أسرار النجاح

عن العنوسة اتحدث… للبنات فقط .. من راجل زي أخوكي

 

للبنات فقط .. من راجل زي أخوكي

العنوسة مشكلة تواجه بنات كتير .. بس هل هي فعلا مشكلة ؟
خليني اقولك من واقع معاملتي لناس كتير ، ازاي ديه ممكن تكون اجمل حاجة حصلتلك .

5 أسباب ليه البنت عايزة تتجوز وليه المفروض تبقى مبسوطة وفخورة انها عانس

اولا : انا عايز اتجوز علشان يبقى فيه حد معايا

– المشكلة هنا ان فيه بنات عايزين يتجوزوا (أي حد) علشان يكون فيه (حد) معاهم . وفي الاخر انا بسمع وبشوف حالات اكيد عدت عليكي بتندم فيه الست المتجوزة انها اتجوزت ال (حد ده) ونسمع كام جملة من نوعية

“قطع الجواز وسنينه”
“خدنا ايه من الرجالة”
“منين يجيها لا بتشتغل ولا جوزها بيديها”

مش معنى انك لوحدك انك كده ناقصك حاجة ، البنت اللي لوحدها اما انها حرة جدا ، ومش قصدي حرية هنا انك تنزلي وتتفسحي وتقابلي ولاد .. الحرة حرة دين ، اخلاق ، قيم ومبادىء ، الحرة ممكن يكون ليها مشاريع واهداف تحققها ف حياتها . وسط اي كبت بتكوني عايشة فيه لازم يكون ليكي منفذ تخرجي منه وتشوفي الدنيا ، فيه طريقة او اكتر من طريقة علشان تعيشي حياتك وتكملي ..

لما اتولدتي كنتي لوحدك ، ومحدش كتب عليكي انك هتموتي من غير راجل .. يفرحتك لو اتجوزتي واحد علشان تلاقي فيه حريتك فيكبتك اكتر مما انتي فيه .. يخدعك انه احسن من ابوكي ف وقت انت عارفة فيه انك هتقبلي اي حد وهتشوفيه ملاك لمجرد ان عقلك ملغي عن الحقيقة .

الحرية ملهاش شكل محدد ، والحرية دلوقتي ف ايدك طول مانتي بعيدة عن حد بيتحكم في تصرفاتك وده من حقه على فكرة ، بس لو عرف ان جوازك منه لمجرد انك عايزة تخرجي من دايرة العنوسة ، ساعتها هيخليكي تندمي على اللحظة اللي فكرتي فيها بالجواز ..

ثانيا : امي عايزاني اتجوز وتفرح بيا

اغلب الامهات عايزين يشوفوا بناتهم مبسوطين ، ومتستتين ، عايزين يفرحوا بيهم ويشوفوا عيالهم ، وديه حاجة انسانية جميلة بس انتي عارفة وانا عارف وكلنا عارفين ان لو حصلك مشكلة ، فهتبقى ضد رغبتك ومحدش هيبقى في ايده انه يعوز او ميعوزش ، مينفعش تتحملي طلبات الناس التانيين لمجرد انك عايزة تفرحيهم بنفسك او تحققي أمانيهم .

مامتك هتفرح لما تكوني انتي مبسوطة ، الوقت اللي هتكوني فيه مبسوطة بجد مامتك هتحمد ربنا انك متجوزتيش حد اتحكم فيكي واذاكي بأي شكل او استغل ضعفك علشان يرضي غروره او يفكرك من وقت للتاني .. كلام كله ملوش لازمة ومشاعر سلبية ملهاش نتيجة الا انك هتفضلي عمرك تقولي ياريتني ماكنت فكرت ، ياريتني كنت قولت لأ

مامتك عايزاكي تتجوزي علشان هي مش هتعيش معاكي (ربنا يخليهالك) العمر كله ، فهي عايزة بديل لده ، النتيجة اللي هي عايزاها انها تطمن عليكي ، مش هيفرق متجوزة ولا مش متجوزة ، الاهم انك تكوني مبسوطة ومكفية نفسك ، انها تتأكد يوم عن يوم انك قوية وان شخصيتك كده . وان حياتك احسن بالطريقة ديه . علشان كده انتي اللي المفروض تطمنيها وتقنعيها انك كده افضل بس قبل ماتعملي كده لازم انتي الاول تكوني مقتنعة بكده.

ثالثا : عايزة البس فستان الفرح وابقى مبسوطة

اجمل شعور ف الدنيا ان البنت تنزل تشتري قماش الفستان ، انها تفصله ، انها تلبسه وتتجوز ، وبتكون فرحانة جدا ف يوم فرحها ، بس انتي عارفه ايه اللي بيحصل ف الفستان بعد كده ؟ نفس البنت ديه بتعمل فيه ايه ؟

ببساطة بتبيعه !!

اغلبهم بيبيعوه .. طبعا النقطة هنا مش قصدي بيها الفستان بالتحديد ، بس اقصد بيها الفرحة المؤقتة اللي علشانها ممكن واحدة تبيع نفسها للشيطان علشان تشوف نفسها بالفستان .. فستان جميل وفيه كرانيش بس لما بتغير الفستان حياتها مش بتكون هي هي ، بتكتشف ف النهاية ان الساعتين اللي هي قضيتهم بالفستان قصادهم سنين بؤس ويأس هيا وصلت نفسها ليهم بسبب انها عايزة تتجوز (أي حد) علشان تلبس الفستان وخلاص.

دول حتى عملوها فيلم افتكر ، اللي هو “عمو عزيز” لو فاكرينه

ميبقاش فرحتك متعلقة بحاجات تافهة ، او بلاش تافهة خلينا نسميها حاجات صغيرة ، هو ايه اللي خلى الفستان حلم كل بنت الا المعتقدات والقيم المرتبطة بيه ؟!

بشكل مجرد فالفستان قماش بتلبسيه بشكل مؤقت علشان تدخلي من خلاله لدنيا مطولة شوية مع حد ممكن بسببه تولعي ف الفستان ده بعدين .

متتجوزيش علشان تكوني مبسوطة ، لو انتي مش عارفة تكوني مبسوطة لحالك ولوحدك ، صدقيني ماهتبقى مبسوطة بعد الجواز ، الموضوع مش هيعدي يومين تلاتة ، اسبوع او شهر حتى من المحاولات المستمرة ف انك تبقى مبسوطة وتحافظى على اد ماتقدري على سعادتك لحد ماتكتشفي ان مفيش سعادة ولا حاجة وانك محلك سر .

رابعا : عايزة اشوف عيالي

ومين قالك انهم عايزين يشوفوكي ؟
ومين قالك انك هتكوني مبسوطة بيهم ؟

يمكن اكون غريب ف تفكيري او على الاقل نشات ف مجتمع شوية كده بس ليه عايزة تبيعي حياتك لحد مش هيقيمها ويقدرها علشان يستعبدك وبعد كده تجيب ولاد تفرحي بيهم شوية علشان يستعبدوكي هما كمان ويكبروا علشان تحسي طول الوقت انك ضعيفة قدامهم ..

كنتي ضعيفة لما اتجوزتي اي حد علشان متبقيش عانس
كنتي ضعيفة لما كان همك ف انك تلبسي فستان الفرح علشان تفرحي
كنتي ضعيفة لما كان طلبك الوحيد العيال
كنتي ضعيفة قصاد العيال
كنتي ضعيفة وهتفضلي طول عمرك عايشة تحت أمر كل واحد تقابليه لمجرد انك متخيلة ان الواحدة لازم تتجوز وهي عندها عشرين او تلاتين او اربعين او خمسين سنة حتى

الابحاث اساسا اثبتت ان العيل لحد سن معين لو شاف ام اديته شيكولاتة وطبطبت عليه وحبته ومكنتش امه هينسى امه ويروح للتانية ..

ولحد سن تاني هيرتبط بامه الاساسية بس ارتباط شرطي بيعتمد على هات وخد

ولحد سن معين هيبدأ يفكر ف واحدة تانية تحل محل امه اللي قدمت

ولحد سن معين هيبدأ يفكر ف واحدة تانية غيرها .

طبعا الامومة احساس جميل وشيق وهايل ، بس ليه تعيشي تحت امر حد انتي بيعتي حياتك علشان تديله فرصة انه يعيش وف الاخر هيعيش عليكي .

ليه علشان خاطر عيال صغيرين ممكن تضيعي حياتك مع حد انتي اساسا مش بتحبيه وممكن يطالبك بحاجات غريبة بحجة انه مش شايف فيكي غير واحدة مستعدة للرضا والموافقة على اي حاجة بس علشان متبقاش عانس.

خامسا : الجنس

يهمك الجنس ؟

لو أه ، فده شىء صحي ، وطبيعي ومش هنتغاضى عنه ، بس لو واحد اتجوز واحدة عانس ، هو كمان هيكون عدى السن المفروض ، تخيلي لو بعد موافقتك على كل ده اتجوزتي واحد ضعيف جنسيا او عنده مشاكل ؟

انا متأكد ان فيه بنات عايزين الجواز لدرجة ان الكلام ده ميهمهمش بس لو انتي فاكرة ان الموضوع ده مش هيهمك تبقى بتظلميه معاكي . وبتظلمي نفسك اكتر وبتعرضي نفسك لفتن اكتر بكتير من اللي انتي فيها دلوقتي .

اللي بيخليني اقولك الكلام ده ان واحدة زي جنيفير انيستون الممثلة المعروفة اتجوزت وهيا فوق الاربعين ، وكانت ناجحة جدا ، وتشوفيها تحسيها اصغر من بنت ف العشرينات هنا ف القاهرة . انا  عارف انها لعبت وهيا صغيرة كتير انها قضت حياتها .. بس اديكي بتقولي “قضت حياتها” فمش فارق معاها .. يعني ممكن نتفق ان الموضوع موضوع حرية ، ديه واحدة حريتها كانت اغلى حاجة عندها ، فاهمة انها حتى لو اتجوزت واحد فاهم وعارف ومقدر فمش هتقدر تكون بكامل حريتها طول الوقت .. واحدة قررت انها تشتري نفسها علشان لما تقعد مع نفسها تكتشف انها عملت وحققت حاجات كتير اوي ف حياتها .. وف النهاية اتجوزت بس المرة ديه بمزاجها .

اتجوزي بمزاجك ، العين ملهاش تلاتين لازمة لو كان العقل اعمى

متتجوزيش وخلاص زمن حريم السلطان انتهى ، زمن الجواري والعبيد راح ، مترجعيهوش ، مفيش اسهل من سي السيد ، مفيش اسهل من انك تصنعي سي السيد ف واحد ميستاهلش يكون سايس مع احترامي ليهم .

حريتك أغلى مافيكي ، وما ليكي ، ربنا ادهالك ، متضيعهاش على حد مش هيعرف يقدرك ، سكند هاند او خرج بيت ، اوعى ، مهما كان سنك او طولك او شكلك اقسم بالله لسة قدامك فرص اد كده علشان توصلي لاهداف تخلي اللي متجوز أميرة يبدأ يفكر فيكي ويحلم بيكي .

اتجوزي واحد تفرضي عليه يعاملك باحترام مش تطالبيه يبقى بني آدم .

انا طبعا عارف ان ممكن يكون حظك حلو وتلاقي حد سوي ونصيبك يكون افضل من الافتراضات اللي كتبتها ف المقالة ، بس برضه مين عارف ، وليه تجربي ، الراجل لما بيكبر بيبقى صعب يتطوع على حسب الشخص اللي معاه وكل مابيكون صغير كل مابيكون فيه فرصة ليكم انكم تظبطوا دماغكم على بعض ، بس مدام الفرصة مجاتش ومضطرة تتجوزي واحد اكبر منك او ف سنك علشان تنقظي موقف فعلى الاقل لما تختاري تختاري حد يكون شبهك حتى لو عديتي الخمسين . الناس ممكن تقول عليكي مجنونة بس صدقيني محدش هينفعك بعدين .

خدي المقالة ديه وزودي النقاط اللي تحبيها وكل ماتبقى متضايقة اقريها تاني ، وكل مرة تخرجي احسن من المرة اللي قبلها .. دلوقتي شوفي انتي ف ايدك ايه ومعاكي ايه ، وتقدري تعملي ايه وكملي ..

ولو حد قالك “ضل راجل ولا ضل حيطة” ابتسمي بين نفسك واعرفي ان حد اشتراها واوعى تقرري تبقى زيها ف يوم من الايام .

وف النهاية افتكري : لا تجاهد الناس لتثبت انك على حق ، فالحق يعرف بالمواقف ..

دوري على الانترنت وشوفي اللي فكروا زيك حصلهم ايه .. الحقي نفسك وعيشيها بدماغك 🙂

اشوفك على خير

نهاد رجب
اول مدرب عربي لفن الاقناع والتأثير النفسي بالتنويم الضمني
مدرب ومعالج بالتنويم الايحائي

للحصول على كورسات المدرب نهاد رجب يمكنك زيارة هذا الرابط :
http://www.facebook.com/events/275509339225939/

مقالات مرتبطة

لما بفكر في كم الاعتقادات اللي كانت عندي واتغيرت...
views 999
لما بفكر في كم الاعتقادات اللي كانت عندي واتغيرت والقناعات اللي اتبدلت وبتفكر في واقعي ساعتها لما كنت مصدقها بكتشف ان كل إنسان بيقيس الدنيا على نفس...
تخلص من المشاعر السبية بالتحكم في اهواءك .. نهاد ر...
views 973
تحكمك في شهواتك ، تحكمك في نفسك والبعد عن الضعف قصاد المحرمات او الملذات ، هو في حد ذاته بيضمنلك النجاح في اي مشكلة نفسية بتواجهها . فلو كنت على سب...
شيل السبت من الطريق ل نهاد رجب...
views 901
  معدي النهاردة من شارع ضيق ، فيه على اول خضري (بياع خضار)  سايب حاجته برة وفيه (سَبت) فيه خضار سادد الطريق على عربية نص نقل كانت بتحاول تعدي...
انا المراقب ، انا المراقب انا المراقبة...
views 928
i'm the observer , the observed , the observation انا المراقب ، انا المراقب انا المراقبة راقب افعالك تتغير زي مابيتغير تنفسك لما بتراقبه راقب نفسك...
خطورة الكلمات مقالة ل نهاد رجب...
views 1251
خطورة الكلمات هل تفكرت يوما فيما وصل اليه الكثير منا من ظلم وفشل وامراض نفسية ؟ هل لاحظت ان هناك علاقة وطيدة بين ما نقوله وما نحن فيه ؟ يقول ال...
وقف الكالاكس وامشي بهدوء #نهاد_رجب...
views 2520
  ماشي في الطريق الكالاكس بتاع العربية اختفى .. مات مشيت حسيت احساس واحد محبوس في اوضة ازاز وعمال يصرخ ومحدش سامعه ده خلاني امشي بالعربية بر...
تعلم لغة كاملة اثناء نومك ! التعلم نائما وطرق التأ...
views 10182
اهلا بيكم ، انا نهاد رجب اهلا ومرحبا بيكم في حلقة جديدة من حلقاتي على اليوتيوب ، والنهاردة هكلمكم عن موضوع ممكن يكون غريب بس مؤخرا الابحاث الامريكية ...
الطريق الى حل أعقد المشكلات … مقالة ل نهاد ر...
views 1795
  موضوع اليوم في غاية من الغرابة ولكنه قد يحل حتى اصعب واعتى المشكلات التي تواجهها في حياتك .. انها السخرية .   ستتعلم في هذه المقالة كيف...
القدر وكيف يمكن التنبؤ بالمستقبل ! نهاد رجب...
views 6035
"من كورس فن تحقيق الوفرة" كعادتي كل صباح أنظر إلى إحصائيات موقعي ، فوجدت أن كل ما أقوله للناس حول نظامية الأقدار ، لم يكن تنظيرا ولكنه الآن وأمام ع...
الوعي الجسدي ؟! ماهو وكيف يفهمك جسدك وكيف تصل للوز...
views 19730
قام شستر ، عالم النفس الشهير بالحديث عن مايسمى بال BC او وعي الجسد ، فلقد أثبت شستر أن أجسادنا ماهي الا أجهزه ريسيفر تقوم بالتفاعل معنا كما ولو كانت ع...

Leave a Comment