أسرار النجاح

خمس طرق للتغلب على ذكرى الحبيب

 

مشاعر جميلة بس بتإذينا لما تكتشف انك لسة بتحب واحد / واحدة بس مفيش فرصة علشان ترجعوا لبعض تاني ، انك تدخل في علاقة لفترة كبيرة وفجأة تكتشف ان الطرف التاني قرر يمشي او ان الحياة اتفرضت عليكم بشكل جديد ولازم تقبل الشكل ده غصب عنك .. ساعتها بتنسى الحب بس بتفتكر العشرة الي بينكم وبتبدأ تتعب لان عقلك مش مستحمل يفكر في حاجتين متناقضتين في نفس الوقت وهما انك تفتكر بمشاعر وحب وتحتاج وفي نفس الوقت ترفض علشان كرامتك او ظروفك او اي سبب تاني .

كتير ناس كانت بتكلمني علشان يلاقوا عندي الحل ناس كانت بتستريح وناس تانية كانت بتحكي علشان برضه تستريح ، كتير الاقي ناس بيطلبوا مني ينسوا الطرف التاني . ودايما كنت بقول ان مفيش حد بينسى ومينفعش اننا ننسى ، بس كل الي نقدر نعمله اننا نفتكر بشكل مختلف . باحاسيس مختلفة وقعها اقل علينا وميزتها انها بتقوينا اكتر وبتسعدنا اكتر وبتريحنا بشكل مختلف .. العقل البشري اتصمم علشان مينساش بس كل الي اقدر اقولهولك اني كنت هناك ، في نفس المكان الي انت فيه انا وغيري كتير اوي وكنت بحكي وبتكلم وبزعل وكان الدنيا خنقاني ولا عارف اكل ولا اشرب ولا اذاكر او اتقدم واتعلم بس كل الي انا عارفه دلوقتي انا الحياة لوز واني لسة فاكر الشخص القديم بس ببتسم لما افتكره وساعات بضحك . لو ده الي انت عايز تحس بيه ، خليني اقولك قصة .

في اليوم الي عرفت فيه ان خلاص الدنيا قررت تقف قصادي وتمنعني عنها ، حسيت ساعتها اني عملت كل حاجة ممكن تتعمل ونمت وصحيت تاني يوم علشان ابدأ اخد حقي من التعب والاكتئاب الي انت عارفهم، معرفتش اعمل اي حاجة في حياتي وكنت بمشي وكان الارض على كتفي والي ضاعف الموضوع ان البنت كانت بتحاول دايما تنرفزني وتوريني نفسها فرحانة ومبسوطة وكإن شىء لم يكن ، والغريب اني حاولت وفكرت وتعبت علشانها بس فجأة جيه قدر ربنا واختار لكل واحد فينا قصة جديدة وقصتنا انتهت بعلامات تعجب من ناحيتي ونقطة كبيييييرة من ناحيتها .

روحت الصيدلية في اليوم ده ، اسمها ماجد ونبيل في سعد زغلول ، وقابلت الدكتور ، صاحبي فدخلت عليه وقولتله انا عايز حاجة للاكتئاب لاني مش عارف اكل او اذاكر وكده … ابتسم وقالي براحة وبصوت خفيف “مشكلة عاطفية مش كده ؟” ، وشي احمر واتكسفت وقولتله اه “بصوت واطي” – لاقيته انفجر فجأة وقالي (وسط الناس) ” سيبهااااااااا دول ولاد *** ميستاهلوش ” ، حسيت اني عايز احط اقرب انتي بيوتيك عنده في بوقه ولاقيت الناس وكانها بتبصلي بشفقة و” ياحرااام” ، وقعد يكمل كلامه وحسيت اني عايز اجري ، لحد مالاقيت واحد قاعد في الصيدلية ، شاب بيقولي يبني “نص شباب مصر دخلوا في الحوار ده ، سهلة ، وداويني بالتي كانت هي الداء” وديه هي اول طريقة

أولا : وداويني بالتي كانت هي الداء

مشيت من الصيدلية وانا متنرفز ومخدتش من عنده حاجة وفي دماغي ، ايه التخلف العقلي ده ، وداويني بالتي كانت هي الداء ازاي يعني ، اعرف واحدة علشان انسى التانية واقعد اغني ليه ياقلبي كل يوم تحب واحدة ، مش انا ، دانا المبادىء والقيم ..

براحة علينا ياشيخ ، سواء كنت مقتنع بده او لا ، صدقني عن خبرة ، اول اسهل طريقة علشان تنسى بيها حد هو انك ترتبط بحد جديد .. تعالى اقولك علميا ايه الموضوع ..

بتشرب سجاير ؟ “يارب تكون بتشرب سجاير لان ده اسهل مثال اعرفه” بس فرضا بتشرب سجاير ، كل مرة بتشرب فيها سيجارة العقل البشري بيكون خيط في عقلك بيسموه “الرابط العصبي” بيبقى حاجة دقيقة اوي ، كل مرة بتشرب فيها سيجارة بيقوى الرابط اكتر واكتر لحد مايبقى “مجازا” حبل ، ييجي واحد يقولك انا بقى هبطلها ، عقله هيقوله لا ياحمادة مش هينفع ، انت عودتني على الحبل ده ، هفكرك بيه كل شوية وهطلع عين اهلك الا اذا …

ايه ؟ انك تديني بديل .

البديل انك توجد عادة جديدة تقفش فيها اول ماتسيب السجاير وكانك بتدي اشارة للعقل انك عايز ديه بدل ديه ، العقل هيفهمك ويبدأ يحط مشاعره في الشىء الجديد وشوية شوية هتكتشف ان الموضوع القديم بيختفي لوحده والحبل بيضعف .

وديه فكرة داويني بالتي كانت هي الداء ، دور على بديل ، ممكن تبقى بنت او شغل او عادة جديدة حتى ، لان الي انت كنت فيه كان تفاعل كيميائي بينتج عنه مشاعر ما ، جيه حد قالك مش هينفع تعملها تاني ، عقلك مش هيفهم ده هو لسة عايز التفاعل الكيميائي لانه اتعود عليه فاول طريقة انك تديله بديل من خلاله يحصل على نفس المشاعر القديمة .

روحت بيتنا ، وانا قرفان من عيشتي ونفسي انها تتكلم وتقولي ان الكلام ده كله محصلش وانها مستعدة ترجعلي تاني ، بس للاسف الكلام ده مبيحصلش الا في الافلام ، وغالبا منعوه ، فتحت الكمبيوتر ولاقيت كل الصور الي كانت بيننا وقعدت اتفرج عليها وانا زعلان ومتضايق ، شوية لاقيت النور اتطفى وطلعلي عفريت ، بيقولي شوبير لوبير ، الماو بين ايديك ، اتخضيت طبعا وقولتله انت ياعم انت قالي انا مخنوق منك ، قولتله ليه ؟ قالي يبني لما تعوز تنسى واحدة ، متتفرجش على صورها وتخنق امي .. احرق كل حاجة ..

الطريقة التانية : اتخلص من اي شىء مشترك 

فكرت في بالي ، ” احرق كل حاجة ؟ ده عبيط ده ولا ايه ؟؟ ” ، المهم انه اختفى ، بس خليني اقولك على سر ، اهم خطوة عندك هي انك حرفيا تتخلص من كل حاجة بتفكرك بيها / بيه حتى لو كانت بسيطة ، وبالتنويم الضمني الفكرة كالاتي ، العقل البشري بيفكر بالصور ، واي حاجة عندك مرتبطة بيه هي عبارة عن صورة حتى لو كانت مسموعة ، عقلك بقى هو ملوش فيه وميعرفش حوار انكوا سبتوا بعض ، هو هيستمر في تقوية الحبل الي بينكم اكتر واكتر ، لمجرد انك بتديله ايحاء بكده ، خد بالك ، هو بيحبك وهيقربك اكتر من الي انت عايزه ، فلو عايز تتغلب على المشاعر ديه وحس انك جاد هيلغيها ولو حس انك لسة عايزها هيديك امل ، وهيبدأ يعيشك وهم جديد منه انت هتتعب اكتر واكتر ، فالطريقة التانية والغريبة انك تجمع كل حاجة كل ورقة مكتوب عليها بحبك وقلب وحركات سبيس تون ديه وتحرقها حرفيا شوفها وهيا بتتحرق قصادك ، ماتبلطجش وتقول انا هحتفظ بصورتها ، صدقني ولا ليها لازمة وشوية شوية هتوصل للي انا فيه وتحس انك كنت بتحب في قرد ، ارمي كل حاجة ، مجرد انك تشوف الحاجة بتتحرق قصاد عينك ده اقتراح مباشر لعقلك انك عايزه يحرق الملفات المرتبطة بيها من دماغك . وكمان هيقلل من نسبة تذكرك للشخص ده من وقت للتاني .

شوية وانا قاعد بعد العفريت ما مشي ، وحصلت مشكلة ، ياترى انا هحضن مين دلوقتي ، أوباااااا ، سوري لو انا ابيح شوية ، بس خد بالك معايا ، العلاقات الي صعب بجد انك تنساها هو الي دخل فيها قلة ادب وعلشان تنساها حاول تشوف حلمة ودنك

الطريقة التالتة : شوف حلمة ودنك 

انا مش بهرج على فكرة ، فعلا صعب جدا انك تنسى بنت او ولد حصل بينكم تلاقي عاطفي ما حتى لو بسيط ، وانت فاهمني يابرنس ، بس انت الي جبته لنفسك على الاقل اتعلمت منه انك متعملش كده تاني بس خليني اقولك ان عقلك عليه ضغط دلوقتي ، الشهوة والمشاعر ، هتقولي لا لا انا معنديش شهوة ؟ هقولك لا حبك اساسا حب شهوة مش اكتر ، عقلك بدل مايعمل حبل واحد بقى فيه حبلين ، وكل انسان عنده شهوة انت كنت بتخرجها بالطريقة ديه ، فلو حصل ان العلاقة انتهت هتتعب اكتر ، لان الشهوة اقوى من الحب حتى لو كنتوا روميو وجوليت ، ومع ذلك عندك حلين ، أولهم انك تصلي وتتوب ، لانك بصلاتك انت بتدعي ربنا يثبتك ويهديك وبصلاتك انت كانك بتهيىء نفسك انك تتخلص من الافكار الي بتخليك تفتكر جسمها او شهوتك ، والصيام والصلاة والروحانيات هما اكتر الحاجات الي ممكن تخليك تتخلص من الشهوة ، اما الحل التاني ، فهي انك تحب نفسك ، ببساطة لو عايز تتغير حب نفسك ، واثبت مكانك ، انا مقصدش انك تبوس نفسك في المراية ، لا ، حب نفسك يعني حط في دماغك فكرة وكررها “انا اهم عند نفسي من اي حد تاني انا مش مهم عنده ” وبالشيعبي “الي ميحطكش كحل في عينه متحطوش نعل في جزمتك” ، حب نفسك ، هتلاقي نفسك لوحدك بدات تختار لنفسك اختيارات افضل لانك لو ام بتحب ابنها هتختارله الاجمل في الدنيا وصدقني فيه دايما احسن سواء شوفته او لسة هو موجود بس اسمح لنفسك انك تلاقيه وهتشوفه قدامك . حب نفسك هتلبس كويس ، حب نفسك هتاكل اكل نضيف ، حب نفسك هترتبط باجمل بنت / ولد في الدنيا ، حب نفسك شهوتك مش هتروح لاي حد الا في وقتها وللشخص المناسب.

بعد شوية قولت مفيش غير اني اروح انام بقى ، نمت حلمت بيها وانا شايل سيف ولوني اسود واسمي عنترة واسمها عبلة ، وبقولها :

ولقد ذكرتك والرماح نواهل مني وبيض الهند تقطر من دمي .. ياعبلتي محبوبتي نفسي انسى اهلك خنقتيني

لاقيت ابوها جاي بيقولي يابني انت لو عايز تنساها قولها بشكل تاني ..

الطريقة الرابعة : قولها بشكل تاني

صحيت من النوم على وش ابوها ، ناقصك انا ، وبفكر اقولها بشكل تاني ازاي يعني وهنا خليني اقولكم على فكرة بمليون جنيه ..

اتكلم عنها كتير ، شوفت ياعم انا بريحك ازاي ؟ اتكلم عنها زي ماتحب ، وقول فيها قصص ، بس جرد كلامك من المشاعر وهتكتشف شعور غريب جدا ..

العقل البشري بيتأثر بالكلام ، لانه بيحوله لصور وعلى اساسه بيتصرف ، فلو انا قولتلك ان “الواد مات” غير لما اقولك “ان الطفل الرضيع اتحرق وبقى رماد” ، او لما اقولك ان “مقتل 5 عناصر فلسطينية” غير لما اقولك “مقتل طفلين وتلات عواجيز” ، الاولى بتخلى العقل يتعود ويحس ان الكلام عنها عادي وانها شخصية عادية في حياتك حتى لو بتتكلم عن موقف رومانسي الاهم انك تفصل عن كلامك المشاعر ..

لما فرضا بتتكلم عنها بدل ماتقول انا كنت بحب بنت، قول “انا كنت مرتبط بواحدة”

احساس مختلف تماما، لما تقول البنت كانت زي القمر غير لما تقول “اها كانت حلوة” او “اه وشها كان مقبول” انت بتقول نفس المعلومة بس بطريقة مختلفة في الكلام هتلاقي من خلالها انك مع الوقت عقلك هيبعدها عن تفكيرك لان عقلك بيقفش في الحاجات الي ليها تأثير وبيكبرها جواك ، والمرحلة الاكبر في الطريقة ديه انك تحكي حاجة عنك ومرتبطة بيها تكون حزينة جدا بس بكلام مجرد من المشاعر من غير ماتنقل لحد اي احاسيس ..

يعني مثلا ، لو انت بتحبها اوي ومش قادر تنساها :

بدل ماتقول : اانا بحلم بيها وبشوفها كل يوم مش قادر انساها صورتها في عيني وبحبها وقلبي لما يسمع اسمها بيدق وبحس كان الدنيا كلها بتظلمني وبموت لما اعرف اني مش هترجعلي في حضني تاني”

قول : اها واحدة كنت مرتبط بيها ، بتيجي على بالي وقلبي بيرمرم وعنده مشاكل معاها ، اسمها عام شوية فكل ماهرش اسمعه ، ساعات بتوهم ان الدنيا كلها ضدي وبتضايق لما اعرف انها مش هترجع هنا تاني”

فرق بشع ، بس تأثيره قوي جدا مع انك بتذكرها بس عقلك عنده مهمة جديدة وهي انه يعدل الحبل الي بناه ليها او ليه ويبدأ يضعفه ويخليه على مستوى كلامك عنها ..

الجزء التاني من قولها بشكل تاني ، هو شوفها بشكل تاني ، تعالى نلعب لعبة وتفسيرها هياخد وقت بس انت لو دورت هتعرف تفسيرها نفسيا لوحدك ..

غمض عينك ، وفكر فيها ، استنى ، غيرها ، عقلك ميعرفش الفرق بين الحقيقة والخيال ومستعد انه يلعب معاك لعبة جديدة ، غير الصورة وحطلها ملامح مختلفة ، خليها تخيييييينة اوي ، وشوفها ، افتح عينك ، غمض عينك تاني وشوفها تخينة ، كرر العملية كذا مرة وكل مرة حطلها تفاصيل مختلفة ، يعني كبر ودانها ، مناخيرها او مناخيره ، حطيله مكياج ، حطلها احمر وروج ، بهدليه وبهدلها ، غمض وفتح وشوف تاني وتالت ، هتضحك ، كرر العملية ديه 10 او 15 مرة حتى ، وكل مرة ضيف حاجة هبلة ، لبسيه شورت واعمليله رجل معيز ، لابسها طربوش وتخنها وركبلها شنب وشوفها بتجري عليك وبتقولك بحببببببببك والارض بتتهز وانت عمال تضحك، وفتح وغمض تاني وهكذا ، لو عملت كل يوم الموضوع ده لمدة 5 دقايق هتكتشف انك كل مرة تشوفها هتضحك او كل مرة هتفتكرها هتضحك حتى لو مفتكرتش من الشكل بس عقلك هيديك ايحاء ان الموضوع عادي .

ولما صحيت من النوم وقومت فطرت قولت اقعد مع جدي الي قالي حكمة اخيرة وقالي اعمل كل الطرق ديه وابني نفسك واشترك ..

الطريقة الخامسة : اتعلم منها وابني نفسك واشترك

في النهاية احب اقولك ان ديه كانت اهم طريقة بالنسبة لي ، أحب نفسي واشترك ، فيه واحد اعمى او معاق مشلول مثلا ، بالنسبة لك هو صعبان عليك ، بس بالنسبة لنفسه هو عايش حياته وده انسب حاجة ليه ، لان باعاقته هو بيشترك في مسابقات وبيحصل على حاجات انت متقدرش تعملها وانت بتمشي على رجليك ، فاين كانت التجربة ، او اين كان الي انت فيه اعرف دايما انك ممكن تستخدمه لصالحك علشان تبني وتكمل وتتعلم وتحول طاقته السلبية لطاقة ايجابية تحفزك علشان تعمل حاجات جديدة مهمة في حياتك . ديه فرصة ليك ، انت بتتواصل مع عقلك وجسمك وعندك مشاعر قوية والعقل زي ماقولتلك مبيفرقش وميعرفش ، ذاكر وانجح ، النجاح احسن طريقة للرد ، خد الطاقة ديه وحطها في حاجة تانية ، صدقني مفعولها كالسحر ، اما بالنسبة لاشترك فده معناه انك تنزل تشوف ناس ، شوف الشارع شوف اشكال جديدة ، روح النادي ولو زي حالاتي فروح ندوات ومسرحيات وجوامع اسمع دروس واتعلم من عزة الرجال في زمن الشهادة ، هتكتشف انك مبسوط اوي لانها سابتك ياريتها تسيبك كل يوم علشان تكتشف نفسك

ودلوقتي الحمد لله بعد ماطبقت الطرق ديه ، حياتي اتغيرت 180 درجة ، انا مكنتش هكتب كلمة في المقالة ديه الا لو كنت فعلا عملت حاجة في حياتي ، والحمد لله انا بجهز لشركتي وبجهز اوراقها ومعتمد من وانا عندي 18 سنة في التنويم الايحائي ومعايا شهادات من اكبر المدربين في مصر وامريكا وروسيا ، واول مدرب عربي في فنون الاقناع والتاثير بالتنويم الضمني وعندي 23 سنة واحب اقولك ان لولا انها عملت كده وبشدة ، مكنتش هعرف اعمل حاجة وكان زماني دلوقتي لسة بحلم والي مبيموتكش اعرف انه لازم هيقويك، حقق انت كمان حلمك وغمض عينك واشكرها ، او اشكريه لانه كان سبب في الي حصلك من خير او الي لسة هيحصل في المستقبل ان شاء الله 🙂

كان معاكم نهاد رجب

مدرب فن الاقناع والتاثير بالتنويم الضمني

موقعي الرسمي

http://www.nihadragab.com

مقالات مرتبطة

خطوات لإثارة إعجاب شريك حياتك بك #نهاد_رجب...
views 11169
نحتاج دائما لإثارة إعجاب شركاء حياتنا لنتمكن من الحفاظ على الحب والود بيننا دائما .. هذا الشعور هو شعور إنساني طبيعي ، ولذلك كان علي أن أوضح لك عزيزي ...
3 طرق خاصة للتخلص من العادات السلبية – لـ نه...
views 6775
هل لديك عادة سلبية وتريد التخلص منها ؟  قد يكون الأمر صعبا ، في حقيقه الأمر هو صعب ، فقد يتطلب بناء عادة ما أسابيع من الاستمرار أو أيام او حتى في ب...
الطريق الى حل أعقد المشكلات … مقالة ل نهاد ر...
views 1795
  موضوع اليوم في غاية من الغرابة ولكنه قد يحل حتى اصعب واعتى المشكلات التي تواجهها في حياتك .. انها السخرية .   ستتعلم في هذه المقالة كيف...
تعلم لغة كاملة اثناء نومك ! التعلم نائما وطرق التأ...
views 10175
اهلا بيكم ، انا نهاد رجب اهلا ومرحبا بيكم في حلقة جديدة من حلقاتي على اليوتيوب ، والنهاردة هكلمكم عن موضوع ممكن يكون غريب بس مؤخرا الابحاث الامريكية ...
الإغواء – نهاد رجب
views 4766
  الإغواء هيا الكلمة الوحيدة اللي يفهمها كل الناس بنفس المعنى او بمعنى مشابه ، هيا الكلمة اللي الناس بتتفق على معناها مع طفل صغير بيصورها على ان...
الوعي الجسدي ؟! ماهو وكيف يفهمك جسدك وكيف تصل للوز...
views 19727
قام شستر ، عالم النفس الشهير بالحديث عن مايسمى بال BC او وعي الجسد ، فلقد أثبت شستر أن أجسادنا ماهي الا أجهزه ريسيفر تقوم بالتفاعل معنا كما ولو كانت ع...
لا تسعى لأن تكون الأول .. لا تجعل هذه الخدعه أن تخ...
views 7009
نريد أن نكون الأول في كل شىء لقد أخبرونا بهذا عندما كنا أطفالا ، تم تشجيعنا لنصبح الأوائل ، وزرعوا في عقولنا أن النجاح هو أن تكون الأول في ما تدرسه...
بلاها منطق وعيشها بدماغك مع نهاد رجب...
views 3103
  النهاردة كنت بعمل القهوة ، وكل ما كنت بصب القهوة في ايدي كانت بتدلق مابين صوابعي . وبتقع على الارض .    انا عارف انت بتفكر في ايه ، واي...
تقنية الهوبونوبونو وتحقيق التوازن النفسي ل نهاد رج...
views 13302
طريقة رائعة للتخلص من التوتر والقلق بخصوص المشكلات الحالية وتحقيق التوازن الداخلي والسلام .. ال ho'oponopono الهوبونوبونو .. الهوبونوبونو هي تقنية من...
اتريق قبل ما حد يتريق عليك
views 4477
  اتريق قبل ماحد يتريق عليك مقالة جديدة لنهاد رجب من فترة اتكلمت عن كسر المعارضة وازاي تقدر تغير طريقة تفكير حد لما يلاقيك بتفكر زيه وكانت...

Leave a Comment