ، بقعد ، معنديش ادنى اهتمام اني اخرج لأي سبب ، وبنزل الصبح ادرب واشوف شغلي وارجع على الفندق في هدوء ، حتى التلفزيون مكنتش بفتحه .

بس المرة ديه كان الموضوع مختلف ، المرة ديه كان معايا عيني ، غادة .. وعيني هنا مش كلمة رومانسية اد ما هي كلمة عملية فعلا ، يعني مثلا امشي في شارع طويل الاقي غادة كل شوية تخبطني وتقولي نهاد شايف التمثال ده ! ابص في اتجاهه اشوفه ، شايف الكنيسة ديه ! ابص اشوفها ! شايف الورد ده .. اشوفه .. العجيب اني مكنتش باخد بالي من الحاجات ديه كلها وكان المكان بالنسبة لي مجرد شارع .

حرفيا كان قدامنا في الفندق اجمل تمثال ممكن تشوفه في حياتك معلق على سطح مبنى ، كل يوم كنت بدخل البلكونة الصبح ومشوفتوش غير لما هي شاورتلي عليه وقالتلي شايف التمثال ده ! استغربت جدا اني ازاي مكنتش شايفه طول الوقت ده .

اكتشفت اني عندي عين مثلا بس مكنتش بشوف بيها زي ما كنت متخيل ، ووجودها معايا خلاني اشوف حاجات عمري ما كنت هاخد بالي منها ، وده اللى اثرى تجربتنا هناك ، اني شوفت اللى كنت معمي عنه وادراكي مكنش بيسمحلي اني اشوفه .

ابويا اللى يرحمه ، كان بيمارس نفس السحر ، كان بيحب مثلا ام كلثوم جدا ، بالنسبة لي ام كلثوم كانت مجرد اغنية ، بس الراجل ده كان عنده قدرة انه يقولك الكلمات بتاعة الاغنية (أللى انت اصلا سمعتها) بطريقة تخليك تحس ان الكلمات فيها معاني انت مكونتش متخيل انها موجودة وفجأة تلاقي نفسك بتحبها اوي لما فهمتها ..

السحر هنا في فكرة انك تسمع حاجة ومتاخدش بالك منها وييجي حد يوضحهالك فتسمعها تاني وكإنك أول مرة تسمعها ! والسحر هنا انك تشوف حاجة وتكتشف انك كنت اعمى ولا شايف حاجة لما حد تاني عنده سحر الرؤية ويخليك تشوفها بطريقة تانية مختلفة ..

امي من وانا طفل كانت الساحرة الكبرى بالنسبة لي ، كان عندها سحر الاحساس ، عندها القدرة انها تخليني احس بمشاعر مختلفة من تجربة معينة او تجاه ناس معينيين انا مكنتش حاسسها ، تخليني اشوف حد وأحس تجاه بطريقة معينة ، ولما تكلمني عن المشاعر الحقيقية اكتشف اني غيرت احساسي ناحيته وكإنها عندها القدرة انها تدخل اوي جوا عمق الانسان وتفهم مشاعره بطريقة غير عادية وساحرة ..

الشاهد هنا انك حتى لو عينك 6 على 6 ، حتى لو بتسمع صوت النملة ، حتى لو بتحس بأقل ألم ، فيه حوالينا سحرة من نوع خاص ، ابيض وجميل ، يقدروا يغيروا حياتك بالكامل للأجمل ، دور عليهم وإتأكد انك تشوف بعنيهم وتسمع بطريقتهم وتحس بمشاعرهم .

حياتك هتتقلب جنة . وهتكتشف ان فيه خدعة في الدنيا ديه ، وكإنها سيمفونية ، إدراكك ليها هيغيرها لمعزوفة خاصة لبيتهوفين . بس انت سيب نفسك .

يومك أجمل من يومي
نهاد رجب


Source

مقالات مرتبطة

جلسة التخلص من الألام والألم الشديد بالتنويم الايح...
views 255
جلسة التخلص من الألام والألم الشديد بالتنويم الايحائي وراحه كبيرة مع نهاد رجب انضم للصفحة وادعوا اصدقائك للاستفادة. الصفحة الرسمية للمدرب والمعالج نها...
Test
views 236
Test Sent from my iPhone
بقالي يومين شغال على اهم مشروع هعمله في حياتي .. ت...
views 72
بقالي يومين شغال على اهم مشروع هعمله في حياتي .. تأجيلات لحاجات كتير تانيه .. مشغول جدا .. مبسوط جدا .. مبنامش جدا .. بنجز كتير جدا ولله الحمد . So...
البدء في المشروع الأول في الوطن العربي لتعريب التن...
views 273
البدء في المشروع الأول في الوطن العربي لتعريب التنويم بالإيحاء على الانترنت الحمد لله بدأت مشروعي الخاص وقريب جدا كل المحتوى العربي للتنويم الإيحائي...
التغلب على التسويف والمماطلة … إدخل هنا تأتي...
views 250
التغلب على التسويف والمماطلة ... إدخل هنا تأتي إليكم من الموقع الرسمي نهاد رجب http://www.nihadragab.com/2015/11/22/%D8%A7%D9%84%D8%AA%D8%BA%D9%84%D8%...
سعدت جدا لتقديم محاضرة طويلة حبة عن التنويم الايحا...
views 104
سعدت جدا لتقديم محاضرة طويلة حبة عن التنويم الايحائي وتعريفه وتظبيط المعتقدات والمفاهيم الخاصة به عند حبة حلوين نوروني بحضورهم شاكرين مهللين بشدة وب...
– يعني ايه تنويم ايحائي ؟ – يعني تغيي...
views 256
- يعني ايه تنويم ايحائي ؟ - يعني تغيير برمجتك وملفاتك العقليه فتفتح عينك وتتغير اسقاطاتك على العالم وتشوفه بشكل مختلف - بس احنا مش عايزين ننام ! احن...
بتعرف تقرا ؟ كورس ممارس التنويم الإيحائي دفعه اغ...
views 71
بتعرف تقرا ؟ كورس ممارس التنويم الإيحائي دفعه اغسطس 2017 مستعد تكون ضمن افضل ممارسي التنويم الإيحائي والكوتشز في مصر ؟ مستعد تاخد خطوة حقيقيه وث...
مفيش حاجه اسمها حرية مالية الفكرة ديه تقريبا مستح...
views 19
مفيش حاجه اسمها حرية مالية الفكرة ديه تقريبا مستحيل تحقيقها وكإن الكون بيتدخل علشان يمنعك إما انه يزود طلباتك او انه يخلقلك مشاكل فتكتشف انك مضطر تس...