من كام شهر كنت في حمام السباحة وصديق ليا قالي “متخافش سيب نفسك والمية هترفعك”

كنت كل ما بحاول اطبق المعلومه اللي بيقولها وكانها شيء مفهوم جدا ومنطقي جدا ، كنت بنزل والمية مش بترفعني ولا حاجه .. كان دايما بيقول كلام من نوعيه “متنشفش ضهرك ، سيب نفسك ، المية هترفعك ، انت عجيب اوي ..

كان بيقولها بنبره صوت واثقه جدا وكنت بحاول اصدقه بس المية مكنتش بترفعني وكنت بنزل .. لحد ما بعدها بعده محاولات على مدار شهور ، سبت نفسي والميه رفعتني فعلا ..

العجيب اني معملتش حاجه مختلفه عن اللي كنت بعمله في البدايه ، وكإن المية هي اللي اسلوبها اتغير معايا لوحدها 😀

بس الاثاره مش هنا .. الاثاره اني روحت حمام سباحة مع قريب ليا وحاولت اعلمه بنفس الطريقه “سيب نفسك والمية هترفعك” كنت بقولها بطبيعيه وتلقائية جدا .. بنبرة صوت “مالك يبني ديه سهله جدا ، انت بس سيب نفسك” ومش فاهم هو ليه مش بيسيب نفسه . ده الموضوع بسيط جدا !

نفس الموضوع حصل قبل كده مع بدايه تعلمي للسواقه .. اللي كان بيعلمني السواقه كان بيقولي “دوس دبرياج وسنة بنزين” ويتك اوي على سنة بنزين ، وانا مش فاهم تماما يعني ايه وازاي سنه بنزين ، وكنت كل مرة بدوس جامد وهو بيكرر نفس الجملة “سنة بنزين” ، “سنة فرامل” .. لحد ما قررت اكمل لوحدي وهوب فجأه بقيت ادوس سنه بنزين عادي جدا وسنه فرامل ! وجيت اعلم مراتي تسوق لاقيت نفسي بقوله “سنة بنزين سنة بنزين” وكإنها برضه حاجه بسيطة جدا وطبيعيه وهبله واي حد يقدر يعملها بسهوله !

عندنا طريقه تفكير عجيبة بس لما هتعرفها هتفهم ايه سر ضعف التواصل بينك وبين الناس .. لما حد يتعلم حاجه ويبقى مهاري فيها ، بينسى مراحل تعلمه وبيفتكر ان الموضوع بسيط وسهل و”اهبل واي حد يقدر يعمله” ، حاجه عامله زي انك تكون جعان جدا ، واخيرا ييجي الاكل وتبدا تاكل كتير جدا وتملى بطنك .. وتشبع ، لدرجة انك ممكن تشوف حد تاني بياكل قدامك تضايق وتقول “هو بياكل كتير كدا ليه!”

او تخيل انك عطشان جدا وموجود لوحدك في الصحرا ، وحد عرض عليك ازازه مية بس هياخد منك مليون جنيه .. انت على شفا الموت واكيد هتوافق ، وتاخد منه الازازه وتشرب وكل ما تشرب كل ماتبدا تفكر “مليون جنيه ايه هما نص مليون بس” تشرب تاني وتفكر “نص مليون ايه العبط ده هما 100 الف بس” تشرب تالت وتقول “100 الف عفريت ، ديه متساويش اتنين جنيه”

احنا بننسى وبنتعامل مع الاخرين من مجال اننا بنطالبهم يكملوا على اللي احنا وصلناله ، وبنكتشف انهم مش عارفين ، فبنعتقد انهم اما اغبيا او مش مهتمين او مش مركزين ، بس اخر حاجه بنفكر فيها هو اننا نفهم انهم بيمروا بنفس مراحل التعلم اللي احنا مرينا بيها . بنقعد ندعي ربنا ونندر ولما بنحصل على اللي احنا عايزينه بننسى كل اوقات الازمات وبنفتكر اننا هنعيش طول العمر في رخاء ولو حصل اي ازمه بنرجع تاني للبؤس وبرضه بننسى النعيم اللي كنا فيه .

الخلاصه :

انت مش بائس ، انت مش ضعيف ، انت مش جبان او مكتئب .. انت بس في اللحظه ديه بائس او ضعيف او جبان او مكتئب بس انت حياتك مليانه لحظات اكتر هتقعد تتقلب ما بينها طلوع ونزول لحد ما تموت

انت مش الناس ، لما تبدا تطلب من الشخص حاجه يعملها ، علمه واحدة واحدة ، افهم انك كنت زيه في يوم من الايام ، من حقه انه يغلط ، او ينسى او ميفهمش ، من حقه لان ديه مراحل التعلم الطبيعيه لاي انسان .

بتتعلم حاجه جديده ؟ استمر مهما غلطت ، مهما المية شدتك لتحت ، في اليوم اللي هتحط في دماغك ان العوم ده شيء طبيعي هتنزل وتطلع وفي النهايه المية هتسمع كلامك وهترفعك .

فكر نفسك بلحظات النعيم وفكر نفسك بنفس القدر بلحظات الحزن بشرط انك لا تفرح فتنسى الألم وتقع فيه تاني ولا تزعل فتنسى النعيم وتكفر .


Source

مقالات مرتبطة

Be a True Entrepreneur, Adopting the Right Thought...
views 241
Twee meditation meh readymade Intelligentsia vinyl. Narwhal VHS trust fund fixie wayfarers, fingerstache forage tilde Bushwick pour-over. Hashtag Bank...
كن نبيلا #نهاد_رجب
views 2604
لو علمت ما يحدث لك عندما تدعوا لغيرك بالخير لتسابقت وتنافست معه على الدعوة له لتفهم أنك كلما أردت بشدة لغيرك حصلت بكثرة على ما تريده للآخرين لا تم...
صباح السعادة كام كلمة حلوة هتسمعها النهاردة من ال...
views 206
صباح السعادة كام كلمة حلوة هتسمعها النهاردة من الناس ومنك ؟ احسبها وقولنا في اخر اليوم وقولنا ايه اكتر كلمة محتاج تقولها لنفسك او حد يقولهالك دلوقتي ...
السهرة النهاردة مع إسأل نهاد .. استعدوا خلال دقايق...
views 36
السهرة النهاردة مع إسأل نهاد .. استعدوا خلال دقايق .. 🙂 Source
‎Nihad Ragab نهاد رجب‎ updated their cover photo. ...
views 132
‎Nihad Ragab نهاد رجب‎ updated their cover photo. Source
كلنا عارفين ان عقلك اللواعي المسئول عن التصرف المع...
views 273
كلنا عارفين ان عقلك اللواعي المسئول عن التصرف المعروف بال Fight or flight او بالعربي "الهجوم او الهروب" الاتنين هاء وده مسئول عن حمايتك من الخطر ،...
كنّا طالعين جبل موسى ، في سانت كاترين من أسبوع او ...
views 372
كنّا طالعين جبل موسى ، في سانت كاترين من أسبوع او اكتر . عشرات من الناس عايزين يوصلوا للقمة لسبب ما . كل واحد عنده هدفه . الجبل ارتفاعه ٢٣٠٠ متر وصعود...
5 أسباب تجعلك تعشق المغرب لـ نهاد رجب...
views 3586
"قبل أن أأتي إلى هنا أخبروني عن السحر في المغرب وحذروني منه ، فمن يذهب لا يرجع ، يسحر يا رجل ! ...  وعندما جئت وجدته ، ليس سحرا بالمعنى الذي فهمته ولك...
ناس
views 2044
  الانسان ده غريب ، عنده قدرة بشعة انه يحب اين كان حتى لو مكنش فاهمه او عارف هو ايه. تلاقي واحد بيحب قطة وواحدة بتحب كلب وواحد بيحب واحدة شافها ...
الحمد لله تم تنظيم محاضرة وجولة تدريبية واعلامية ف...
views 182
الحمد لله تم تنظيم محاضرة وجولة تدريبية واعلامية في المملكة الهاشمية الاردنية بحضور العديد من الإخوة من جميع أنحاء المملكة رغم الطقس ومعوقات السير ...

About the author

nihadragab