خواطر وأخبار نهاد رجب

رسالة الى كل مسلم قد تكون سبب في الحاد الاخرين ! نهاد رجب

 

مفيش صح ومفيش غلط

مفيش عيب ومفيش مش عيب

فيه عفوية ، انسيابيه ، حرية وتعايش

الحلال بين والحرام بين .. وده بيسري على كل شىء تاني .. بين مش علشان تسمي بيه او تحطه Label على المواقف والسلوكيات .

فيه حد ممكن يوصف الحرام كإنك بتعمل حاجة اخرتها جحيم وعذاب ونار وسلخ وكوي وخنقه في الدنيا وقلة رزق!

لكن انا بالنسبة لي الحرام هو فراشة ، بتطير بتدور على رحيق يناسبها ، وبتنتقل من ورد لورد ومن زهره لزهرة ، وقفت على زهره حست انها مش مناسبة وسابتها وانطلقت على الف زهره غيرها ! ده بالنسبة لي معنى الحرام .. انك وانت بتطير بتختار بمزاجك الانسب ليك ..

وفيه ناس ممكن توصف الحلال طريق محدد ومرسوم وحدود بتعيش فيها طول الوقت ، سجن متلون ، واي انحراف هيكون ف طريق الحرام ..

انا بالنسبة لي الحلال هو كل حاجة ، هو الانطلاق والطيران واالانسيابية والتلقائية والعفوية ، والحلال هو الاضافات اللى بنستمتع بيها خلال رحلتنا في السما .. باقي الورود اللى ممكن الفراشة تستنشق منها الروايح بس محتاجه وقت معين او ظروف معينه علشان تقدر الفراشة تستقر عليها ..

الحلال والحرام ، معاني جميلة ، موجودة علشان تحافظ علينا ، انا مش باكل لحم خنزير مش علشان خايف ادخل جهنم ، انا قررت اني اكل كل حاجة تانية غير ده علشان انا مبحبوش ، علشان بحب نفسي لدرجة اني مش عايز اضرها واعرف مسيحيين مبياكلوش لحم خنزير واعرف واحد مبشر للديانة المسيحية زي اوستن جولي بيحرم اكل لحوم الخنازير . وهو مسيحي الديانة ! انا بالنسبة لي متآلف ومنسجم ومتعايش بعفوية وتلقائية مع فكرة اني ماكلهاش .. وقيس ده على كل حاجة تانية ..

مفيش داعي تبقى متطرف ومتعنت اوي فيما يخص الحلال والحرام .. والصح والغلط ، لانك في النهاية بني آدم .. انسان .. ربنا عز وجل عارف سيكولوجيتك علشان كده قال في آية من آياته “لا يكلف الله نفسا الا وسعها” ، وسيدنا محمد صلى الله عليه وسلم اغلب احاديثه تحس منها انه عليه الصلاة والسلام كان متخصص نفسي ، كان فاهم اللى جواك وكان عنده بصيره ، ومن اكتر الاحاديث اللى بتأثر بيها هو وصية سيدنا محمد صلى الله عليه وسلم بإننا لو كنا تلاته مييجيش اتنين ياخدوا بعضهم ويتكلموا من غير التالت علشان ميزعلش ! سبحان الله ، سيدنا محمد صلى الله عليه وسلم بوحي وعلم من الله كان عارف وفاهم احساس الانسان ، ليه تضغط على نفسك وتعامل نفسك كإنك ملاك لا يخطىء ، احنا بنخطىء ، علشان كده احنا الفقراء ، علشان كده احنا البشر ، وربنا عز وجل قال في القرآن

“يا أيها الناس انتم الفقراء الى الله والله هو الغني الحميد” ، شوفت ؟ لو احنا مكنش متكوبلنا اننا نخطىء ازاي اتخلقنا بكل النفسيات ديه ؟ ازاي سيدنا قابيل كان قتل سيدنا هابيل ؟ احنا بنخطىء ، لدرجة اننا تصورنا ان سيدنا قابيل كان شرير ، وفينا اللى تخيل ان سيدنا قابيل هيدخل النار ! احنا فقراء اوي على فكرة ، وربنا لو اراد ، هيقول كن فيكون ! هيبدلنا بقوم اخرين يخطئوا ويستغفروه !

“إن يشأ يذهبكم ويأت بخلق جديد”

لو ربنا اراد ، ف لحظة هنكون كلنا ف اي بعد تاني متخلف ، وهنستبدل بالكامل بناس تانيين غيرنا !

ليه لما تشوف بنت محجبة تقيمها ؟! تقول هي الحلال وغيرها الحرام ؟! ليه لما تشوف بنت غير محجبه تقول انها في ضلال مبين؟! انت ازاي عرفت ؟ انت ازاي تقول ؟ انت مين ادالك مقاليد الحكم على الناس ؟ ليه تشوف واحد بيعمل حاجة خطأ من وجهه نظرك وتقوله ؟ مين قالك انه اساسا ميعرفش ؟ مين قالك انه مفكرش مليون مرة ؟ مين قالك انه محتاج حد يذكره ؟ انا اعرف ناس بتصلي وبتشرب خمره وتغتسل وتصلي تاني ! تفتكر هما محتاجينك تقولهم ؟ واعرف ناس اقسم بالله في منتهى الاخلاق القويمة والادب الجم والتدين وهما اساسا ميعرفوش دين !

ليه تشغل نفسك بقضية ناس تانيين غيرك ؟!
ليه تحكم على الناس وتقيمهم
ليه تعيب عليهم
ليه تقول انك احسن منهم ؟

طب اقولك على حاجة في علم النفس ؟ لو انت شوفت حد وكرهت فيه صفة معينه ، اعرف ان الصفة ديه بشكل كبير جدا موجودة فيك ! لان الصفة لو مكنتش موجودة فيك مكنتش هتلاحظها اساسا ! زي البخل مثلا ، لما تشوف حد وتقول انه بخيل اوي ، انت اتعرفت عليه لانك بشكل او بآخر فاهم وعارف وجربت يعني ايه بخل ويمكن تكون بتحاول تبعد نفسك بالعافية عن الصفة ديه !

طب اقولك حاجة تانية ؟ انت عارف لما تشوف حد وتعلق عليه حتى فعلا غلطان ، انت بالشكل ده عندك مشكلة كبيرة ؟ المشكلة ديه انك شوفت حد وقارنته بنفسك وقولت جواك لاواعيا او واعيا انك احسن منه ، وروحت فعلا علشان تثبت لنفسك ده وتثبتله ده ، وده لو ده على حاجة فيدل على انك عندك مشكلة ف الايجو بتاعك رهيبة ! عالي اوي لدرجة انك شايف نفسك احسن من الناس ، وبيبان على كلامك وعلى اسلوبك بطريقة تنفر اللى حواليك منك وساعتها بتستغرب هو ليه الشخص ده مش بيعمل بكلامي ؟! وتبدأ تتحول من مرحلة النصح لمرحلة الهجوم وهنا دليل قاطع على ان نيتك مكنتش صافية من البداية

عملت فيديو من فترة عن العادة السرية ، وقولت انها مش محرمة بغلظة زي الناس مافاهمة وانها عملية عادية جدا ممارستها الخاطئة هي اللى بتؤدي لنتايج سلبية ، وهوب لاقيت كم كبير جدا من التعليقات اللى بتهاجمني انا وبتتهمني بالعربدة لمجرد اني قولت انها مش حرام ، ومش ديه الحاجة الغريبة ، الحاجة الغريبة ان معلقين كتير كانوا بيمارسوا العادة السرية فعلا !!! ومع ذلك بيهاجموني وبيقولولي بالدليل انها حرام ! ونفس الممارس ده ممكن يروح لواحد غيره وينصحه انه ميعملش العادة ديه ويأتيها هو ، وهنا تفهم ان موضوع النصيحة زي ما اغلب الناس فكراها في حد ذاتها عملية غير معتدلة او منظمة وليها نمط سىء جدا !

يعني حتى نصيحتك عن طيب خاطر ونية صافية ديه ممكن تإذي مش تعدل .. لو انت مش فاهم هتنصح ازاي وامتى ، واهم حاجة امتى على فكرة ، ساعتها انت ممكن تدمر الشخص ، بمعنى وده حصل قدامي ، واحد كان بيصلي غلط ، وجيه واحد تاني نصحه وقاله انه بيصلي غلط ، الاولاني عصلج شوية بحكم انه متعود على الطريقة ديه في الصلاة ، راح الناصح قاله طيب بص بقى انا قولتلك وملكش حجة ، طريقة طفولية خالص علشان تعدل من سلوك حد ، انك تلبسه في الحيطة ، لو مش عايز يقتنع .. والاغرب انك تلاقي حد ينصح حد فالتاني ميستجبش لأي مليون سبب جواه ، يقوم جايبله ادلة من الكتاب والسنة تقوله انه غلطان ، والتاني عنده مليون سبب ، يجماعه لو الموضوع سهل اوي كده والله ماكان حد غلب وكان زماننا كلنا ملايكة ماشيين على الارض ..

سيب الناس في حالهم ، كل واحد في الدنيا بياخد فترة والله العظيم والله الهدي بييجي من عند ربنا عز وجل من خلالك لو ربنا اللى اختراك بطريقة عفوية وتلقائية من غير اذى للناس ، مجرد انك تلاقي الشخص اتاذى او هيتإذي بسببك ابعد فورا ..

ليا واحد صاحبي وكان زي اخويا وكنا على طول دايما مع بعض ، كان بيصلي الوقت بوقته وبيشوفني مبصليش وعمره ماقالي صلي ، كان حافظ القرآن والبخاري الله يرحمه كان علم ماشي على الارض ، انا صليت لمجرد اني كنت بشوفه بيصلي باستمرار وف مرة كنا ماشيين وادن اذان صلاة الظهر قالي معلش يانهاد استناني هنا هدخل اصلي وهخرجلك ، انا استغربت وبتلقائية شديدة قولتله يعني انت تصلي وانا من الغرب الكافر انا هدخل اصلي معاك، ولما بدات اصلي بدا يتابعني ويدعمني علشان اكمل واستمر ف صلاتي ! ده الذكاء ، ده الاسلوب الامثل للنصح ، انك تنصح لما تلاقي الشخص متقبل منك انت بالذات وانه فعلا مش فاهم وعايز يعرف ، مش تفترض انه مش عارف اي حاجة وانك بقى اللى جبت التايهة ! ده الذكاء انك تبدأ بنفسك وتبقى افعالك جميلة تخلي الناس تقلدك .. هو ده الذكاء  . وساعتها هتاخد ثواب ، سيدنا محمد صلى الله عليه وسلم قال “فَواللَّه لأَنْ يَهْدِيَ اللَّه بِكَ رَجُلاً وَاحِداً خَيْرٌ لَكَ مِنْ حُمْرِ النَّعَمَ”

انت متخيل ؟! قال بك ، وديه فيها كل المعاني ، تفتكر احنا مخلوقين ظباط ؟ علشان نتاكد من ان كل حاجة ماشية على الناس التانية بشكل سليم ؟ ولا كل واحد مخلوق لوحده وهيبعث لوحده وهيتحاسب لوحده وملوش غير ف نفسه ؟ يا أخي اتحكم في اهل بيتك بالحسنى قبل ماتبدأ توعظ في خلق الله .

90% من الناس عايزة تسافر وتروح اوروبا ولا أمريكا علشان خاطر تعيش هناك ، وكلهم بلا استثناء شايفين انها بلاد الحرام والمعصية !؟ طب مسألتش نفسك اشمعنى في بلاد الاسلام بالذات كل التخلف ده موجود وفي بلاد المعصية على رايك متقدمين ؟ مسألتش نفسك ليه احنا عايشين في بؤس وشقاء وناس في النرويج ولا السويد من كتر الفلوس والنعيم مش عارفين يودوه فين ؟! تخيل ! الاسلام اللى نادي بالعلم والتفكر ، اهله بيستقووا ببلاد الغرب علشان يعملوا ابحاثهم هناك والموجودين في بلاد الاسلام مهمتهم هو الحكم والتحليل والتحريم ؟!!! الاسلام اللى نادى بالعدالة والمساواة تلاقيهم في اي مكان غير المكان اللى نزل فيه الاسلام !! وتلاقي اهله مستمرين في الحكم والتحليل والتحريم ؟! الاسلام اللى نادى بالسلام والحب تلاقي معظم مشاكل العالم موجودة ف محيطه واهله لسة مستمرين ف التحليل والتحريم ؟!!!

يا أخي فكر ، يا أختي فكري ، ادعي للناس بالهداية وصدقيني وصدقني مفيش احسن من انك تكون شهادة لدينك ، مش تكون متحدث رسمي بإسمه . اشتغل خلي دينك يظهر في شغلك ، خلي دينك يظهر في تعاملاتك ، خلي دينك يظهر في اهتمامك وعلمك وثقافتك ، الدين حاجات كتير اوي ، متلخصوش في احكام .

اتمنى تكون الحلقة غيرت مفاهيم عندك ، ولو فيه حد تحب تقوله الكلام ده تقدر تشاركه بالفيديو ده ، انا عارف ان فيه ناس هتهاجمني وهتحاول تتحداني بالادلة والبراهين ، انا بقولهم من دلوقتي انا مغلوب قدامكم .. انا مغلوب واعلن انهزامي وانتوا صح ، مبروك 🙂

انا نهاد رجب
مدرب ومعالج بالتنويم الايحائي

 

مقالات مرتبطة

إذا أحبك سيجد وقت لك #نهاد_رجب...
views 5354
الشخص اللى بيحبك هيعرف يلاقي وقت وعمر جديد علشان يعيشه معاك متصدقش في كلمة "كنت مشغول ومعرفتش اوصلك" الحب لوحده وعي ، لا يمكن فصله ، فلو انشغل وعيك ...
الأحباب بالأردن 🌷🌷 سعيد جدا للاهتمام المتزايد من ...
views 179
الأحباب بالأردن 🌷🌷 سعيد جدا للاهتمام المتزايد من الإخوة بالأردن لحجز محاضرة "الاقناع والتأثير النفسي" اشوفكم على خير في المملكة الاردنية ، فندق ايا...
Entrepreneurship ideas for young and ambitious peo...
views 289
Twee meditation meh readymade Intelligentsia vinyl. Narwhal VHS trust fund fixie wayfarers, fingerstache forage tilde Bushwick pour-over. Hashtag Bank...
انا مؤمن ان كل انسان ليه الحق انه يعيش بأفضل شكل م...
views 62
انا مؤمن ان كل انسان ليه الحق انه يعيش بأفضل شكل ممكن ، ليه الحق في ثروات العالم ، ليه الحق انه يحقق احلامه ويوصل للي هو عايزه اين كان ، ومؤمن ان لكل ...
باخد كورس اونلاين عن اللايف كوتشنج مع مدرب سكوتلان...
views 107
باخد كورس اونلاين عن اللايف كوتشنج مع مدرب سكوتلاندي ، بقالي ساعات ، وبدات اهلوس انه بيتكلم عربي بتحصلي كتير لما اكون باخد كورس بلغه تانيه او في بلد...
الآن بالقاهرة وبمواصفات دولية معتمدة | كورس ممارس ...
views 210
الآن بالقاهرة وبمواصفات دولية معتمدة | كورس ممارس التنويم الايحائي نوفمبر 2016 سيتم تدريبك على أحدث التقنيات الخاصة بالتنويم الإيحائي في العالم لتقو...
النهاردة اليوم التاني لكورس ممارس التنويم الذاتي ....
views 20
النهاردة اليوم التاني لكورس ممارس التنويم الذاتي .. مجهز مفاجآت وحركات للحلوين ومستعد بشغف . انتظروا دفعه جديدة من ممارسين التنويم الإيحائي الجدد S...
وهم البحث عن الشخص الكامل ! نهاد رجب...
views 3164
  خدعوك فقالوا احنا بنبحث عن الشخص المثالي او الشخصية المثالية !  احنا في حقيقة الامر بنبحث عن المعادلة الاتية :  شخص مظهره مظهر الكمال ، فيه...
Be a True Entrepreneur, Adopting the Right Thought...
views 264
Twee meditation meh readymade Intelligentsia vinyl. Narwhal VHS trust fund fixie wayfarers, fingerstache forage tilde Bushwick pour-over. Hashtag Bank...
اليوم اللي يعدي من غير ما تقول “اخيرا خلصت&#...
views 327
اليوم اللي يعدي من غير ما تقول "اخيرا خلصت" ميتحسبش انجزت ايه النهاردة ؟؟ Source

Leave a Comment