كنّا طالعين جبل موسى ، في سانت كاترين من أسبوع او اكتر . عشرات من الناس عايزين يوصلوا للقمة لسبب ما . كل واحد عنده هدفه . الجبل ارتفاعه ٢٣٠٠ متر وصعوده بيتطلب منك تمشي حوالي ٧ كيلو للأعلى

المشكلة كانت في اول ٦ كيلو ، الطريق مش ممهد والحجر كان مرتفع وكنت شايل على ضهري شنطة تقيلة وبتنفس زي الخيل ورجلي بتوجعني والدنيا تلج وكانت بالسالب مع رياح والدنيا ضلمة وانت مش شايف حاجة قدامك غير كشاف بينور اتنين متر قدامك .

الجمال نازلة في وشك وتحذيرات قوية جدا انك متوجهش الإضاءة لعيون الجمال لانها ممكن تإذيك ولازم توجهها للأرض وتمشي وترفع رجلك فوق حجارة مرتفعة وشاقة جدا .

الناس وراك وقدامك بتطلع وصعب تلاقي حد بيتكلم علشان لو حد أتكلم طاقته هتتسرق منه وكله كان ساكت ما عدا الناس اللي كانت متعودة تطلع .

كنت مرهق جدا وعارف اني مقدرش أقف مكاني او حتى ارجع الأتوبيس .

وفجأة حصلت المعجزة وسمعت ان خلاص يا جماعه احنا فاضلنا سلم هنطلعه وهو عبارة عن ٧٥٠ وسلمة ونوصل للقمة . انا فرحت وبدات رحلة الصعود

افتكرت ان اسهل حاجة في الجبل هو السلم علشان اكتشف انه كان اصعب مرحلة في اليوم كله . السلم ارتفاعه ممكن يخليك تزحف علشان تطلعه وسط ما عضلات رجلك بتشد ، متقدرش تقف تستريح لان يمين وشمال السلم انت عارف ان مفيش حاجة وسهل جدا انك تقع . ومحدش حتى هيعرف يلحقك

كل سلمة كانت معاناة وفي اول فرص للاستراحة كنت بتقتنصها حتى لو هتقف ثانية وتكمل تاني

وتبدا تعد السلالم وتعدي ال ١٠٠ وتكتشف ان لسة فاضل ٧٠٠ ! وتكتشف انك كنت بتعد غلط

مفيش اي مجال للتراجع ، الكشاف نوره بيضعف شوية شوية لحد ما تكتشف انه اتقفل تماما .. بتمشي بانعكاس ضوء الكشافات اللي لسة شغالة ، الموضوع بيبقى أخطر اكتر واكتر . وبتفتكر أية “انظرونا نقتبس من نوركم” وبتحس انها بتنطبق عليك حرفيا . وفي عز كل الأحداث بتفكر انت ايه اللي جابك هنا ! ولحظات تعدي .. مشاعر بكل أنواعها ! جسمك عايز يرتاح ، ينام ، يأكل ، يستجيب لنداء الطبيعة ، يقع حتى لو ده هينقذه من هلاك التعب وتمر لحظات تانية تفكر فيها في حياتك بالكامل وتعيد ترتيبها والندم ع قرارات واكتشاف تفاهة نجاحات تانية … وتمر لحظات …

وفجأة … القمة

تبص بصة عميقة للسما وضوء الشمس اللي انت اول واحد يشوفه في العالم . وتغمض عينك وتنام وتصحى تاني وتبدا عملية الهبوط .

تبص للمسافة اللي هتنزلها والأماكن اللي هتمشي منها ، ألاقي نفسي بقول انا لو كنت شايف المنظر ده وإني هطلع كنت اترعبت . بصيت حواليا لاقيت قمم جبال عالية وسحب تنتصف جبال وأشوف الجبل اللي يقال ان سيدنا موسى تكلم مع ربنا عنده . فالاقي لساني بيردد “تكاد السموات يتفطرن منه وتنشق الارض وتخر الجبال هدا .. ان دعوا للرحمن ولدا” “لا اله الا الله .. لا اله الا الله” والاقي الدموع بتنزل من عيني من غير حساب . واكتشفت انا اد ايه صغير جدا وان الله عظيم .

واقرا سورة طه بصوت انا بسمعه وسط الجبال في طريقي للنزول ، والدموع مش بتقف وصوتي متحشرج . وانا مستغرب انا ازاي بعيط وانا مش مدرك او مقرر ده !

واكتشف ان جسمي لِيه رأي تاني وإني ولو كنت أفجر أهل الارض ، جسمك بيخر ساجدا لله عز وجل غصب عنك .

أوصل للأرض وابص ورايا . الجبل ضخم وقوي وألقي نظرة وامشي وارجع للدنيا إنسان تاني

عرفت اجابة سؤال “ايه اللي جابك هنا”
وعايز ارجع تاني !

نهاد رجب
مؤسسة المنظمة العالمية للتنويم الايحائي
ممارس معتمد للتنويم الايحائي معتمد من الأكاديمية الامريكية للتنويم الايحائي ، نيوميكسكو ، الولايات المتحدة الامريكية




Source

مقالات مرتبطة

كلنا عارفين ان عقلك اللواعي المسئول عن التصرف المع...
views 262
كلنا عارفين ان عقلك اللواعي المسئول عن التصرف المعروف بال Fight or flight او بالعربي "الهجوم او الهروب" الاتنين هاء وده مسئول عن حمايتك من الخطر ،...
الناس فاكرة ان التنويم الإيحائي يقتصر على “غ...
views 388
الناس فاكرة ان التنويم الإيحائي يقتصر على "غمض عينك" ... "استرخي بعمق" وده فعلا ليه طرقه وتقنياته ، بس تعاملي مع التنويم الإيحائي عمره ما كان كده . ...
الكمال موجود بداخلك وتعيشه في كل لحظة الحياة على...
views 203
الكمال موجود بداخلك وتعيشه في كل لحظة الحياة على بعد خطوات او هي الخطوات او البعد لا داعي للبحث وأبدا في الحياة الان كما تريد متى أردت Sourc...
وهم البحث عن الشخص الكامل ! نهاد رجب...
views 3126
  خدعوك فقالوا احنا بنبحث عن الشخص المثالي او الشخصية المثالية !  احنا في حقيقة الامر بنبحث عن المعادلة الاتية :  شخص مظهره مظهر الكمال ، فيه...
اليوم محاضره دكتور عمر عبدالكافي في باريس. تابع...
views 174
اليوم محاضره دكتور عمر عبدالكافي في باريس. تابعوني على السناب شات لحظة بلحظه nihadragab Source...
انت مش مسئول عن العالم الخارجي ، انت مسئول عن نفسك...
views 53
انت مش مسئول عن العالم الخارجي ، انت مسئول عن نفسك اللي بتفسر العالم الخارجي بأفكار تسببلك مشاعر تأثر عليك انت شخصيا . توقف عن محاولتك لتغيير العالم ...
العلم رزق والرزق بيجيب رزق اتعلم كل ما تحس انك ...
views 57
العلم رزق والرزق بيجيب رزق اتعلم كل ما تحس انك اتزنقت اتعلم اكتر خلي عندك الأسباب (العلم) ربنا يجعلك سبب لعبيده ويزيد رزقك Source...
والله ما علمت عنها الا خيرا وأولادها من أفضل وأخي...
views 599
والله ما علمت عنها الا خيرا وأولادها من أفضل وأخير الناس انتقلت الى رحمة الله والدة الاستاذ مصطفى عناني وأحمد عناني اللهم طمئن قلبها وثبت قلوب اَهل...
تم الانتهاء دبلوم التنويم الإيحائي في تونس ، سوسة ...
views 207
تم الانتهاء دبلوم التنويم الإيحائي في تونس ، سوسة في قاعة فندق رويال سالم ، بتنظيم مركز المتفائل للتدريب والاستشارات استمتعت جدا بالجودة التنظيمية ...

About the author

nihadragab