الإقناع والتأثير

اعادة تعريف- براعة الفم- تويم ضمنى

 

اسمه حسن ، رايح خامسة ابتدائي بس شكله اصغر من سنه بكتر ، كتير بلاقيه وانا طالع او وانا نازل ، بيساعد ابوه وامه في شغل العمارة اصل والده البواب ، عم جمال اسمه ، عم جمال منياوي ، حاد مباشر وراجل شايف شغله ، حسن ليه اخت اده تقريبا واخ اصغر منه بس الواضح ان حسن المسئول عن اخواته ، كل يوم بيروح المدرسة ، ساكنين في اوضة في اول دور ، بييجي حسن من المدرسة بيساعد اهله وبيشتري حاجات للناس وديه كانت حياته ، بس في المنيا حسن كان مبسوط ، ببساطة لان ابوه كان ليه ارضه ، بس هنا ابوه بواب ، ومع ان حسن صغير بس اول ماجيه مع اهله كنت دايما تلاقيه زعلان ، لوحده قافش على نفسه ومبيكلمش حد ، في مرة كنت نازل الحق ندوة في العجوزة لما شديت الاسانسير وفتحته لاقيت حسن وعليه بصة واحد كبير متضايق من الدنيا كلها ، ولإني في خامس دور فده اداني فرصة اني اجري معاه حوار بسيط اوي ، لحد دلوقتي اكاد ان اجزم انه غير من حسن ، لما بصتله وسألته وانا مبتسم “انت حسن ؟ قالي اه حسن جمال … قولتله في سنة كام ؟ – رد عليا بصوت ملائكي لطفل في عمره وعلى ضهره مسئوليات الدنيا – في رابعة ورايح خامسة ، قولتله انت راجل صغير ياحسن ، انت ابن مدير العمارة ؟؟ بصلي وسكت حاول يخبي ابتسامة على وشه بس كانها خرجت وقالي ايوة اه والله، قولتله تمام ياحسن ، انت مساعد المدير في شغل العمارة والحفاظ على امنها ؟؟”

عايزك تتخيل شكل حسن ، لما قولتله جملة بسيطة جدا في خلال مانا نازل بس الجملة خليته حد فاهم ، حد متحمس ، وحد بيقدر وظيفة والده ، انا معرفش ايه الي بيدور جواه بس انا افترضت افتراض ولما اتعاملت معاه على اساسه اكتشفت انه بسنه ده كان رافض المكان الي هو فيه ولما عرف انه “مساعد مدير العمارة” ده كان كفاية علشان بجد حسن يكبر ويفهم ويبقى مبسوط وادخل جواه حلم انه يبقى ظابط وديه كانت تكملة كلامي لما سالته “عايز تكمل وتبقى ظابط في الشرطة” 

كلمة واحدة ممكن تغير حياة طفل او حد عنده اعتقاد ما ، جملة واحدة ممكن تخليك تتغلب على اي مجادلة كلامية تخيل؟ 

في تخصص التنويم الضمني ، انا معتمد على تقنيات نفسية مفادها ان كل انسان عنده جزء معين بيستقبل الاقتراحات ومش بيعارضها ، وبتعرف ازاي تقدر توصل للجزء ده وتزرع فيه افكارك بطرق نفسية بحتة بتخلي الشخص متفتح اكتر علشان يستقبل توجيهاتك ، فانت بتتعلم ازاي تتكلم وازاي تعرض افكارك بطريقة تخلي الشخص الي قدامك متقبل لكلامك مستعد ليه وينفذه ، وده طبعا اختصارا للي ممكن تعمله بالتنويم الضمني بس زي مانت بتعرف ازاي تتكلم ، انت كمان بتعرف ازاي ترد ، وده من خلال 14 نمط لغوي لمستشار امريكي في علم برمجة الأعصاب باللغة والكلام اسمه روبرت ديلتز ، والي مألف تقنية براعة الفم ، تقنية براعة الفم شبيهة ببراعة اليد ، الشخص الي بيسرق ، عنده قدره انه يحط ايده في جيبك من غير ماتحس ، ببراعة الفم لروبرت ديلتز انت بتقدر تتكلم مع الشخص بطريقة خفية جدا تخليك تقدر ترد على اي مجادلات تواجهك وتتغلب عليها سواء في عمليات المناقشات ، المجادلات او حتى الخناقات ، ومن الانماط ديه ، نمط اسمه اعادة التعريف ، بمعنى ان اي حاجة بتتقال هي عبارة عن اعتقاد ، حد قالك انت غلس مثلا ، قدامك اختيارين لإيما تقوله اهو انت واهلك ، لإيما تقوله ليه ؟ هيقولك علشان مثلا بتكلمني عالموبايل كل شوية ، لإيما تقوله “طيب غور مش هكلمك تاني” او تقوله ببساطة “انا فعلا حاسس ان اهتمامي بيك كان مبالغ فيه بس انت عارف انك لما بتحب حد بتحس انك عايز دايما تتطمن عليه وانا اوعدك اني هبعد ومش هضايقك تاني باهتمامي بيك” ايه رايك في الجملة ديه ؟ جملة بسيطة اوي ، منها خليت الشخص يحس انك اخر واحد في الدنيا ممكن يبقى غلس وانه هو نفسه الي غلس ، ثانيا انت خليت الشخص يتأكد انك بتعمل كده علشان بتحبه مش غلاسة وده طبيعي يخليه مهتم بيك اكتر.. 

اعادة التعريف تقنية سهلة وبسيطة معناها انك بتاخد الاعتقاد بتغير من تأثيره عن طريق انك تغير اطار المعنى المرتبط بيه ، فلو قولتلي انت كذا علشان عملت كذا وكذا ، فدورك كمنوم ضمني وحد عنده مهارة الرد انك تقول لا ، انا عملت كذا وكذا علشان انا نيتي كذا وكذا ، تخيل لو استخدمت التقنية ديه في المفاوضات او في حل النزاعات ممكن تستفيد اد ايه ؟ 

تعالى نشوف سياق تاني ممكن نستخدم فيه النمط اللغوي ده ، وده حصل معايا من سنتين مع ولد صغير زي القمر عنده 7 سنين ابوه مات ، ابوه كان حد معرفة ولما روحت عزيت لاقيته عمال يعيط بحرقة لان في نفس اليوم ده كان ابوه وعده انه يوديه الملاهي وكان يوم لطيف جدا والموت حصل فجأة ، الولد اتصدم وكان وجودي طبيعي لانه الراجل ده كان قريبي ، انا مكنتش اعرف كلمة في التنويم الايحائي او الضمني او البلالايكا حتى ، بس كنت فاكر قصة حكاها المدرب توني روبنز ففكرت ليه لأ؟ اوكي هستخدمها ، قولتله بص ، خليني اقولك حاجة ، انا عارف انك بتعيط علشان باباك بعد عنك شوية ، انا كمان بابا مش موجود بس خليني اقولك قصة ، بابا حكهالي من زمان ، عن دودة صغيرة بتتولد وبتكبر وبتتعرف على ناس بتحبهم وبيحبوها بتكبر الدودة وبييجي وقتها علشان تترقى ، بتدخل في حفرة وبتتلف في قماش ابيض – الشرنقة- ومحدش بيعرف عنها حاجة ، لحد ما الموقت بيمر ، وبتيجي لحظة الدودة بتتحول لفراشة جميلة ، اجمل فراشة في الدنيا ، بأجمل لون ، وبتخرج برة القماش الابيض وبتطير في الجو وبتشوف كل الناس الي بتحبهم بس علشان هيا حرة وبتطير بتشوفهم وهما مش بيقدروا يشوفوها لحد ماهما كمان يبقوا فراشة ويتقابلوا تاني مع بعض .. انت عارف ان بابا شايفك دلوقتي وبيحبك وتقدر تتخيل شكله جميل لان حظه احسن مننا كلنا ، جاتله الفرصه انه يبقى احسن وفي مكان احسن فوقينا كلنا ، الولد هدي وانا طبعا مكنتش اعرف اني عملت معاه تنويم لحظي بسيط ، وبصلي وسألني بعين مليانة دموع وقالي ، فراشة لونها ايه ؟؟؟ قولتله اجمل فراشة بأجمل لون في الدنيا ، ضحك وقالي خضرا – قولت في دماغي الواد ده شكله غبي- بس قولتله اجمل فراشة خضرا في الدنيا ، وكان استخدام قوي لتقنية اعادة التعريف لما تقنع حد ان ده مسموش فراق ، ده ترقي .. 

نهاد رجب
المدرب العربي الأول في فن الاقناع والتأثير بالتنويم الضمني
http://www.nihadragab.co

مقالات مرتبطة

زرع الافكار الجزء الثانى: تنويم ضمنى واقناع بالايح...
views 1988
  هستعرض معاكم النهاردة ، فكرة جديدة مطورة من افكار التنويم الضمني ، بعض منكم اتعرف على التنويم الضمني وجاتله فرصه انه يتعرف على المجال الواسع د...
التكيف العصبي وسلطة الاعتقاد #نهاد_رجب...
views 860
  التكيف العصبي وسلطة الاعتقاد جيلبرت العالم المشهور في مرة عمل بحث عن "هل احنا بنصدق الاول قبل مانحلل ولا بنحلل الاول قبل مانصدق" واكتشف جلبرت...
منافسة كوكاكولا وبيبسي الاعلانية...
views 625
  عبقرية اختيار الكلمات والرد المفحم قامت شركة المشروبات الغازية المعروفة بيبسي في احدى اعلاناتها المنافسة لكوكاكولا (بمناسبة الاحتفال بعيد...
تقنية الاقناع بالارباك والقولبة #نهاد_رجب...
views 1198
  اقناع وتأثير نفسي من أكتر الاعلانات اللى بحب فكرتها هي اعلانات PicPac الاعلان بالكامل بيستخدم تقنيه نفسة من تقنيات التنويم الضمني بتعتمد على...
عزيزى الراكب
views 982
  عمرك سمعت الجملة ديه قبل كده ؟ "عزيزي المواطن ، احترس من مرض انفلونزا الخنازير .. اعراضه كذا وكذا ، وبييجي بالطريقة الفلانية ، وبتحس بكذا و...
فن الاقناع والتأثير النفسي
views 5267
انك تدخل جوة دماغ الشخص الي بتكلمه وتفهم نفسيته وتعرف ازاي ممكن تتعامل معاه وتشوف الدنيا بعين مختلفة ، عين فاهمة ، عين عارفة وعين بتقدر تقيم ، ده ممكن...
التنويم الضمنى- تقنية الربط المزدوج والربط الوهمى...
views 1543
  تحب تقرى المقالة ديه للآخر ولا تقراها كلها وبعد كده تكملها للآخر ؟؟ بلاش ديه تاخد الكيس الاسمر ولا الاسود ؟ بلاش ديه تحب تروح السينما نتفر...
عايز تنيم حد ضمنيا؟ ثبتة
views 1495
  بيقولوا ان التنويم الايحائي صعب ، وان الواحد لو نام ممكن يقول اسرار خطيرة المفروض ميقولهاش ، او انه ممكن يموت او يدخل في غيبوبة ، او ينسى مثلا...
5 خطوات لكشف كذب الآخرين لـ نهاد رجب...
views 6075
قبل أن نبدأ دعونا نتفق "إن بعض الظن إثم"  وهذا معناه عزيزي القارىء أن هذه الخطوات التي أنا بصدد أن أعرضها عليك ، ومهما بلغت من علم ولكنها في النهاي...
مبادىء النصابين الخمسة
views 3850
  مباديء النصابين الخمسة مقالة ليا -نهاد رجب- منقولة من مجلة فورورد اقوى مجلة شبابية مصرية نتية حمل العدد وخليك فوروردي جوه كل واحد فينا...

Leave a Comment