الإقناع والتأثير

وأدى ولاعة هنا للأستاذ

من فترة كتبت ان الاقتراحات هي اقوى حاجة ممكن تضعفك ، او تقويك ، او تخوفك او تمنيك او تطمنك وتهديك ، الاقتراحات هي مجموعة من الايحاءات المباشرة او غير المباشرة الي بنتأثر بيها ، في كل وقت ، وعلشان مفيش مجال اننا نحط ايدينا على كل حاجة بتفصلك عن الواقع وبتخليك تركز اكتر في المقالة.. فخليني اقولك على موقف في قصة.

معايا ولاعة ، الولاعة ديه ياحضرات مش زي اي ولاعة ، مش مجرد بتاعة تدوس عليها فتولع ، تبقى فهمتني غلط ، ايوة تبقى فهمتني غلط ، الولاعة ياحضرات وياسادة وياسيدات فيها امكانية جديد واول مرة تنزل الاسواق . الولاعة بتنور .. أيوة بتنور ، تدوس عليه تنور ، تجيبها يمين ايدك بتنور ، يعني هنسيب علامة في بيتك بس متقوليش هنسيبها فين شمال او يمين يانور العين، يعني مش هتقدر تغمض عنيك ، يعني انسف حمامك القديم … مين يحب يشتري الولاعة ، الولاعة ديه مش هقول انها ب 5 جنيه زي المحلات ولا ب 4 ولا ب 3 وخليها عليا بخسارة ، ياناس يامحتارة اانا هقول على طول ومن غير ماحلف اليمين وهبقى معاكم امين ان كل واحد هيطلع من جيبه جنيه يبقى الولاعة ديه حلال عليه ..

ولحد ماخلص كلامه ، محدش اشترى منه حاجة، غير ان اغلب الناس كانوا مبتسمين ، لحد ما قال “وأدي ولاعة هنا للأستاذ ” وعلشان انا كنت شايفه ، فعرفت ان محدش كان اشترى منه حاجة ، لكن ف اللحظة الي قال فيها الجملة ديه ، تلاتة اربعة بصوا وندهوله ، فبدأ يستخدم جملته السحرية “وادي ولاعة هنا للاستاذ ” .

لحد ما اكبر كمية اشتروا منه ، ونزل من الاتوبيس علشان اكتشف اني كنت وسط بحث نفسي عمله روبرت سيالديني “اشهر علماء التسويق في العالم” ، واتكلم فيه عن الموافقة الجماعية . وعرفت اني من ثواني كنت بسمع اكثر الاشخاص تأثيرا الي شوفتهم ف وسيلة مواصلات ، في حياتي .

الموافقة الجماعية من اكثر الاساليب تأثير في اي موقف ، في اي مكان وتحت اي ظروف .. وده لان اغلبنا لو مكنش كلنا ، اتظبط انه يمشي ف القافلة ، والقافلة هي مجموعة القيم والافكار والمعتقدات والمبادىء التي بيعتنقها ناس تانيين غيرنا ، بس اتأثرنا بيهم لمجرد انهم (اولا كتير ، ثانيا معانا )

خد عندك اعلانات “كل الستات بتستعمل برسيل” والرجالة بتشرب بيريل ، الخ

فكرة انك تعرف ان ناس كتير ماشيين ف اتجاه معين ، ده بيخليك بشكل تلقائي تروح وراهم .

ولاننا كائنات مرنة ، فاحنا عندنا قابلية عالية اننا نتلون احسن من السحالي ، احتمال تكون بتقرى او بتسمع المقالة ديه دلوقتي وف دماغك انك حد عندك منصب كبير ، ومش اي حد ممكن يأثر عليك ، وهنا متعة الموضوع كله ، ان ف بحث بعنوان تاثير الشخص الثالث ، اكتشفوا ان الناس الي مبتصدقش انها بتتأثر بالإعلانات مثلا بتبقى عادة من اكتر الناس الي بتتوجه وبتتأثر ، وعلشان مش موضوعنا ، بس علشان احنا كلنا كائنا مرنة فانت عندك قابلية انك تخرج برة نفسك وتتصرف بطريقة مختلفة تماما عنك ، وده بيحصل لو انت في جامع هتتكلم باسلوب تاني تماما بيفرضه عليك الايكولوجي او البيئة الي حواليك ، فبتتغير معتقداتك وافكارك وسلوكياتك ، فلو انت ف جامع هتصلي ولو انت ف استاد هتشتم ، ولو انت بتكلم بنت جميلة هتبقى مؤدب جدا ولو انتي بتكلمي سواق ميكروباص هتبقى حد تاني مختلف ، وهكذا .. احنا بنتلون على حسب البيئة وعلى حسب الناس وعلى حسب الظروف والتوقيت والمزاج .

والمزاج من اخطر الاوقات الي ممكن اتغير فيها ، فتلاقي واحد جميل جدا وهادي ومبسوط وبيحب الدنيا لو انجز او خلص حاجة كانت وراه ، وتلاقيه ابن .. تيت .. لو كان متنرفز او حاجة ضايقته  ، وساعات وهو متضايق بيتنرفز من حاجات مبيتنرفزش منها وهو مبسوط ، وساعات وهو مبسوط مبيتنرفزش من حاجات بتعصبه لو كان متضايق  ، وهكذا ، من ضمن التقنيات المستخدمة ف التاثير النفسي ، انك تدخل حد ف مزاج يكون عالي بالنسبة له ، تجمع فيه بين تلات حاجات (السعادة ، الكثرة والدقة )يعني تخليه مبسوط من حاجة وتفهمه انه هيحصل على كتير منها ، وانها انسب حاجة ليه ومواصفاتها قياسية، ساعتها انت عندك عميل هيمشي وراك في اي مكان .

لما تكون ف المترو وتلاقي 10 واقفين ورا مكنة واحدة الي جمبيها فاضية فديه موافقة جماعية، او تلاقي نفسك بترمي زبالة وسط كومة زبالة ف الشارع لمجرد انك مش لاقي سلة ترمي فيها ديه موافقة جماعية، او انك تشتم وسط ناس بيشتموا او انك تشرب خمرة لمجرد ان الي حواليك بيشربوها او انك تعربد لان اصحابك كلهم كده ، فمتقوليش انك هتقدر تضمن نفسك ، مجرد وجودك ، مجرد وجودهم ، هيخليك زيهم .

ودلوقتي عايزك تعمل حاجة جديدة ، هات ورقة او اي حاجة تقدر تمسكها بإيدك (اليمين او الشمال)، وتقفل عليها ، اختار ايد من الاتنين ، حط الورقة فيها ، تبت عليها جامد .. وانزل تحت

80% من الناس هتختار تحطها ف الايد اليمين ، و20% هتختار الشمال، لو لاقيتها ف ايدك اليمين فقدامك احتمالين ، لإيما تقول انها صدفة ، او انك تقرى المقالة من تاني وتشوف ازاي وجهتك ف الاخر لنفس النتيجة.

وأدي هنا ولاعة للأستاذ

مقالة لـ نهاد رجب

اول مدرب عربي لفن التاثير النفسي بالتنويم الضمني

الموقع الرسمي

http://www.nihadragab.com/

 

مقالات مرتبطة

5 طرق للاقناع-نهاد رجب
views 2620
  التنويم الضمني هو عبارة عن تقنيات نفسية بتهدف لإقناع الشخص بفكرة من خلال زرعها جواها عن طريق القصص او الاقتراحات المباشرة او المتضمنة بأنواعها...
كيف يقتنع الناس ؟ 7 أسرار غريبة لإقناع الناس نفسيا...
views 10418
  هذه المقالة مختلفة وتحتاج منك أن تقرأها بعناية وبروقان ...   قد يكون الإقناع من وجهه نظر الجميع هو عبارة عن عملية يتبادل فيها طرفان أو أك...
منافسة كوكاكولا وبيبسي الاعلانية...
views 624
  عبقرية اختيار الكلمات والرد المفحم قامت شركة المشروبات الغازية المعروفة بيبسي في احدى اعلاناتها المنافسة لكوكاكولا (بمناسبة الاحتفال بعيد...
استخدام انماط جورج بوليا للتعرف على المعتقدات وتحو...
views 3171
  عمرك سالت نفسك ليه الناس بتصدق اللي بتصدقه حتى لو كان غير حقيقي او منطقي او حتى حقيقي ، بس ليه الناس بتصدق حاجات وحاجات تانية لا ؟ ليه بعض الن...
زرع الافكار: زرع ذكرى وهمية 2...
views 1242
  هي لعبة بسيطة ، بس جربها مع الناس وهتعجبك ، لعبة من العاب التنويم الضمني ، وزي مانتوا عارفين واحتمال تكونوا سمعتوا عن ان التنويم الضمني متخصص ...
حتى الانسان يقدر يتلون- غسيل المخ بالتنويم الضمنى...
views 1590
  تقدر تإذي حد ؟ او تسرقه؟ تعذبه ؟ لو كانت الاجابة على التلات اسئلة بلأ يبقى اقرى المقالة واعرف حاجة غريبة عن نفسك .. ولو كانت بأيوة "لو ه...
الإقناع بكسر الشخصية
views 1577
كسر الشخصية هي طريقة مستخدمة لهدم شخصية شخص ما او كينونة مجموعة من الاشخاص .. والطريقة ديه ببساطة بتخليك تقدر تخلي اكثر الاشخاص صعوبة بيقع وبيتكسر ...
التكيف العصبي وسلطة الاعتقاد #نهاد_رجب...
views 860
  التكيف العصبي وسلطة الاعتقاد جيلبرت العالم المشهور في مرة عمل بحث عن "هل احنا بنصدق الاول قبل مانحلل ولا بنحلل الاول قبل مانصدق" واكتشف جلبرت...
فن الاقناع بالتحفيز
views 2418
   كنا بنتكلم عادي جدا مجرد اصدقاء مفيش بيننا اي حاجة غير انها بتحكيلي واحكيلها ، وفي وسط كلامنا قالتلي انت عارف ، في واحد عايز يخطبني ، وكل شوي...
الحقيقة وراء ادراك الواقع والاشارات #نهاد رجب...
views 997
  الغريب في الناس انهم بيفكروا دايما في الصورة النهائية بيشوفوا الصورة الكامله وبيحكموا عليها وبينسوا تماما التفاصيل . انك تشوف واحد معاه ...

Leave a Comment