أسرار النجاح

قول أيوة

عارف لما يكون فيه حد غلس عمال يتصل بيك ؟ لا ومش غلس وبس ، ده بيقعد يرنلك وانت مش عايز ترد ولما يلاقيك مش بترد ، تلاقيه رن من رقم تاني علشان ترد عليه ، “ابن الإيه ذكي” ، بس انت اذكى منه ، مبتردش !

من يومين حصلي نفس الموقف ده ، واحد قعد يتصل عليا كتير جدا وانا مكنتش حاسس اني عايز ارد ، وفي دماغي انه هيرغي وانا بذاكر ومعنديش وقت ، وفجأة سكت لمدة نص دقيقة ورن رقم غريب وانا في بالي “ههههه فاكرني مغفل ، طبعا مش هرد ” ، وجرب تاني ، وبرده مرديتش ، وفجأة رقم تاني خالص رنلي ولا شوفته قبل كده ، قولت معقول ! دانت قليل الادب وبدأت اكنسل وفي دماغي “غريبة جدا ، يعني واحد مبيردش فممكن يكون نايم او في الحمام يا أخي ” ..

. سكت الموبايل ومرنش تاني لأخر اليوم ، انا استغربت للموضوع ده جدا ، صحيح انا مش سهل اني ارد عليه لاني مش بحب ارد على تليفون البيت او الموبايل ، بس عديتها وتاني يوم التليفون بتاعي مرنش تماما ، بصيت فيه كذا مرة ، مفيش اي حد ، رنيت من تليفون اخويا علشان اتاكد انه شغال ، اوكي عادي وتمام ، بصيت في اخر المكالمات لاقيت الرقمين واخرهم رقم صاحبي ده ، ففكرت كده شوية ولاقيت نفسي بتصل بيه

“ايه ياجميل ازيك اخبارك ، معلش كنت بذاكر امبارح وكنت مشغول جدا فمقدرتش ارد عليك” ، “لا يانهاد ولا يهمك ، انت بس واحشني والله العظيم وانت زي اخويا وبحبك وربنا يكرمك ويعينك وانا كنت عايز اجي الدبلومة بتاعة التلات الي بعد الجاي ” قولتله ياجميل انت تنور وتشرفنا وقفلت السكة وانا متضايق جدا ، مكالمة مخدتش دقيقة لواحد كان بيتصل بيدعيلي ومشاعره جميلة بس مرضيتش ارد ، وكمان مصلحة انه هيسجل في الدورة فاستغربت نفسي جدا. 
دقيقتين ولاقيت رقم بيرنلي ، ببص لاقيته الرقم الي رن على طول بعد ماصحبنا رن عليا من يومين فاتوا ، فقولت “غريبة ، مانا لسة متصل بيك” ، فبرد على الرقم لاقيته صوت بنت بتقولي دكتور نهاد ؟ فقولتلها ايوة ، قالتلي انا فلانة من مكتب استاذ فلان في المركز الفلاني وهو عايز يكلمك ، رديت عليه واكتشفت انه عرض عليا عرض من العروض الي مش ممكن تتكرر تاني في حياتي وعرض مبيجيش لاي حد ورحبت جدا بالفكرة والموضوع واتفقنا على ميعاد ، انهينا المكالمة وقبل ماتنطط من الفرحة لاقيت التليفون بيرن تاني !

بصيت في الرقم لاقيته الرقم التاني الغريب الي كان رن من يومين ، حسيت كاني في حلم ، فرديت ، تخيل لاقيته مين ؟ ….. لاقيته صاحبي الي مكنتش برد عليه بس عادي كان بيتصل من رقم غريب عادي يعني 😛

من فترة شوفت فيلم لجيم كاري اسمه “yes man”

وكان بيناقش فكرة مشابهة لفكرة الموضوع ده ، لو قولت ايوة للحياة ، الحياة هتقولك ايوة ، ولو بدأت تبعد ، هتلاقي ان كل حاجة بتبعد عنك ..

في يوم ما ، بتكون حاسس كانك اتعس بني آدم على الارض ، وبتبقى حاسس كان الناس كلها ضدك وانك لوحدك وكاره نفسك ، ويوم تاني تحس انك مالك الدنيا ديه بإيدك ، كل حاجة بتحصل بتخليك تحس انك ملك ، فبتستغرب لحالك بس مش بتفرق معاك وده لانك بتحس بشعور جميل اوي بيجري في جسمك كله ، غرور على هيبة على وقار على حب على سعادة على ثقة بالنفس كلهم مجتمعين جواك ، وبتكتشف ان البنت الي انت كنت بتحبها بس مكنتش بتعبرك ، بتتصل بيك وبتسلم عليك ، او انك بتعدي الشارع من غير ماتبص يمين وشمال وانك واثق من نفسك جدا لدرجة ان العربيات بتقفلك ، الشركة الي انت كنت حاطط فيها السي في بتاعك بتتصل عليك وبتقولك انهم محتاجينك ، تحس كان الحياة كلها متفصلة على مقاسك .. بتحب نفسك والشغل والناس وحاسس انك ممكن تضحي بحياتك في اليوم ده بالذات . 
الي بتكلم عنه حاجة متعلمنهاش في المدارس، بس علمتهالنا الحياة ، انك تقول أيوة ، هتلاقي الكون كله بيسمعك ، هتلاقي الارض خاضعة ليك والظروف تحت امرك.

والمعادلة بسيطة ، وسهلة جدا ، ليها شروطها ، بتتلخص في كلمتين … “قول ايوة”

كنت في جلسة مع سوزيت سوانسون ، وهي محاضرة امريكية اتعاونا مع بعض في القاهرة في محاضرة بعنوان قناعات اكثر قوة من سنة فاتت ، سوزيت سوانسون من اقوى المدربين المتواجدين في مجالات الطاقة والتأمل والتواصل الكوني ، قالتلنا ، لمدة 7 ايام ، قول أيوة لأي حد يعرض عليك أي حاجة ، لو قالك تعالى نروح السينما … ايوة ، تعالى نذاكر … ايوة ، تعالى نعمل اي حاجة … ايوة !

هتكتشف وده الي انا عرفت ان فيه ابواب كتيراوي بتتفتحلك في اماكن تانية كتير وليها كذا شكل مختلف ، يعني انت بتقول ايوة انك تروح درس دين مثلا ، فهتلاقي وانت رايح تليفون مهم ويهمك الي هتسمعه فيه ، لو قولت ايوة انك تذاكر برضه في خلال ماده بيحصل العالم او الكون هيقولك ايوة بطريقته ..

لو عايز تعرف خطوات علشان تخلي يومك يوم انجاز وتواصل مع نفسك ومع العالم :

اولا اصحى بدري وقبل ماتفتح عينك قول انا عايز اعمل…… النهاردة (حتى لو مش حاسس انك متحمس بس قولها) لانك اساسا في اللحظة ديه بتبقى في ترانس فبتقول اقتراحات مباشرة لعقلك اللاواعي بيهيئك ويجهزك ليها في خلال اليوم.

فتح عينك فجأة وقوم من عالسرير وقول انا النهاردة احسن ، نط من عالسرير متقومش بشكل عادي ، قوم بطريقة نشيطة جدا ولو حد في الاوضة هزر معاه .

اغسل وشك وهزر مع نفسك يعني بص في المراية واضحك وابتسم وجرب تشوف نفسك جميل .

ابدأ خليك نشيط مع الهدوم الي هتلبسها ، غني وانت بتكوي ، مثل انك ان طاقتك ممكن توصل السما ، سلم على الناس

حب الناس الي معاك ، لان المعادلة هتتحقق لو بداتها بحب . سلم عليهم واسالهم هما عايزين ايه منك وانت جاي مثلا او اي شىء كان .. اتصرف

اخرج من الباب ، اتوكل على الله ، وفي دماغك ابدأ ركز على كل حاجة حلوة هتشوفها من اول ماتخرج من الباب حتى لو كان الارض النضيفة الي انت هتمشي عليها او الحيطة او اين كان ، ابدأ بعينك وقرر انك تركز بس على كل شىء جميل قدامك وافتح تليفونك وغير النغمة وفي دماغك قول “انا النهاردة احسن .. ايوة” .

كل ماتشوف حد سلم عليه وابتسم ، وابدأ ركز على انك تقابل ناس بوجه بشوش وتستنى منهم يطلبوا منك اي حاجة علشان تقول ايوة ..

كل ماتلاقي فرصة تقول فيها ايوة قولها بمشاعر وحب وعاطفة قوية قول ايوة ..

لو حسيت انك مش هينفع تقول ايوة ولازم تقول لا فقول ايوة لحاجة مختلفة لنفس الشخص او في نفس الطلب ، يعني متقولش “لا ده مش اختصاصي” قول “ايوة هساعدك في الي اقدر اعمله والباقي ممكن يقوم بيه فلان ”

وابدأ ركز على كل شىء حلو بيحصل حواليك ، وهتكتشف قوة كلمة “أيوة”

ومن النهاردة لمدة 7 ايام ، ابدأ قول ايوة لاي عرض بيتعرض عليك ، وعيش حياتك باحسن شكل ممكن لمدة 7 ايام .

قول ايوة

مقالات مرتبطة

الخوف من المستقبل ل نهاد رجب...
views 6490
التفكير بشكل سلبي هو الطريق الاسرع في تسويق المنتجات خصيصا في مصر . يعني تشتري عربيه انت مش عايزها علشان لو حصلها حاجه تقدر تبيعها ! او متشتريش ...
تخلص من المشاعر السبية بالتحكم في اهواءك .. نهاد ر...
views 971
تحكمك في شهواتك ، تحكمك في نفسك والبعد عن الضعف قصاد المحرمات او الملذات ، هو في حد ذاته بيضمنلك النجاح في اي مشكلة نفسية بتواجهها . فلو كنت على سب...
ارحل وهاجر فالحل في الهجرة #نهاد_رجب...
views 2483
ارحل .. فالحل في الرحيل والهجرة في الهجرة الاجابة لكل تساؤلاتك هاجر فقد هاجر ابراهيم قومه فوجد الله هاجر خرج سيدنا محمد من مكه فدخل الناس في دين ...
شيل السبت من الطريق ل نهاد رجب...
views 897
  معدي النهاردة من شارع ضيق ، فيه على اول خضري (بياع خضار)  سايب حاجته برة وفيه (سَبت) فيه خضار سادد الطريق على عربية نص نقل كانت بتحاول تعدي...
استمتع بحياتك بدون تركيز مع نهاد رجب...
views 2386
لإننا ساعات محتاجين نبطل تركيز علشان نقدر نفهم /ومحتاجين نبطل تفكير علشان نقدر نوصل للحلول ومحتاجين نبطل رغي علشان نقدر نتكلم ومحتاجين نبطل ضحك علش...
كيف تلعن نفسك في خطوات ! لـ نهاد رجب...
views 6081
نعم ، انها لعنه والعنوان صحيح "كيف تلعن نفسك" وليس "كيف تعلن عن نفسك" كما قد صور العقل الباطن في عقول بعض المتابعين .. لعنه النفس هي اختيارات نأخذه...
فكر كموجة وكيف يمكنك تحقيق الحظ بطرق علمية ومبسطة ...
views 3385
  هل تؤمن بالصدفة ؟ ان كنت تؤمن بالصدفة فالصدفة لا تؤمن بك وانا ايضا لا أؤمن بها .. دعني اسألك سؤال ، بالنظر الى الصورة المرفقة ، تجد عمودا م...
1 + 1 = مصيرك
views 2032
تأمل في الكلام ده بتدور على الحقيقة ؟ ولا بتدور على الوهم ؟ الخطأ اللى بنعمله في حياتنا هو اننا بنحاول نكون في بحث مستمر عن الحقيقة ، وقليل أوي الل...
نبوءة القول: كيف يمكنك التحكم فى من يحبك...
views 5411
  نبوء القبول ببساطة بتقول : لما نفكر ان الناس هتحبنا ، بنتصرف بطريقة حميمية جدا فالناس بتحبنا اكتر ، ولما بنعتقد انهم مش بيحبونا ، بنتصرف ببرود...
سوق حياتك واقرى الطريق #نهاد_رجب...
views 2161
عارف انك لما تيجي تسوق العربية في البداية بتحصلك مشاكل كتير فلان بيكسر عليك البني آدم ده زنقك الطريق وقف فجأة وكنت هتخبط في اللي قدامك بس ربنا ست...

Leave a Comment