بقرأ آيات الصيام استوقفني أمر عجيب .. في وسط آيات الصيام في سورة البقرة جات آيه ليها دلاله مبنيه على خاطرة

قال رب العزة : “وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ”

في البداية ربنا عز وجل بيخاطب سيدنا محمد صلى الله عليه وسلم ، وإذا سألك عبادي عني فإني قريب .. ربنا عز وجل مقالش “فقل لهم إني قريب” مع ان في آيات تانيه ربنا عز وجل بيقول فيها “فقل” ولكن في الدعوة بالتحديد ، ربنا عز وجل هو اللي جاوب بذاته وقال “فإني قريب” وكإن الله عز وجل بيفهمنا ان الدعوة ليس لها وسيط حتى لو كان النبي صلى الله عليه وسلم .

“أجيب دعوة الداع إذا دعان”

يعني ايه اجيب دعوة الداع إذا دعان ؟ يعني واحد بيدعي ربنا ليه ربنا يقول “إذا دعان” !

اكتشفت ان فيه ايات كتير في القرآن الكريم ، ربنا بيعلمنا من خلالها الدعاء السليم ، دعاء مفيهوش شرك او اضافات ، دعاء ليه قوانين ، دعاء ليه روح

وكان من ضمن الادعيه :

قَالاَ رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ

قَالَ رَبِّ إِنِّي أَعُوذُ بِكَ أَنْ أَسْأَلَكَ مَا لَيْسَ لِي بِهِ عِلْمٌ وَإِلاَّ تَغْفِرْ لِي وَتَرْحَمْنِي أَكُن مِّنَ الْخَاسِرِينَ

قَالَ رَبِّ إِنَّ قَوْمِي كَذَّبُونِ* فَافْتَحْ بَيْنِي وَبَيْنَهُمْ فَتْحاً وَنَجِّنِي وَمَن مَّعِي مِنَ الْمُؤْمِنِين

رَبِّ هَبْ لِي مِنَ الصَّالِحِين

قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ وَإِلاَّ تَصْرِفْ عَنِّي كَيْدَهُنَّ أَصْبُ إِلَيْهِنَّ وَأَكُن مِّنَ الْجَاهِلِينَ

وطبعا الآيات كتير ولكن هل لاحظت أن الادعيه فيها نمط متكرر ؟

النمط ده هو نمط الخوف من شر هيحصل لو ربنا متدخلش حالا واستجاب

ومن زمان كنت لما بدعي بحاول ادمج السبب والنتيجة في الدعاء ، على ان السبب هو شر وان النتيجة هتكون خير ليا وللعالم .

النمط التاني المتكرر هو وضوح الدعوة .. ايه هي بالظبط ، انا عايز ايه من الآخر وبشكل مباشر من غير كلام كتير .

فالقاعدة هنا هو :

الهدف او النتيجة المطلوبه + الخوف (انا خايف من ايه) + الثناء على الله عز وجل

ولإن “فإني قريب” هتلاقي ان اغلب الايات او كلها الدعاء فيها “ربي” او “ربنا” ، مش “يارب” او “يا ربنا” وكأن الياء بتدي ايحاء ان الله ليس بقريب

كإنك بتقول “ربي هب لي رزقا كثيرا إني أخاف أن نجوع آو أن نهلك وأنت الرزاق الكريم”

طيب ليه بعد ما ندعي ربنا ، ربنا بيقول “فليستجيبوا لي” ! ازاي ندعي ربنا واحنا نستجيب ؟

في اللحظة اللي هتدعي فيها ربنا عز وجل ، من وجهة نظري ان ربنا عز وجل هيظهر قدام عينك اشارات هترشدك للنتيجة المطلوبة ، وربنا عز وجل قال “فليستجيبوا” مقالش “وليستجيبوا” ، حرف الفاء قد يدل على سرعه الاستجابه واما ما بعد الاستجابه فهو مسئولية الداع . او بمعنى تاني قدرته على فهم الاشارات الربانية واتباعها ساعتها بس هيحصل باقي الآيه “لعلهم يرشدون”

والخاطرة الأخيرة : ايه دلاله وجود الآيه ديه بالتحديد في وسط آيات الصيام ؟

الصيام هو درجه من درجات الايمان ، وهو العمل اللي بيكون بينك وبين ربك ، الصيام بينقي الجسم وبينضفه ، ولما ده بيحصل بيرتقي الانسان مهما كان وبيكون أكثر صله للروحانيات والنور والله عز وجل . في لحظات الروحانيات ديه بتكون دعوة الصائم أكثر نقاء .

علشان كده سيدنا محمد صلى الله عليه وسلم قال

“للصائم دعوة لا ترد”

رمضانكم كريم وجميل كالعاده واعاده الله عليكم بالخير والحب والسلام

وكل سنة وانتم طيبين

نهاد رجب


Source

مقالات مرتبطة

حتى العلم مسخر لنا وبنحصل عليه بشرط انك تنوي استخد...
views 1251
حتى العلم مسخر لنا وبنحصل عليه بشرط انك تنوي استخدامه Source
محدش فينا عارف اجابة سؤال “انت مين؟” ...
views 190
محدش فينا عارف اجابة سؤال "انت مين؟" وبالتالي أسهل حاجة نصدقها هو وصف الناس لينا .. لإننا مش عارفين هو صح ولا غلط .. احنا معندناش اجابة صريحة واضحة ...
ناس كتير بتقول انها مبتعرفش تتخيل في جلسات التنويم...
views 221
ناس كتير بتقول انها مبتعرفش تتخيل في جلسات التنويم الايحائي وطبعا التخيل جزء كبير من العلاج بس ازاي نقدر نساعدهم بنتعلمه في ورش التنويم مع العلم انن...
احجز الان في كورس ممارس التنويم الايحائي سيتم تد...
views 194
احجز الان في كورس ممارس التنويم الايحائي سيتم تدريبك على أحدث التقنيات الخاصة بالتنويم الإيحائي في العالم لتقوم بتطبيقها على نفسك والاخرين . ستتعل...
لكل المتواجدين معانا بكورس مارس 2017 الحالي (فقط) ...
views 117
لكل المتواجدين معانا بكورس مارس 2017 الحالي (فقط) يرجى الاشتراك بجروب الدفعة من هنا : https://www.facebook.com/groups/1854671191466133/18546729381...
من فتره كنت باخد كورس للتنويم الايحائي ، اتطلب منن...
views 31
من فتره كنت باخد كورس للتنويم الايحائي ، اتطلب مننا اننا نقرا مجموعة كتب مقسمه على اسبوعين .. الكتاب كان حجمه كبير ، وكنت بقول لنفسي انا هلحق امتى اقر...
الأحباب بالأردن 🌷🌷 سعيد جدا للاهتمام المتزايد من ...
views 140
الأحباب بالأردن 🌷🌷 سعيد جدا للاهتمام المتزايد من الإخوة بالأردن لحجز محاضرة "الاقناع والتأثير النفسي" اشوفكم على خير في المملكة الاردنية ، فندق ايا...
عايز تنسى حد او تتخطى تجربة عاطفية ؟ ركز في الفيدي...
views 104
عايز تنسى حد او تتخطى تجربة عاطفية ؟ ركز في الفيديو ده للآخر | نهاد رجب انضم للصفحة وادعوا اصدقائك للاستفادة. الصفحة الرسمية للمدرب والمعالج نهاد رجب ...
Thank you Dr. Royle for accepting my invitation to...
views 80
Thank you Dr. Royle for accepting my invitation to train my trainees in Egypt Online , we loved you so much , and we really hope you'd accept more and...

About the author

nihadragab