خواطر وأخبار نهاد رجب

التخلص من الاحبال والمعوقات بالتحرر

 

ربنا عز وجل بيديلك ثقتك بنفسك ، بيفهمك انك تقدر تفكر ، تقدر تعرف بنفسك ، تقدر تبص حواليك وتستنتج ، لانه مخلقكش عالة على حد ، خلقك من روحه ، متساوي مع الباقيين في أحسن تقويم ، هتأتيه “فردا” وكلنا في النهاية هنعدي على جهنم في “وإن منكم الا واردها كان على ربك حتما مقضيا” ، ربنا عز وجل مستثناش حد .

 

انك تعيش بمنطق التبعية من غير ماتفكر فانت يا صديقي بتضيع وقتك وحياتك بتضيع ، مع احترامي لكل علماء الدين والمفسرين ولكل الآباء والامهات اللى حاطين نفسهم في موقع المفسر الاعظم لكل حاجة ولأي حاجة، بس فيه فرق بشع بين “تفسير القرآن” ، او “تفسير المواقف الحياتية” وبين “تفسير الحياة الخاصة بشخص” ، ان الشخص يفتكر نفسه لعبة في ايد الناس او مبيتحركش غير بأوامر منهم وباللي هما شايفينه صح ومتخيل انه بالشكل ده هيدخل الجنة ، فكده يا عزيزي انت في موضع لا تحسد عليه .

ربنا عز وجل ادالك كل الحرية انك تفسر حياتك ، انك تشوفها زي مانت عايز تشوفها ، وفي نفس الوقت لو مش فاهم حاجة ، ربنا عز وجل بيقولك اسأل

“وإسألوا اهل الذكر ان كنتم لا تعلمون”

انا تفسيري الخاص بعقلي المحدود للآية ديه ان الاصل في الموضوع اننا “نعلم” واهل الذكر كانت في المرحلة التانية ، يعني “لو انت مش عارف اسأل الناس اللى هما مين ؟ أهل الذكر” يعني في البداية إسأل نفسك .. لو انت مش عارف .. إسأل.

وربنا عز وجل قال ” قل سيروا في الأرض فانظروا كيف بدأ الخلق”

شايفين الرحمة ؟ واخد بالك من ازاي ربنا بيحثنا على اننا نبحث ونستكشف ونفهم ونتعلم ونعرف ولو مفهمناش ، نسأل !؟

بس طبعا في الامور الواضحة ملناش اختيار ، يعني منجيش لحكم السرقة ونستكشف هي السرقة حرام ليه ، فيه حاجات قاطعة ربنا عز وجل قالنا الامر فيها فملناش اختيار في استكشافها

“وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم”

وانا حابب ان ده يكون ديني ، ديني اللى بيحثني على اني استكشف ، ادور ، افهم ، اعرف ، بيديني ثقتي في نفسي ، بيفهمني اني بني آدم .. ومش بقصد بديني هنا اسلامي فقط ، انا قصدي حياتي كلها كده ، طريقة تفكيري بشكل عام .

جرب تختلف مع حكم ، جرب ، يعني جرب مثلا تدور على رأي مخفف عن الحجاب او عن النقاب او عن الموسيقى مثلا ، او حتى اطلاق اللحية ، يا ربي على الهجوم اللى هيجيلك ، واشهر التعليقات هتكون من نوعية “انت معالج تنويم بالايحاء خليك في مجالك وخلي الدين لناسه” ، او “وانت ايه حشرك” او لما تيجي تتكلم عن العادة السرية وتفهمهم ان فيه اراء مخففة في حكمها تلاقي هجوم من كل حدب وصوب لناس مش بس بتتهمك انك اتجننت ديه بتتهمك انك بتمارسها وعايز الناس تبقى زيك ؟!

ولما تحاول بس انك تفكر ، تلاقي اخ بيقولك “العالم الفلاني قال كذا” هو انت فاكر نفسك هتفهم زيه ؟ ياعمي انا مش هفهم زيه اكيد بس قصاده العالم العلاني قال كذا ، يقولك ده كان عالم مش مظبوط وكان بيحلل الموسيقى “ابن حزم” !

ولما ابن حزم يقول حاجة موافقة لفكر العلماء اللى منتمي ليهم ، تلاقيه قدس ابن حزم وعلى من شأنه ، ولما العالم اللى بيحبه يقول حاجة مخالفة لافكاره يقولك ايه ياعم وفيها ايه ده اجتهاد وليه ثواب على اجتهاده ، او يقولك هو نبي يعني ، ايه المشكلة لما بيغلط ؟! ولما تغلط انت ، ميسمحلكش ، لاني مش عالم ، او في حقيقة الامر انا شكلي مش شكل العلماء ، يعني فين الجلابية ؟ فين الدقن ؟ فين السن الكبير ؟ فين استشهادك بفئة معينة ومجموعة معينة من العلماء اللى ان شاء الله ربنا راضي عنهم ؟!

ولو مثلا كلمك هيقولك انت المفروض تقصر الجلباب ، ومرة واحدة تسمع ان صحابي جليل مكنش بيقصره ، او الرسول اداله تصريح انه ميقصروش ، فتقوله اشمعنى سيدنا ابو بكر ؟ فيقولك ياعم هو انت فاكر نفسك هتبقى زي سيدنا ابو بكر ؟!

وتعيش متلخبط ، دماغك بتخبط في مليون باب ، انا ايه طيب ؟ يجيلك صوت من كل الاتجاهات يقولك انت ولا حاجة ، ويربطك بقول فلان وعلان (سلام الله عليهم جميعا)

تيجي تتنفس ، يقولك لا نفسك منهم ، تتكلم ، يقولك لا كلامك لازم ميخالفش كلامهم وتكتشف ان هما نفسهم كلامهم بيخالف بعضه وتتكسف تقول حاجة علشان محدش يزعل منك .

وتلاقي واحد بيعلي صوته بالالحاد ، او بمعنى تاني بصراحة هو قطع الحبال اللى بتربطه مش اكتر ، وتلاقي ملايين المهاجمين ليه ، انت كافر ، انت مجرم هتروح النار ، واللي يضحكك انك تلاقي حد بيكلمه بالقرآن وبالسنة ، فتبقى عايز تخبط دماغك في حيطة زيادة ، واحد مش مؤمن بحاجة هتجادله بافكارك ؟ انت لسة مكمل ؟! واحد زهىء من طريقة التفكير اللى بتدعي صحتها وقدسيتها ، هتيجي برضه تكلمه بنفس الطريقة ؟!

والله العظيم كلام كل واحد من كلام العلماء فوق دماغي، بس انا مش كافر والله العظيم انا مش كافر ، انا بعبد ربنا الواحد الاحد الحي الذي لا يموت ، ديني قالي ان منك لله عز وجل مباشرة من غير وسطة ، ديني قالي ان كل يؤخذ ويرد الا من صاحب هذا القبر “قبر رسول الله صلى الله عليه وسلم” ديني قالي استكشف واعرف ، ديني قالي اغلط واستغفر ، ديني قالي افهم بنفسك ، ديني مش دين تفرقة ، ديني مش دين ربط وتعجيز ، ديني مش دين جهل او فرعنه او عبادة لاصنام او لميتين او حتى لعيشين ، ديني دين يسر مش عسر ، ديني دين نجاح ، ديني قرآنه بيبدأ ب “بسم الله الرحمن الرحيم” ليه الناس مصر تقنعنا ان ربنا هيولعك في نار جهنم لو كلت بإيدك الشمال ، او لو غلطت وانت بتتكلم مع ربنا ، او خدت راحتك ، طفل صغير بيقول “يارب انا زعلان منك” تلاقي واحد بيخبطه على دماغه وبيقوله احترم نفسك وانت بتتكلم مع ربنا ، او يقول يارب انا عايز عجلة بقى ، يلاقي نفس الخبطة وحد بيقوله متقولش “بقى” .

اقولك على حاجة ؟

انت عارف ان تفسيرك لآية “الخبيثات للخبيثون” ممكن توصل راجل انه يشك في مراته ويخونها لمجرد انه كان تاريخه اسود ؟! لانه فاكر على كلامك ان ربنا بيقول “ان الراجل الكويس بيتجوز ست طيبة والست الوحشة بتتجوز راجل وحش”

انت عارف ان تفسيرك لحديث “افعل ماشئت كما تدين تدان” تفسيرك المخالف لكلام ربنا اللى بيقول “وَلَا تَزِرُ وَازِرَةٌ وِزْرَ أُخْرَى” ديه ممكن تخلي واحد بيعد عن الناس وميتجوزش لمجرد انه خايف بنته لما تكبر حد يتحرش بيها او يعمل معاها افعال غلط بسببه؟!

انت عارف ان تفسيرك لآية ” لا تعتذروا قد كفرتم بعد إيمانكم …” ممكن يخلي واحد غلط مرة انه يكمل في ذنوبه مدام كده كده مش مقبول منه صلاة ؟!

لما بتكلم عن الدعوة وان الدعوة محتاجة حد متخصص بيفهم وان الدعوة الاحق هي الدعوة بتصرفاتنا وبأخلاقنا ، بلاقي مليون شيخ ظهر فجأة وبيهاجمني ازاي بقول كده ، ولما اجيبلهم آيات في القرآن بيجيبولي آيات تانية بتثبت وجهة نظرهم هما ، ولو انا منك اخي الشيخ راجل الدين ، هقول للشخص ان السلوك اللى بيعمله “غلط” قبل ماقوله انه “حرام” ولما يقتنع انه “غلط” ساعتها هفهمه انه “حرام” .

انت عارف بعد فيديو “العادة السرية” اللى انا طلعت فيه وقولت عن اهميتها وف نفس الوقت الاراء اللى مش بتحرمها وقولت ان اغلب الاحاديث الخاصة بتحريمها ضعيفة او موضوعة زي “ناكح اليد يأتي يوم القيامة ويده حبلى” عارف كام واحد بعتلي قالي انه قدر يقلل منها وان اللى كان مخليه مدمن عليها انه كان فاكر نفسه بيذنب ومش عارف يبطل وفي النهاية ضعف وقال مدام كده كده انا فاجر هتفرق ف ايه ، ومش بس كده ، ده بسبب الاحاديث ديه وطريقتك المنفرة وانت بتقوله انها حرام مكنش بيصلي ؟! هيصلي ازاي وهو “ناكح امه” هيصلي ازاي وهو “بيهتز بسببه عرش السماء” زي مانت بتقول!! وانا مش هعمل زيك واتهمك انك بتمارسها انت كمان وجاي تتشطر عليا انا!

انت واحد مصدق انك لو عملت شير لحديث ديني ل 10 هتدخل الجنة ، ولو عملت كومنت هتثاب بحور العين ولو معملتش يبقى الشيطان اللى منعك وهيطلع عين اهلك في جهنم!!

وديني هو “دين الاسلام” يعني الاسلام “ديني” يعني ملكش دعوة بديني وخليك في حالك .

والله العظيم انا ديني حلو ، دين رحمة ، دين سعادة ودين بيحث على العمل ، وعمل العقل ، والله العظيم انا ديني دين يسر ، ودين مشاركة ودين مفيهوش عنصرية او تفرقة ، دين بيأمر بالحب والاحسان وايتاء ذي القربى وينهى عن الفحشاء والمنكر والبغي ، ديني دين صلة بين العبد وربه ، ولكل واحد هيقولي او يقول جوا نفسه “متتكلمش في حاجة مش فاهمها” او هيبدأ يقنعني بقال الله وقال الرسول ، سيبني في حالي ، متعملش لايك ، ادعيلي بالهداية ، ادعيلي اكون زيك ، فاهم كل حاجة وعارف كل حاجة ، بص خليك في حالك يعني .. انا عايز ادخل جنة ، جنة ربنا راضي فيها عني بكل هطلي وفهمي البسيط لدينه ، مش جنة بسبب انك راضي انت عن نفسي لاني اتبعت كلامك مش اكتر .

اطرد التبعية ، متتبعش حد من غير ماتفكر حتى لو ابوك وامك ، انت من حقك انك تفهم ومن حقك انك تعرف بنفسك ، خليك ذكي واتعلم من تجاربهم ، بس اتخلص من ضلهم ، اخرج بقى برة الرحم واقطع حبلك السري ، متربطش نفسك بآراء وخليك نفسك . قول بصوت عالي انا زهئت ، واكسر اللوح الازاز اللى قدامك وعدي ، متخفش ، عدي متخفش ، عدي متخفش ، عدي متخفش

مقالات مرتبطة

أربع مراحل لمعادله الأربع خطوات لحث حاله التنويم ا...
views 303
أربع مراحل لمعادله الأربع خطوات لحث حاله التنويم الإيحائي التنويم الإيحائي هو تقنيه معروفه حول العالم حيث انه افاد الآلاف ممن خضعوا لحاله التنويم ال...
وانت في حاله الجوع 90٪ من احتياجاتك بتكون وهميه ...
views 69
وانت في حاله الجوع 90٪ من احتياجاتك بتكون وهميه اي حالة ذهنيه معدله بتأثر على برامجك العليا اللي بتكون توجهاتك وتفضيلاتك مينفعش تشتري وانت جعان م...
ارضاء الناس حاجة عاملة زي انك تسيب عربيتك ال BMW و...
views 232
ارضاء الناس حاجة عاملة زي انك تسيب عربيتك ال BMW وتروح تركب اوتوبيس في يوم زحمة وحر وعرق . وتكتشف ان الناس بتتخانق معاك علشان مش عارفين يقفوا بسببك .....
الاعتذار للاخرين غير واجب .. الا اذا … من ...
views 80
الاعتذار للاخرين غير واجب .. الا اذا ... من فترة درست تقنيه جديدة كانت عن التحكم واسمها "منطقة القوة" ، الجميل في التقنيه انها كشفتلي نمط سلوكي كنت ...
الى الإمارات ، دبي مبسوط واشتقت جدا للجميلة دبي ...
views 64
الى الإمارات ، دبي مبسوط واشتقت جدا للجميلة دبي ، اشوفكم على خير في كورس خاص ومجموعه جلسات بفندق سوفيتيل داونتاون دبي للتواصل معي يرجى إرسال رسالة...
المعرفة هي البداية والنتيجة للأسف الناس صنفت المع...
views 152
المعرفة هي البداية والنتيجة للأسف الناس صنفت المعرفة كإنها درجة أولى غير أساسية من تحقيق الهدف . لكن المعرفة في أحيان كتير جدا هي الهدف نفسه وبالمع...
هل تبحث عن كل ما هو جديد او مفيد لك لتطوير ذاتك وا...
views 20
هل تبحث عن كل ما هو جديد او مفيد لك لتطوير ذاتك والتخلص من المشكلات ؟ هل فكرت من قبل في مكان واحد يجمع كل ما تريد من موضوعات ومراجع ومعالجين ومدربين ...
كنت خايف اسافر لبلد بتتكلم انجليزي ، مع ان تعليمي ...
views 198
كنت خايف اسافر لبلد بتتكلم انجليزي ، مع ان تعليمي انجليزي بس كنت حاسس اني مش هعرف أتكلم ، ولما كنت في بلدي وبهتلر نفسي كنت بلاقي نفسي مش عارف اقول جمل...
خبر هام لكل من استفسر عن جلسات حية للدعم النفسي مع...
views 332
خبر هام لكل من استفسر عن جلسات حية للدعم النفسي مع المدرب والمعالج نهاد رجب تم فتح باب الحجز بالجلسات الحية مع المدرب والمعالج نهاد رجب بمدينة نصر ...
تم اكتمال العدد بكورس “ممارس التنويم بالإيحا...
views 249
تم اكتمال العدد بكورس "ممارس التنويم بالإيحاء" | نوفمبر | القاهرة الكورس الأشهر في مصر والشرق الاوسط وتم تدريبه في 11 دولة حول العالم .. يحصل المت...

Leave a Comment