من حوالي 14 سنه تقريبا والدي توفى ، كنت نايم لما لاقيت اختي بتصحيني وسط صريخ وعياط وبتقولي اصحى بابا مات ! مكنتش مدرك ايه اللي بيحصل ، بس كل اللي فاكره اني كنت نايم بعمق عجيب ، ولما كنت بصحى حسيت اني كإني كنت جاي من عالم لعالم ، كإني كنت في غيبوبه ، وصوتها ، مع انها كانت جمب ودني ، بس كنت سامعه كإن حد بينادي من بعيد جدا ، او كإني كنت تحت الميه وسامع اصوات بعيده مش عارف اميزها بس انا عارف انها موجودة .. وبشكل تدريجي بدا الصوت يزيد اكتر واكتر وكاني بخرج من دوامه للاعلى مرة تانيه ، لحد ما انتبهت وفتحت عيني وقولتلها وانا مخضوض “ايه حصل ايه؟!”

واستغرقت في كل مشاهد الوفاه ، وحصل اللي حصل ، وانتهى الموضوع وسابلي جملة واحده في بالي بتتكرر على لساني كل مره يجيلي تليفون او حد يقولي ان عنده حاجه عايز يقولهالي … بتفاجئ وبتخض وبقوله “ايه حصل ايه!”

استمر الموضوع ده معايا 14 سنه .. “ايه حصل ايه؟” متوقع ان فيه مصيبه تانيه هتحصل او خبر هسمعه .. وفي خلال 14 سنه مسمعتش اي خبر وحش من اي نوع ومع ذلك استمر معايا الرد ده ..

لحد من اسبوع تقريبا ، اتصل بيا احد المستفيدين السابقين و رديت عليه وانا مبسوط لانه اتصل بعد غيبه ، لاقيت صوته واطي حبه ولاقيته بيقولي “انا عايز اقولك على حاجه” وسكت

في جزء من الثانيه اتحفز الاعتقاد القديم ، قلبي خبط اسرع ، عقلي قلب كل الافكار القديمه في ثانيه ، وقولتله بصوت مخضوض “ايه حصل ايه؟!”

لاقيت صوته اتعدل نسبيا .. وقالي “حصل اللي حصل يا استاذ نهاد ، وكله خير من الله” وكمل كلامه وقال “ان الجلسه بدات اخيرا تجيب النتيجه المرجوه” وكمل كلامه وهو بيكلمني عن ازاي التقنيات اشتغلت معاه في مواقف ، بس وهو بيتكلم حسيت كان جسمي كله سكت للحظات ، حسيت بهدوء عجيب وكل اللي بفكر فيه “حصل اللي حصل ، كله خير من الله” ، “حصل اللي حصل ، كله خير من الله” ، “حصل اللي حصل ، كله خير من الله”

اقسم بالله ، كانت جملة جايه من راجل بيني وبينه آلاف الكيلومترات ، معرفش عنه حاجه غير جلسه عابره عملتهاله وخدت عليها مقابل ، الراجل ده بجملة واحد صادقه ، من غير مايتعلم تنويم ايحائي ومن غير ما ينوي يعالجني ومن غير ما يعرف اصلا الاعتقاد العجيب اللي عندي ، قدر يخلصني من اعتقاد غريب بقاله معايا 14 سنه .. بجمله ما استغرقتش اكتر من 3 ثواني في نطقها ! “حصل اللي حصل يا استاذ نهاد ! وكله خير من الله”

حظي الحلو ، انه قالهالي وانا في حاله متقبله جدا لاني كنت مخضوض جدا ، وقالها بصدق وبصوت مناسب في لحظه مناسبه بسرعه زمنيه مناسبه . وفجأه جابت نتيجتها .. “حصل اللي حصل وكله خير من الله” .. يمكن نفس الجمله لو انت كنت في نفس موقفي مكنتش اثرت فيك بس انا عندي ومكوني اللي يخليني اتاثر بيها ..

في الدورات بقول للناس ، التنويم بالايحاء اعظم بكتير . من مجرد غمض عينك وخد نفس عميق ، والصوره النمطيه اللي لزقناها بالتنويم الايحائي ، التنويم الايحائي هو كل جملة مناسبه تتقال في وقت مناسب وتحدث تأثير .. وبكمل وبقول للناس ان فيه ناس بالفطرة عندهم القدرة على كده .. بس هما ميعرفوش ، هما ناس اتخلقت بتنشر السعاده والحب والامان والسلام بين الناس من خلال كلامهم ونيتهم الداخليه الحلوه وهما حتى ميعرفوش ..

وحصل اللي حصل ، كله خير من الله !

شكرا صديقي اللي ميعرفنيش على خدمه قدمالهالي من غير نيه وبدون وعي ، وتغيير احدثه وكان سبب فيه .

ساعدوا الناس مهما كانوا باين عليهم مش محتاجين مساعده !

ويومكم اجمل من يومي
نهاد رجب


Source

مقالات مرتبطة

فيه نوعين من الناس ناس بتاخد خطوات حقيقيه وبتنجح ...
views 32
فيه نوعين من الناس ناس بتاخد خطوات حقيقيه وبتنجح وبتكبر وناس تانيه بتبص على الناس الاولى وينتقدوهم مستحيل الناس الاولى تنتقد ومستحيل الناس التانيه...
بص على الأرض هتلاقي … مقالة لـ نهاد رجب...
views 3801
كتير لما كنت ببص في الأرض كنت بلاقي فلوس بالذات وانا صغير ، فرحتي بالفلوس ديه كانت اكتر من فرحتي لو كان والدي ادهالي وكإني كسبتها في جايزة كنت ب...
الحمد لله على كل فرصة جاتلي في الماضي ومتكتبتش من ...
views 35
الحمد لله على كل فرصة جاتلي في الماضي ومتكتبتش من نصيبي .. يوم عن يوم بكتشف اني فعلا مكنتش مستعد ليها . Source...
ان شاء الملك سأتواجد بالأردن يوم 28 يناير لتقديم م...
views 141
ان شاء الملك سأتواجد بالأردن يوم 28 يناير لتقديم محاضرة خاصة بالإقناع والتأثير النفسي بعمان والظهور ضيفا بالتلفزيون الأردني .. سعيد برؤيتي للعديد من أ...
حتى الانسان يقدر يتلون- غسيل المخ بالتنويم الضمنى ...
views 102
حتى الانسان يقدر يتلون- غسيل المخ بالتنويم الضمنى ... إدخل هنا تأتي إليكم من الموقع الرسمي نهاد رجب http://www.nihadragab.com/2015/11/22/%D8%AD%D8%AA%...
مفيش مغرور اكتر من اللي بيقولك خليك واقعي وكانه عا...
views 42
مفيش مغرور اكتر من اللي بيقولك خليك واقعي وكانه عارف كل حاجه عن الحياه مفيش كذاب اكتر من اللي يقولك مفيش أمل مفيش منافق اكتر من اللي يسمع هدفك ويت...
إعتماد ال National Guild of Hypnosis تم بحمد الل...
views 197
إعتماد ال National Guild of Hypnosis تم بحمد الله اعتمادي من مؤسسة ال N.G.H "كمعالج معتمد بالتنويم الإيحائي" وعضو من أعضاءها ومهمتنا هو نشر التنويم ...
لو حسبت الفلوس اللي جاتلك وصرفتها في كلام فارغ او ...
views 234
لو حسبت الفلوس اللي جاتلك وصرفتها في كلام فارغ او مهم هتلاقيها نفس الفلوس اللي بتدعي ربنا يديهالك بس الفرق انها جاتلك على دفعات Source...
قطار ماشي وطريقين قصاده .. طريق منهم عليه 5 أشخاص ...
views 123
قطار ماشي وطريقين قصاده .. طريق منهم عليه 5 أشخاص والطريق التاني عليه شخص فقط .. ولسبب ما هما مش هيقدروا يجروا بس انت في ايدك انك توجه القطر انه يمشي ...
أربع مراحل لمعادله الأربع خطوات لحث حاله التنويم ا...
views 232
أربع مراحل لمعادله الأربع خطوات لحث حاله التنويم الإيحائي التنويم الإيحائي هو تقنيه معروفه حول العالم حيث انه افاد الآلاف ممن خضعوا لحاله التنويم ال...

About the author

nihadragab