“اللهم انا لا نقوى على عذابك ولا نقوى على عظمة رحمتك .. ”

من يومين كنت مستني الاسانسير ، خدت بالي ان فيه حد من الجيران جاي علشان يطلع هو كمان ، كان راجل في الستينات من عمره تقريبا ، شعره شويه ابيض ، ومبتسم ، دخل الاسانسير وسالني طالع الدور الكام ؟ قولتله الرابع . وهو كمان كان طالع الرابع .

لاقيته بيسألني
– بنقول ايه لما بنركب الاسانسير ؟
اترددت لحظه وقولتله “سبحان الذي سخر لنا هذا”
– الله اكبر برافو عليك
– وماكنا له مقرنين ..
– برافو برافو .. وإنا الى ربنا ..
– لمنقلبون
– الله الله عليك برافو عليك

حسيت وانا برد عليه اني طفل صغير وكنت مبسوط والله اني بجاوب صح . لاقيت الراجل قعد يدعيلي ، وقالي “ربنا يبارك فيك ويحميك ويطمنك…” وانا مكنتش عارف ارد غير ب “الله يخليك ، الله يسلمك ، شكرا ليك”

المهم الاسانسير وصل فتح الباب وبصلي وقالي “يبني احنا كلنا ضيوف عليها وكلنا ماشيين منها احنا عايشين برحمته ”

وقفت مكاني للحظة ومردتش بس ابتسمت ومشيت .

كلامه كان ليه وقع عجيب على وداني ، كلنا ضيوف وكلنا ماشيين منها .. احنا عايشين برحمته ..

حكيت الموضوع وانتهى الامر وكملت يومي ، وتاني يوم كنت راكب العربيه وبدات ادعي “اللهم انا لا نقوى على عذابك ولا نقوى على عظمة رحمتك” ، الرفيقة كانت جمبي فسألتني يعني ايه .. انا في اللحظة ديه استغربت من اللي قولته .. وبدات اجمع افكاري .. يعني ايه اللي انا قولته صحيح ! ايه الدعوة العجيبة ديه .. بس لما فكرت في كل حاجه حصلت في حياتي ، كل حاجه غلط عملتها وكان ربنا بيرحمني كل لحظه حياتي كانت هتتبدل للأسوأ وربنا بيسندني ، كل مرة دعيته فيها وانا على معصية واستجاب ، كل مرة عصيته وعصيته وعصيته وكان بيرحمني ويرحمني ويرحمني ، حسيت بوجع والله

وجع عامل زي ان حد يكون بيحبك اوي وانت تإذيه فيحبك وتإذيه ويحبك وتإذيه وفجأه تكتشف اد ايه هو كان جميل اوي معاك وانت اللي كنت وحش ، فيوجعك قلبك ولما تلاقيه لسه بيحبك قلبك يوجعك اكتر لانك مش قادر تنسى انت اد ايه كنت وحش معاه ولا حتى قادر تبطل تإذيه .

اما مع الله فانت بتعصيه ، وربنا كتب على نفسه الرحمة ، فتعصيه ويرحمك ويرضيك ، وتعصيه فيحميك وانت بتعصيه ويرحمك ويطمنك وترجعله وتبعد تاني فيسخر الكون علشانك لحد ما ترجع تاني . هو بيحبك .. ولما بفكر اد ايه انا كنت وحش ولسه ومستمر ، قلبي بيوجعني. لما بفكر في عظمة رحمته ومعصيتي وقوته وضعفي .. بتعب جدا .

يارب انت جميل اوي ، كانت بتيجي عليا لحظات ربنا بيرضيني فيها لدرجة اني والله العظيم ما بلاقي دعوة زيادة ادعيها ، من كتر الاغراق بعطاياه كنت بقوله “اللهم اني اشهدك واشهد جميع خلقك انني دعوتك فاستجبت .. اللهم اني اشهدك علي لتكون هذه الدعوه حجه علي يوم القيامة”

انا معرفش انت مين او فين او عملت ايه في حياتك .. بس انت مسنود .. واللي ساندك مش هيسيبك ، هيطمنك وهيبقى معاك لما تكون فاكر انك بقيت لوحدك .. هو اقرب اليك من نفسك ، كل زفير وشهيق بيخرج وبيدخل جوا جسمك بأمر منه . احمده واشكره وحبه .. لانك لما هتفكر وتفتكر كام مرة رحمك هتعيط زي العيال .

يبني احنا كلنا ضيوف عليها وكلنا ماشيين منها احنا عايشين برحمته

وجمعتكم مباركة


Source

مقالات مرتبطة

امبارح حصل موقف وانا سايق خلاني اتضايق كنت سايق ...
views 59
امبارح حصل موقف وانا سايق خلاني اتضايق كنت سايق وواقف في الاشاره والعربيات اللي ورايا بتكلكس علشان امشي واكسر الاشاره لان كده كده محدش معدي .. انا...
بداية من اغسطس ٢٠١٧ تقرر عمل مقابلات مع المهتمين ب...
views 132
بداية من اغسطس ٢٠١٧ تقرر عمل مقابلات مع المهتمين بالحجز لكورس ممارس التنويم الايحائي مع الاحتفاظ بحق رفض كل من لا تتوافر فيه الشروط التي سيتم الاعلان ...
حاجة في منتهى الروعة هيفوتكم كتير لازم تسمعوها ...
views 1443
حاجة في منتهى الروعة هيفوتكم كتير لازم تسمعوها الفنان أحمد هيكل !قطر لعبة جديد أحمد هيكل 2015. Ahmed Hikal "Qatr Le3ba" Lyrics By : Kareem Hakeem ...
لو حسبت الفلوس اللي جاتلك وصرفتها في كلام فارغ او ...
views 259
لو حسبت الفلوس اللي جاتلك وصرفتها في كلام فارغ او مهم هتلاقيها نفس الفلوس اللي بتدعي ربنا يديهالك بس الفرق انها جاتلك على دفعات Source...
تا تا تا تا تن تا تن تا تن تا تا تا تا تا تاااااا...
views 136
تا تا تا تا تن تا تن تا تن تا تا تا تا تا تااااااه انا عارف انك مش فاهم حاجة ، بس دي نغمة موسيقية .. يمكن متكونش مصدقني ، انا حاولت اسهلها عليك .. ...
قصيدة ابويا واحشني جدا !
views 2434
  حلوة أوي انا ابويا واحشني جداً محتاج رأيه ف حاجات أهمل ف سؤاله عني وماجاش من يوم مامات نضارته وساعته لسه ع الرف مكان ماسابهم وهدومه...
– شايف نفسك فين كمان 10 سنين في الماضي ؟! &...
views 110
- شايف نفسك فين كمان 10 سنين في الماضي ؟! - انت قصدك في المستقبل - لا في الماضي - ازاي اشوف نفسي فين في الماضي ؟ اللي حصل حصل اكيد هكون زي مانا - ...
مستنيكم ع السناب تشات. حاجات حلوه هتعجبكم هتكلم ع...
views 237
مستنيكم ع السناب تشات. حاجات حلوه هتعجبكم هتكلم عنها nihadragab Source
انا مبفتكرش الناس اللي خدوا معايا كورس التنويم ، ب...
views 71
انا مبفتكرش الناس اللي خدوا معايا كورس التنويم ، بس مبنساش الناس اللي بشوف تأثير حقيقي عملوه باللي خدوه معايا انا عيني عليكم اشتغلوا وطبقوا Sour...
والغد ان شاء الله بداية اول يوم بكورس دبلوم التنوي...
views 62
والغد ان شاء الله بداية اول يوم بكورس دبلوم التنويم الايحائي بالمملكة الأردنية الهاشمية مع مركز البدر والذبذبات الكونية و Cosmic Academy مبسوط جدا لو...

About the author

nihadragab