بحضر لممارس التنويم بالإيحاء (المرحلة الثانية) .. وكالعادة ببدأ من جديد

التنويم بالإيحاء هو أقوى تقنيات الدعم النفسي ، من وجهة نظري ومن خلال الفيدباك الخاص بالعملاء والمستفيدين .. والجميل فيه انه تقريبا المنهج الوحيد اللى يينشأ بينه وبينك علاقة انسانية فيها حب وشغف .. ببساطة لإني بعتبره مفتوح المصادر ، كل مدرب في العالم عنده تعريف خاص بيه للتنويم وكل شخص بيدخل في الحالة بيكون عنده تعريف خاص بيه هو شخصيا . بس طبعا فيه تعريف متفق عليه وموثق عند الحكومات والمؤسسات الطبية . لكن في النهاية هتحس دايما ان تجربتك الشخصية بتخليك تزود او تعدل من التعريف بما يتناسب مع مفهومك الخاص المبني على تجربتك الشخصية .

التنويم بالإيحاء انبثق منه البرمجة العصبية وتقريبا 80% من العناوين الرئيسية لأغلب التقنيات اللي بيتم تدريبها حاليها ، ريتشارد باندلر مؤسس البرمجة العصبية شخصيا ملقب ب ملك التنويم بالإيحاء ، وهو اللى فهم الناس الخدعة لما قال ان التنويم بالإيحاء هو الأصل ووصفه بال Big umbrella لباقي المناهج المختلفة التانية .

بدأت التنويم بالإيحاء في 2006 مع العالمي ورائد التنمية البشرية دكتور ابراهيم الفقي ، باب اتفتح ليا وادمنته وعديت على كل الاراء اللى قالتلي بلاش ، ده مش معروف ، ده عليه هجوم ، ده كذا وكذا وكذا وحسيت لسبب ما ان كل الاسباب اللى دفعت الناس انها تنصحني اسيبه واتجه لعلم تاني ، هي نفس الاسباب اللى كانت امتياز ليا بعد كده ..

سيبت حياتي كلها واتجهت ليه ، سيبت شغلي وسيبت نفسي وطموحي اني اشتغل في خدمة عملا فودافون علشان اتجوز من سنين فاتت ، ودلوقتي بقيت معتمد من اكبر مؤسسات التنويم بالإيحاء ودربت في حوالي 10 دول وبقى من الطبيعي انك تدور على الانترنت عن التنويم بالإيحاء فيظهر قدامك اغلب النتايج مرتبطة بيا بشكل او بآخر . عملت كل حاجة انا كان نفسي اعملها وحققت كل هدف انا كنت بسعى ليه ولله الحمد والشكر . وكل دقيقة زيادة في حياتي بتشجعني اني اكمل اكتر واكتر . التنويم الإيحائي بعتبره إسمي ، او عربيتي او اللاب توب بتاعي ، حاجة تستحق اني اموت علشانها واعيش علشان انشرها ولو قدر الله لي لحياة تانية وتالتة اعتقد ان اختياراتي في حيواتي الجديدة مش هتختلف كتير .

ناس بتقولي ان التنويم دجل وشعوذة وبضحك ساعتها لإني مش مضطر احكي عن ناس تانية غيري ، انا شايف نفسي اتحولت من درجة ل 180 ، وبعافر علشان الناس تفهم ده . يمكن علشان كده ناوي اترجم التنويم باللايحاء للغة العربية . insatiable هي الكلمة الانسب لشعوري تجاهه دلوقتي . وحتى لما بدخل وبدعبس على الانترنت عن اي منهج جديد ، ده علشان استخدمه في جلسات التنويم الايحائي .

في البداية كانت الكلمة ، جملة مكتوبة في الانجيل ومعناها مذكور في القرآن ، آمنت جدا بقوة الكلمة في التغيير والتأثير والتعديل والبناء وحتى الهدم والدمار ، والتنويم بالإيحاء مبني بالكامل على الكلمة ، وتأثيرها .. بس امتى نقولها هي ديه المهارة اللي بتتعلمها ..

صديق ليا قالي ان في العربيات المانوال تقدر تغير السرعة من غير ماتدوس دبرياج ! امتى؟! قالي لما تحس ان عربيتك وصلت للسرعة المناسبة ساعتها بتغير من غير ماتدوس دبرياج .. ساعات بتعامل مع التنويم بنفس الطريقة ، بتراقب ، بتشوف ، بتختبر المستفيد ، وبتعرف انهي كلمة مناسبة وانهي كلمة لا ، وعقلك بيلهمك بكلام لو كنت حضرته مكنتش هتقوله بالتلقائية ديه . سحر غير عادي . بتحس وكإنك بتعوم جوا الموجات العقلية للمستفيد ، هنا ترمي نيستد لوبس ، وهنا ترمي مجاز ، وهنا ترمي قصة زيادة وهنا انماط لغوية ودلوقتي اقتراحات مباشرة وهنا تقف ووقفتك بسكون كلامك انت نفسك بتحس بتأثيره على المستفيد . عارف لما واحد يلعب كورة ويبدأ يرقص الكورة ؟ اهو حاجة عاملة زي كده ، بنعمل كده علشان نجيب جون ونعدي الكريتكال فاكتور وهوب تدخل اقتراحاتنا للعقل الباطن واللى للاسف Lazy Mind فبنعافر علشان في النهاية احنا والمستفيد نكسب المباراة .

علشان كده في ممارس التنويم بالإيحاء انا ناوي ابهر المتدربين .. ناوي نوصل بالتنويم بالإيحاء لآفاق أبعد ، نلمس السطح .. وهنتعلم حاجات منها :

الاسترجاع في العمر
علاج المخاوف
علاج ضعف الثقة بالنفس
علاج الصدمات
علاج وكسر الروابط العاطفية
الهيبتنوتيك سيل
الشخصية التنويمية و 23 عنصر ليها ! ازاي حرفيا تبقى انت اصلا مؤثر وديه معروفة بلفظ المسمرية .
كسر الاعتقادات بقى والمجازات والقصص المتداخلة و الانماط اللغوية وبراعة الفم
و و و محادثة ما قبل التنويم الكاملة ، وحاجات تانية اكتر واكتر .

هيكون كورس تدريبي غير عادي ، انا منحاز للتنويم ، انا غير عادل فيما يخص الرأي تجاه التنويم ، انا غير محايد ، انا نهاد رجب انا متطرف فيما يخص التنويم بالإيحاء .

أيامكم كلها حلوة وجميلة كالعادة ، واشوفكم على خير وشكرا لكل متدربين التنويم بالإيحاء واعتذر عن التأخير المقصود وليس غير المقصود ، واشوفكم على خير في أقوى الخبرات اللى هتغير حياتكم وحياة الناس اللى بتحبوهم بالكامل .

نهاد رجب

مقالات مرتبطة

سؤال حول التنويم الذاتي والرمزية في التنويم بالايح...
views 596
استفسار ما هى افضل طريقه يمكن استخدامها فى التنويم الذاتى 1 / النقطه الوسطى 2 / البطاريه الكونيه 3 / طريقه اعطاء وقت للعقل الباطن وما رأيك بكتا...
الأزهر يجيز كتابًا يبيح التنويم المغناطيسي بشروط ش...
views 6182
أجاز مجمع البحوث الإسلامية بالأزهر الشريف كتاب يجيز استخدام التنومي المغناطيسي في العلاج، ويحرم قانون الجذب، حيث حمل الكتاب عنوان المنهج الإ...
العلاج بطريقة الكرسي التخيلي والعلاج بطريقة فراش ا...
views 1336
العلاج بطريقة الكرسي التخيلي والعلاج بطريقة فراش الموت في التنويم الإيحائي لاشك أن من أفضل التقنيات التي تعلمتها هي الدعم النفسي للمستفيد من خلال هذه...
التنويم بالإيحاء وإرباك الوعي لـ نهاد رجب...
views 1897
من أهم عناصر التنويم بالإيحاء هو الإسترخاء الذهني وهو عملية نقوم فيها بإرخاء العقل من أجل تقبل الاقتراحات الموجهه له ، وفي حقيقة الأمر فالاسترخاء الذه...
حوار مجلة السياسة الكويتية | التنويم المغناطيسي… ع...
views 2113
معترف به دولياً… واستخدامه في العلاج العضوي من ضروب الخيال يساعد في الخروج من الأزمات ويحقق حالة من الهدوء والراحة النفسية والاسترخاء الذهني است...
ما هو التنويم بالإيحاء الإيحائي لـ نهاد رجب...
views 475
بحضر لممارس التنويم بالإيحاء (المرحلة الثانية) .. وكالعادة ببدأ من جديد   التنويم بالإيحاء هو أقوى تقنيات الدعم النفسي ، من وجهة نظري ومن...
استفيد من التفاصيل – نهاد رجب...
views 522
  مستفيد في جلسة تنويم بالايحاء بيحكيلي مشكلته وفي نهاية كلامه بيقولي انت مصدقني ؟ قولتله انا مصدقك ولو غيرت كلامك هصدقك ولو رجعت غيرته بعد ...
الناس فاكرة ان التنويم الإيحائي يقتصر على “غ...
views 354
الناس فاكرة ان التنويم الإيحائي يقتصر على "غمض عينك" ... "استرخي بعمق" وده فعلا ليه طرقه وتقنياته ، بس تعاملي مع التنويم الإيحائي عمره ما كان كده . ...
الاكثر اقتناعا هم الاكثر مقاومة...
views 560
  يوم عن يوم ، الايام بتثبت ان الأكثر اقتناعا وفهما للتنويم هو الأكثر مقاومة للتأثير السلبي له وهؤلاء من هما يرفضونه هم الاكثر تأثرا به نهاد ر...
بداية من اغسطس ٢٠١٧ تقرر عمل مقابلات مع المهتمين ب...
views 91
بداية من اغسطس ٢٠١٧ تقرر عمل مقابلات مع المهتمين بالحجز لكورس ممارس التنويم الايحائي مع الاحتفاظ بحق رفض كل من لا تتوافر فيه الشروط التي سيتم الاعلان ...

About the author

nihadragab