أسرار النجاح

تعلم لغة كاملة اثناء نومك ! التعلم نائما وطرق التأثير على العقل الباطن مع نهاد رجب

اهلا بيكم ، انا نهاد رجب

اهلا ومرحبا بيكم في حلقة جديدة من حلقاتي على اليوتيوب ، والنهاردة هكلمكم عن موضوع ممكن يكون غريب بس مؤخرا الابحاث الامريكية والسويسرية اثبتت صحته ، الا وهو التعلم خلال النوم !

هل ممكن فعلا نتعلم اثناء النوم ؟ هل ممكن تحل معضلة في حياتك خلال اعمق مراحل النوم ؟

الموضوع طلع بالسهولة ديه ، في خلال شغلي في جلسات التنويم بالايحاء ، كنت بتعامل مع الشخص وهو مسترخي وفي مرحلة قريبة من النوم وكنت منبهر دايما ازاي شخص ممكن يغمض عينه وينام ويفوق على شخصيه مختلفة او سلوك مختلف او يكتشف ان افكار قديمه كانت عنده تأثيرها العاطفي اختفى وكأنها لم تكن !

السر في ان الشخص في خلال النوم بيتضاعف بشكل او بآخر قوة العقل الباطن في استقبال الاقتراحات وتنفيذها ، وبتستمر قدرة الانسان على التعلم .

ويمكن تكون سمعت عن ابحاث فرنسية اثبتت ان الجنين في بطن والدته بيتعلم اللغة ، وبيسهل عليه تعلمها لما بيخرج للحياة ، لأ والاكتر من كده ان من المعلومات العامة ان الأم لو قرت قرآن باستمرار خلال فترة الحمل ، الجنين بعد كده في حياته بيكون اسرع في تعلم القرآن وحفظه !

والاغرب من كده ان كل طفل نبرة صوته في الصريخ والبكاء لما بيخرج للدنيا بتختلف من جنسيه للتانية ، يعني الفرنسي غير الايطالي غير المصري ! وده يدل على ان التعلم موجود في الاوقات اللى انت متخيل ان التعلم بيتوقف فيها .

وكمعالج تنويم بالايحاء ومن كل التجارب اللى عدت عليا بكتشف ان في حاله غياب الوعي ، تعلم الانسان بيزيد وبيتضاعف وده السبب ان الشخص لما بيكون في حالة نفسية ايجابية ومتفاعله بيتعلم اسرع ، وانت بتضحك بتتعلم اسرع ، وده لانك في حالة استيعاب مضاعفة بسبب ان الضحك بيقلل من تأثير الوعي وبيضاعف التفاعل اللاواعي.

يبقى الحل هنا هو انك تسمح لعقلك الباطن انه يتعلم ، والسبب لكده هو معادلة هكلمك عنها في خلال الفيديو ، الوعي بيستقبل من 5 ل 9 معلومات في الثانية الواحدة ، لكن اللاواعي بيستقبل مليارات المعلومات ، فاللى انت ساعه ممكن تتعلمه في جزء من الثانية لو سمحت لنفسك انك تستفيد من قدرات عقلك الباطن الحقيقية !

على سبيل المثال ، لو قولتلك مثلا ايه حاصل ضرب 5230 في 148 ؟ ممكن يكون المسألة بالنسبة لك صعبة ، بس هل هي فعلا كده ؟ المسألة صعبة بالنسبة لوعيك اللى هيستغرق وقت طويل جدا من غير ورقة وقلم علشان يحل المعضلة ، لكن بالنسبة للعقل الباطن واللى بتعادل قوته قوة ملايين من اعتى واذكى اجهزة الكمبيوتر في العالم ، فنتاج حاصل الضرب اتعرف قبل مانهي السؤال !

طيب لو عقلك الباطن قدر يعرف الاجابة بالسرعة ديه ، اللى بيخلينا ناخد وقت علشان نعرفها ؟

الاجابة هنا والسر في الوعي ، الوعي هو الاداة البطيئة لأسباب متعددة ، وانت بتعتمد عليها علشان توجدلك الحل ، لكن لو سمحت لنفسك انك تسترخي هتكتشف الحل في وقت اسرع بكتير من اللى انت ممكن تعرفه فيه بوعيك.

تخيل ده كإنك بتحاول تفتكر اسم واحد صاحبك قديم ، ومش قادر تفتكر اسمه وعمال تعافر علشان تفتكره وانت مش قادر ، وفجأة قررت لأي سبب انك متفكرش في اسمه وهوب في خلال جزء من الثانية جالك الاسم وناديت مرة واحدة وقولت “مصطفى”

الاسم كان موجود والاجابة كانت موجودة واللي بيوصلها هو اللى بيقدر يتواصل مع عقله الباطن .

وف دراسة لجامعه سويسرية حاول زيوريخ وفريبورج يعرفوا لو ان دراسة اللغة الهولندية بالنسبة للطلبة ممكن يكون اسهل لو سمعوا نفس الكلمات اللى اتعلموها خلال نومهم ، وكانت الاجابة بالنسبة لهم مبهرة !

الساعة 10 بالليل ، المجموعة المكونة من 60 طالب الماني اتعرفوا على كلمات مزدوجة علشان يتعلموها ، نص المجموعة نامت والنص التاني طلبوا منهم انهم يسهروا ويكملوا مذاكرة .

وخلال نوم المجموعة الاولى ، بدأ الباحثين يكرروا عليهم كلمات ذاكروها قبل النوم ، كرروها على مسامعهم خلال ماكانوا في نوم عميق .

والساعة 2 الصبح عملوا اختبار للمجموعة اللى نامت والمجموعة اللى فضلت سهرانة علشان يكتشفوا ان المجموعة اللى استمعت للكلمات اثناء النوم ، تميزوا ونجحوا بشكل تقريبا يوصل ل 100% والمجموعة اللى فضلت سهرانة نسبة النجاح فيها كانت متوسطة !

ولكن هنا بجورن راخ بيقول ان انت تقدر انك تتعلم الكلمات وتوصل للنتيجة فقط لو انت استمعت لكلمات انت كنت سامعها وانت صاحي . يعني انت اساسا سمعت الكلمات ديه قبل كده . واستماعك للكلمات خلال النوم بتيقظ جزء التعلم والادراك اللاواعي في المخ

وهنا نقدر نستخرج معادلة في منتهى القوة تقدر تخليك توصل للنتيجة ديه بمنتهى السهولة ..

المعادلة بتتكون من 3 خطوات

اولا ، الاسترخاء والحالة النفسية المناسبة .

اتاكد انك تكون مسترخي وفي حالة نفسية مناسبة اثناء عملية التعلم . الحالة النفسية المناسبة بتسرع وبتضاعف من عملية التعلم بشكل غير طبيعي . وانك تكون مسترخي فانت بتسمح لعقلك الباطن انه يستوعب المعلومات ديه وتقدر تسترجعها لو دخلت في نفس الحالة فيما بعد .

ثانيا ، متراجعش .. المراجعة طبعا حاجة مميزة جدا ، لكن متراجعش هنا معناها انك متحاولش تعمل مجهود في انك تفتكر او تتاكد انك مستوعب ، المجهود ده بيتعبك وبيضيع النتيجة الحقيقية ، الا وهي ان كل كلمة انت قريتها حتى لو مستوعبتهاش فعقلك الباطن بيستوعبها ، بسبب ان قدراته غير محدودة حتى لو قريت كتاب كامل في يوم . وبمعنى تاني خليك مؤمن ان كل معلومة انت قريتها سواء فهمتها او مفهتاش عقلك الباطن فهمها .

ثالثا نام .. بس قبل ماتنام هتاخد نفس عميق لمدة 3 مرات ، وتكرر جواك الجملة ديه “بطلب من عقلي الباطن انه يقوم بتعلم كل كلمة هسمعها خلال نومي” قولها وكررها واستغرق في النوم .

خلال النوم هتشغل مسجل او الكمبيوتر او الموبايل عليه الدرس اللى انت كنت بتستمع ليه ، ممكن كلمات من اللغة اللى انت عايز تتعلمها ، وحد بيقراها ، حد غريب او حتى انت شخصيا . وانا عن نفسي في خلال تعلمي للغة الانجليزية كنت بقرا الكلمات بصوت عالي وبسجلها ، الكلمة ومعناها باللغة العربية واستخدامها في جمل انجليزية ، وبعيد كل ده خلال نومي . وكانت للطريقة ديه تأثير السحر .

استنى الموضوع مبيقفش لحد هنا ، انت كمان تقدر تحل مشكلة مواجهاك بنفس الطريقة ! انت بس هتعمل تغيير بسيط .

انت طبعا عارف ان عقلك الباطن فيه كل الاجابات والحلول لكل المشاكل ، مجرد انك تقابل اي مشكلة في اي وقت ، كل اللى هتحتاج تعمله هو انك ببعد النوم هتعيد على نفسك تسجيل بتقول فيه لنفسك “بطلب من عقلي الباطن انه يوجدلي حلول في التحدي الخاص بالموضوع الفلاني” وخد بالك ان كلامك يكون ايجابي ميكونش فيه كلمة مشكلة او صعوبة او غلطات ، الخ .

اثناء النوم وده عن تجربة شخصية ، اما انك تكتشف انك بتبدأ تحلم بأحلام موفقة وتحس ان فيها رسايل تفسيرها هيفيدك في التحدى او بعد الاستيقاظ هتبدأ تلاحظ الحلول بتحاوطك بأمان تاني يوم .

الاسلوب ده مناسب في النوم الليلي مش خلال اليوم .

اتمنى ان الحلقة تكون عجبتك ، وهستنى انجازاتك ان شاء الله ، تقدر تشاركها مع كل معارفك وتشترك في القناة بتاعتي عن طريق الضغط على ذر Subscribe

كان معاك نهاد رجب

والسلام عليكم ورحمة الله وبركاته

 

مقالات مرتبطة

الإغواء – نهاد رجب
views 4766
  الإغواء هيا الكلمة الوحيدة اللي يفهمها كل الناس بنفس المعنى او بمعنى مشابه ، هيا الكلمة اللي الناس بتتفق على معناها مع طفل صغير بيصورها على ان...
انت السبب ، روشتة سريعة للنجاح...
views 2179
  بقيت لما تحصل مصيبه او كارثه في العالم بقول "ليه يانهاد عملت كده ، ليه كنت سبب في كده." ولما تحصل حاجه كويسه واسمع خبر حلو بحمد ربنا وبشكره وب...
في التأني الندامة وفي السرعة السلامة ! نهاد رجب...
views 1855
هل قرأت العنوان جيدا ؟ ان هذا صحيح حق ، وقد تكون هذه الجملة هي الادق على الاطلاق .    ولكن كيف ان التأني يأتي بالاخطاء والسرعة تأتي بالسلامة وت...
استمتع بحياتك بدون تركيز مع نهاد رجب...
views 2388
لإننا ساعات محتاجين نبطل تركيز علشان نقدر نفهم /ومحتاجين نبطل تفكير علشان نقدر نوصل للحلول ومحتاجين نبطل رغي علشان نقدر نتكلم ومحتاجين نبطل ضحك علش...
عن العنوسة اتحدث… للبنات فقط .. من راجل زي أ...
views 10492
  للبنات فقط .. من راجل زي أخوكي العنوسة مشكلة تواجه بنات كتير .. بس هل هي فعلا مشكلة ؟ خليني اقولك من واقع معاملتي لناس كتير ، ازاي ديه ممك...
حلول قرآنية للمؤمنين
views 2848
  لكل واحد بيقول ان الظروف هي السبب / (بَلِ الْأِنْسَانُ عَلَى نَفْسِهِ بَصِيرَةٌ وَلَوْ أَلْقَى مَعَاذِيرَهُ) لكل واحد شايف انه اقل من ال...
الدليل الى النجاح .. كن نفسك .. نهاد رجب...
views 1408
النجاح يختصر في كلمتين ، وهما انك تكون نفسك مش هتنجح باتباعك للقوانين ، دايما اللى بيخرج عن القاعدة هو اللى بيستمر وبيبدع مش هتنجح بنمطيتك وتحجرك م...
الثقة بالنفس وخطوات عملية لـ نهاد رجب...
views 10612
الثقة بالنفس تعتبر الحل لكل المشكلات التي يمكن أن تواجهها في حياتك ، فكر في أي مشكلة تواجهها ، تجد ان سببها غالبا ما يكون له علاقة بثقتك بنفسك ، فإذا ...
التخلص من قضم الأظافر والعادات السلبية – نها...
views 1963
  هل تريد التخلص من هذه العادة السلبية ؟ قد يبدوا الامر صعب للوهلة الاولى خصوصا ان كنت من هواه قضم الاظافر ولكن دعني اخبرك انني قد كنت اعاني م...
لعنه النجاح الطفولي .. نافس الطموح وليس الأنجح .. ...
views 5202
متنافسش الناجح ، نافس الطموح والمستمر ، الطموح هو اللى هيوصل في النهاية وهو اللى بيضحك اكتر ، الشغوف والطموح هو اللى مبيقفش وبيعدي ..   يمكن اتكلمت...

Leave a Comment