أسرار النجاح

فضيحة الباور بالانس – نهاد رجب

 

“طب ياعم انت مش مصدق ! وحياة …. و…. العظيم ودين امي … البتاعة ديه بتجيب نتيجة وبتظبط كيميا الجسم .. انا اقولك .. امبارح  كنت متضايق ومخنوق ولبستها مفيش دقيقتين لاقيت خطيبتي بتكلمني ! ماتقولش بقى”

ساعتها “قولتله ياراجل ! متقولش انت”

كنت في قناة من القنوات وسالوني عن الجدل والكلام الي داير حول التنويم الضمني اللي بدربه وليه الناس بتتكلم عنه بالطريقة ديه .. بدأت احكيلهم عن فكرة التنويم الضمني والتأثير النفسي للإيحاءات ..

التنويم الضمني هو فن دراسة تأثير الايحاءات سواء اللفظية او الحركية على الجمهور .. أغلب الناس بيتأثروا بطريقة واحدة ، واحنا كبشر عندنا اكتر من طريقة علشان نوصل بيها رسالة او نستخلص رسالة من حد بشكل غير مباشر ..

فمثلا ، لو انا عايز اعرف فلان هيوافق على طلبي ولا لا ، ببدأ “أجس نبض” ، ولو انا عايز شخص يعمل حاجة ممكن اقولهاله بشكل غير مباشر ، يعني ممكن اقوله مثلا “هو الباب ده هيفضل مفتوح على طول؟” علشان اكتشف انه بيقفل الباب مع اني مطلبتش منه كده بشكل مباشر ..

الايحاءات هي عملية ايحاء احساس او فكرة معينة لشخص ما عن طريق اشارات غير مباشر ممكن تكون لفظية او حركية ، فانا ممكن اوحيلك انك مثلا عايز تنام لو انا “تثائبت” قدامك ، او ممكن اوحيلك ان فيه حاجة على جبهتك لو بصتلها اوي ومسحت الجبهة بتاعتي انا ، علشان تلاقي نفسك اوتوماتيك بتمسح جبهتك .. ده باختصار فكرة الايحاءات

بنتعرض للإيحاءات كل يوم ، ومن امثلتها انك ممكن تكون ماشي في مكان وتلاقي ناس باصين بتركيز على حاجة معينة علشان تلف وتبص عليها ، او انك تكون في اسانسير وعايز تنزل الدور السابع ومعاك خمسة او ستة نازلين الدور التالت ، وتلاقيهم يخرجوا الدور التالت وتلاقي نفسك خارج معاهم ! ديه بعض من اشكال استقبالنا للايحاءات بشكل يومي ، واشكال الايحاءات لا تنتهي .

واخر شكل توضيحي للايحاءات قبل مانتعمق في الموضوع الاساسي للمقالة واللي بتكلم عن الايحاءات تمهيدا ليه هو “البلاسيبو” وهي عبارة عن اقراص دوا ملهاش اي تأثير وملهاش اي تركيبات كيميائية وبتحتوي غالبا على سكر ، بس ممكن تعالج شخص ما من امراض شبه عضوية مستعصية لمجرد انه مصدق في الدكتور اللي كتبهاله بشرط انه ميكونش عارف انها بلاسيبو ..

ومن هنا احب انتقل لموضوع الباور بالانس .. تعريف الباور بالانس طبقا لمكتبة الويكيبيدا العالمية

“Power Balance is a brand of hologram bracelet once claimed by its manufacturers and vendors to “use holographic technology” to “resonate with and respond to the natural energy field of the body”, and increase sporting ability”

” الباور بالانس هو سوار قيل عنه بواسطة منتجيه وتجاره انه يستخدم تقنية الهولوجرافي للاستجابة للطاقة الطبيعية للجسم وزيادة القدرات الرياضية للانسان “

وده كان الجزء الاول من التعريف .. وفي اخر المقالة هكتب الجزء التاني للتعريف

لو روحت واشتريت الباور بالانس هتسمع دايما جملة “على التجربة” اي انك تقدر تجربه ولو مجبش نتيجة متشتريهوش .. لانه طبيعي انه هيجيب نتيجة .. العملية كالاتي :

1- بتسال ده ايه

2- بيتم اختبار “الاتزان الجسدي” حسب مابيتم تسميته الاول بدون ماتلبس الباور بالانس

3- ثم يتم تجربة السوار او الباور بالانس عن طريق انك تلبسه على ايدك او حوالين صدرك

4- بيتقالك خد بالك اتزانك هيبقى عامل ازاي دلوقتي

5- تقفيل العرض

بالصدفة قمت بالتعرف على تقنية من اكتر التقنيات المقربة لقلبي واللي اسمها “الايدوموتور” ، وهيا تقنية استخدامها معقد شوية بس هقولك اختصارا فكرتها ايه بالاضافة لفكرة “Social Compliance” او الخضوع المجتمعي طبقا لنظريات روبرت سيالديني وغيره .

الايدوموتور هو اني اقولك ان فيه حاجة ما هتحصل ، فانت هتتوقع حدوثها بنفس الطريقة اللي قولتلك عليها وهتركز على الاحساس اللي كلمتك عنه حتى لو انت رافضه فهتبدأ تحس بيه بيزيد جواك لمجرد انك ركزت عليه ..

وبقوم في دوراتي بعمل اختبار الظرف ، وفيه بخلي شخص ما يقوم بحمل ظرف معين فيه مكتوب حاجة هو ميعرفهاش ويحطه على صدره وببدأ اضغط على ايده ، علشان اكتشف انها بتنزل لتحت بدون مقاومة مع العلم اني بطلب منه انه يقاوم ، وبديله ظرف تاني علشان يحطه مكان الظرف الاول وبضغط على ايده وبطلب منه انه يقاوم فيقاوم وتزيد مقاومته وسط استغراب الناس الموجودة ببدأ اشرح ازاي استخدمت تقنية ال PWA و IDEOMOTOR و اللغويات طبعا علشان اقنع الشخص ان الظرف ليه تأثير عليه غير عادي .

وملخص انا بعمل ايه هو اني اديتله اقتراحات ضمنية ان الظرف نفسه ليه تأثير مع اني في الواقع عارف ان ده مجرد ظرف عادي بس الطريقة الي بديله بيها الظرف مع نبرة صوتي واسلوبي وايحاءاتي ده الي بيديله تأثير وبيتحكم في قوة ايده . بتنزل او مبتنزلش .

في اول خطوة دايما بتيجي منك .. يعني انت سمعت عن منتج مؤخرا اكتشفت ان احمد حلمي كان بيلبسه في احد افلامه ، المنتج اسمه “باور بالانس” وحصلك فضول انك تسال عنه ، ولاقيت الباور بالانس ، فبتسأل المسئول اللي بيبيعلك الباور بالانس “ده ايه؟” ..

1- ده ايه !

ده حضرتك اسمه الباور بالانس ، فيه مادة هولوجرامية “طبعا انت مش فاهم غالبا ده ايه يعني” بس بيحافظ على الاتزان الموجود في الجسم وبيمنع الامراض وبيخليك مبسوط اغلب الوقت وبيساعدك تتخلص من الضغوط والعصبية علشان تلاقي نفسك مرتاح وهادي اغلب الوقت .

هنا بقى الشخص اللي بيبعلك الموضوع ده بيجهزك لمجموعة من الايحاءات اللي انت لسة متأثرتش بيها بس مليون ف المية فضولك زاد انك تجرب ده بنفسك ، لانه اتكلم عن حاجات في منتهى الروعة والقوة بالنسبة لأي حد بيسمعه ، وهنا بمنتهى الثقة بيقولك انه هو نفسه لابسه فيوريك فتكتشف انه هو كمان لابس المنتج فعلا !! ويقولك انك تقدر تجربه الاول .. وهنا هو بيحط نفسه قصاد تحدي معاك حتى لو انت مقاومه ، لانه عارف ف الاخر حاجة مهمة جدا .. هتعرفها انت كمان لما تكمل المقالة .. وبيبدأ يعملك اختبار الاتزان الجسدي

2- اختبار الاتزان الجسدي

فبتقف بطريقة مستقيمة وبترفع ايدك اليمين او الشمال بشكل عمودي مع جسمك ، وبيضغط على ايدك فتلاقي نفسك مع اقل ضغط على مفصل ايدك بتقع .. وبيبدا يعمل كذا اختبار ، منهم انه بيخليك تحط ايدك جمب جسمك وبيشد ايدك لتحت فبتقع او جسمك بيتحرك ، او انه يخليك تلف بإيدك حوالين جسمك علشان تقف عند نقطة معينة .. ولما تلاقي نفسك بتفشل كل مرة بيخليك تلبس الباور بالانس وانت عايز تعرف ايه الفرق اللي ممكن يحصل لما تلبسه حوالين ايدك ..

3- تجربة الاسورة او السلسلة “الباور بالانس”

في اللحظة اللي بتلبس فيها الباور بالانس بيقولك “شوف بقى الاختلاف اللي هيحصل دلوقتي ولاحظ الاتزان بتاع جسمك والطاقة بتاعته”

ويبدأ يعمل نفس الاختبارات في الخطوة رقم (2) ، علشان تكتشف ان المرة ديه لما بيضغط على ايدك مبتقعش او لما يشد ايدك ولما بتلف ايدك حوالين جسمك بتكتشف ان ايدك بتوصل لمسافة اطول وابعد ، فبالتالي لو انت مكنتش مقتنع بالباور بالانس هتقتنع بيه لانك هتلاحظ بنفسك ان المرة ديه انت فعلا مبتقعش وهنا بقى الخدعة او ال SCAM الي كسبت الشركة المنتجة للباور بالانس الملايين ..

في الفيديو اللي هيتم رفعه على الموقع بتاعيwww.nihadragab.com

والصفحة بتاعتيhttp://www.facebook.com/nihad.ragab2011

هقوم بتوضيح الكلام اللي هقولهولك دلوقتي ، لو مادركتش الموضوع بالكامل اتطمن كمان يومين هعرضلك الفيديو التوضيحي .

الخدعة او الحيلة اللي بتحصل في النموذج الاول للاختبار انك تقف على رجل واحدة وتفرد ايدك بشكل عمودي جمبك زي ماهو موضح في الصورة :

اللي بيحصل هنا ان البائع بيبدأ يضغط على منتصف ايدك المكان اللي بين كف ايدك وودراعك فبالتلي بيحاول يضغط فعلا وفعلا بتقع في المرة الأولى وده لسبب بسيط ، هو انه اولا مبيضغطش بنفس القوة كل مرة ، ثانيا في المرة الاولى لما بيضغط بيضغط بسحبة بسيطة اوي للجهة التانية فبالتالي انت بتقع فعلا مهما حاولت انك تقاوم .. وبعد ماتلبس الباور بالانس بيضغط بشكل عمودي لتحت بخط مستقيم علشان تكتشف انك بتقاوم فعلا ومبتقعش بسهولة وبيربط ده بقوة الباور بالانس وانك خلاص حصلت على الاتزان الجسدي المناسب والكامل.

تاني طريقة هي انه يخليك تقف بشكل مستقيم مفرود وايدك الاتنين جمبك ورجلك على الارض ، ويشبك ايده في ايدك ويبدأ يشدك لتحت ولكن بسحبة بسيطة لجهة ما وبتكتشف فعلا انك اول مرة جسمك بيتحرك لكن تاني مرة جسمك بيثبت لانه بيهتم تاني مرة انه يشدك بشكل مستقيم لأسفل ..

تالت طريقة الا وهي انه يخليك تفرد ايدك قصاد جسمك ، وتلف ايدك حوالين جسمك لاقصى مسافة تقدر توصلها ، فتقف عند نقطة معينة ، وبعد كده يلبسك ساعتها الباور بالانسعلشان تجرب ولاحظ انه هيقولك “دلوقتي لاحظ المسافة المسافة هتبعد اد ايه اكتر وكل اللي انت هتعمله انك تكمل وتكتشف ان ايدك بعدت اكتر واكتر ، ساعتها هتتخيل ان ده بتأثير الباور بالانس بس في الفيديو هعملك نفس الاختبار ده وهتعرف ان اي حد يقدر يعمل كده حتى لو مش لابس الباور بالانس ..

ديه الاختبارات المشهورة للباور بالانس ، وهيا عبارة عن حيل جسدية بسيطة انت مبتاخدش بالك منها بسهولة غير لما تركز مع الموضوع او لو كنت دارس فن الايحاءات بالتنويم الضمني هتتعرف على الفكرة بتاعتها .. وملحوظة مهمة جدا / ممكن من غير مايستخدم معاك حيل او خدع جسدية برضه تتعرض لنفس التأثير في حالة ان النموذج اللي معاه “مستعد جدا لكده ومقتنع بتأثيرها وبيدخل في مرحلة اسمها (Playing along)”

Playing along

انك تساير الموضوع لمجرد انك حابب ده او انك مستعد ليه ومعجب بالشخص اللي بيختبره عليك ، فلو افترضنا ان عادل امام بيقولك بص ف عيني ونام ، هتكتشف ان تلات اربع الناس اللي بيحبوا عادل امام صعب جدا انهم يكسفوه قدام الكاميرا ومن كتر حبهم بيعملوا عملية ال Playing along او المسايرة يعني ، وبيتصرفوا بالظبط زي مابيقولهم IDEOMOTOR EFFECT

خد بالك ان حتى اختبارات الباور بالانس ممكن مش بس تنجح بالخدع العقلية او ال playing along ده ممكن تنجح حتى لو الشخص نفسه مقالكش اي حاجة لكن بيستخدم الايحاءات “الحركية” لكده ، زي موضوع “مسح الجبهة بالظبط” ، فمثلا لو انا جيت شاورتلك انك تقف بطريقة معينة من غير ماتكلم وترفع ايدك زيي وضغطت على ايدك ، وبعد كده لبستك الباور بالانس من غير حتى ماقولك هيا ايه ، وشاورتلك انك تعمل نفس الوقفة ديه ، انت بشكل تلقائي هتتوقع ان فيه حاجة ما مميزة هتحصل مرتبطة بالباور بالانس اللي انت لبستها . وبالتالي هتوصل لنفس النتيجة حتى وانا ساكت ومتكلمتش ..

اخر طريقة لتأثر الناس بالباور بالانس وديه اسهل طريقة ، اني اكون في مكان فيه ناس كتير ، معرفش حد فيهم غير 3 او 4 منهم واختارهم بشكل عشوائي قصاد جموع الناس اللي مش مصدقة في الباور بالانس ، وانا متفق معاهم انهم Playing along معايا ، اول واحد هيطلع ويتأثر فعلا وتجيب معاه نتيجة بالاسورة الوهمية ، هيخلي 100 من اللي قاعدين يقتنعوا ، التاني هيخلي الباقي يقتنعوا ، التالت هيخلي الناس تتحول من معارضين لمؤيدين والرابع هيخلي كل الناس تبقى Playing along وده سحر ال Social Complaince او الاتفاق المجتمعي .. اي ان الناس لما هتشوف ناس تانية غيرها بتتاثر بحاجة معينة هتتاثر بيها ..

ومن هنا اقدر اقول وبكل ثقة ان الباور بالانس هو وهم العصر الحديث ، شركة منتجة كسبت ملايين معتمدين على اساليب نفسية وايحاءات ودعاية قوية لمنتج ملوش لازمة وميفرقش عن الخرزة الزرقا اللي بتمنع الحسد في اعتقاد بعض الناس . عايزك تجرب بنفسك علشان تكتشف انك ممكن تعمل منتج تسميه على اسمك وتقول للناس انه بيجيب الحظ وتعملهم اختبارات يصدقوها وتلاقي الناس بتلبسها فعلا في اي وقت وف كل مكان .. وكل اللي انت محتاجه :

* دعاية

* متطوعين Playing Along

* وقصص ناجحة “وهمية”

اما بخصوص باقي تعريف الباور بالانس اللي ذكرته في البداية فهو :

“Numerous independent studies of the device found it to be completely ineffective at improving athletic performance, and the manufacturer was forced to retract its claims in 2010.”

“العديد من الدراسات الفردية المستقلة للباور بالانس اثبتت بشكل كامل انه غير مؤثر ولا يحسن اي أداء رياضي والمنتجين اجبروا على سحب ادعاءاتهم الخاصة بالمنتج في 2010 “

http://en.wikipedia.org/wiki/Power_Balance

——

“well…i can relate to these things merely being suggestions, one friend of mine even asked me about this power balance thing he bought,,,whether its real or just a suggestion, I asked him what do u think about it? he replied: I see many celebrities endorsing it therefore it must be real….My simple reply was (So it is real) 🙂 “

Mohamed Abdul-Kawy

Co-founder & Certified Trainer of NS-NLP at Neuro-Semantics Egypt

http://www.facebook.com/pages/Neuro-Semantics-Egypt/146811458703144

انا متاكد ان مؤيدي الباور بالانس هيفضلوا على اقتناعهم بالمنتج حتى مع كل التحقيق ده ، الباور بالانس بيتباع باسعار تتراوح بين 30 دولار ل 600 دولار في بعض الشركات ، وكله في الاخر وهم بيتم بيعه للناس .. لو بتفكر تشتري الباور بالانس ، فكر تاني ..

انتظروا الفيديو اللي سجلته وبيوضح تأثير الباور بالانس الحقيقي وكونه فعلا خدعة القرن .

واتمنى تشير الموضوع لافادة اكبر عدد من الناس ..

تحياتي

نهاد رجب

اول مدرب عربي لفن الاقناع والتأثير النفسي بالتنويم الضمني

مدرب ومعالج بالتنويم الايحائي

مؤلف كتاب تعلم كيف تحدث التنويم الايحائي والكتاب الاليكتروني “فن الاقناع والتاثير النفسي بالتنويم الضمني”

http://www.nihadragab.com

info@nihadragab.com

 

مقالات مرتبطة

فكر كموجة وكيف يمكنك تحقيق الحظ بطرق علمية ومبسطة ...
views 3386
  هل تؤمن بالصدفة ؟ ان كنت تؤمن بالصدفة فالصدفة لا تؤمن بك وانا ايضا لا أؤمن بها .. دعني اسألك سؤال ، بالنظر الى الصورة المرفقة ، تجد عمودا م...
التغيير والتنمية البشرية
views 1302
نظريتي عن التغيير يمكن تكون مختلفة وسببت مجادلات كتير مع ناس كتير مزنوقة في التغيير باختصار انا مش مقتنع ان اللى عايز يتغير بيتغير ، اللى هو عبث فك...
فن التحكم في المعلومات وتغيير الواقع...
views 1378
  امبارح عميلة بتكلمني من ضمن كلامها وبتحكيلي عن القلق والتوتر اللى بتعيشه في حياتهم ،  انها وجوزها كانوا في مطعم بيشتروا حاجات ، وشافت شاب شغال...
أن تكون حرا – شروط وخطوات #نهاد_رجب...
views 4830
أن تكون حرا   هو أن لا تسمع إلا صوتك والذي يأمرك بالنهوض في الوقت الذي يتكاتف فيه الناس لإيقافك بأصواتهم   هو أن تلتزم بوعدك و...
حب اهدافك وافكارك
views 2073
تجربة ف معلومة النهاردة اكتشفت حقيقة فكرة كانت بتجيلي من فترة للتانية .. اني لو حبيت فكرة معينة وعشقتها واندمجت معاها عاطفيا ، هشوفها متجسدة في الدن...
أقصر الطرق الى النجاح – كن مجنونا – نه...
views 1438
  ذكر في كتاب "حكم المجانين" أكثر الناس نجاحا وغنى في العالم لديه مشكلة ذهنية واحدة او اثنتان ، او لديه حالة نفسية مرضية ما ، فالمجنون فقط هو من...
عيش اللحظة الآن مع نهاد رجب
views 948
  التفكير بشكل سلبي هو الطريق الاسرع في تسويق المنتجات خصيصا في مصر . يعني تشتري عربيه انت مش عايزها علشان لو حصلها حاجه تقدر تبيعها ! او ...
تعلم لغة كاملة اثناء نومك ! التعلم نائما وطرق التأ...
views 10087
اهلا بيكم ، انا نهاد رجب اهلا ومرحبا بيكم في حلقة جديدة من حلقاتي على اليوتيوب ، والنهاردة هكلمكم عن موضوع ممكن يكون غريب بس مؤخرا الابحاث الامريكية ...
استمتع بحياتك بدون تركيز مع نهاد رجب...
views 2386
لإننا ساعات محتاجين نبطل تركيز علشان نقدر نفهم /ومحتاجين نبطل تفكير علشان نقدر نوصل للحلول ومحتاجين نبطل رغي علشان نقدر نتكلم ومحتاجين نبطل ضحك علش...
في التأني الندامة وفي السرعة السلامة ! نهاد رجب...
views 1853
هل قرأت العنوان جيدا ؟ ان هذا صحيح حق ، وقد تكون هذه الجملة هي الادق على الاطلاق .    ولكن كيف ان التأني يأتي بالاخطاء والسرعة تأتي بالسلامة وت...

Leave a Comment