انت موبينيل ؟ لا انا نهاد رجب
 
الجميل في تسويق موبينيل وفودافون واتصالات مع اني مستقل طريقتهم في الدعاية ، انهم كمنتج شغال بفلوسنا ، قدروا انهم يخلونا شغالين عندهم ، يعني يمكن تستصعب ان حد يسألك “انت بيرسيل ولا إريال” ؟ او “إنت بيبسي ولا بيريل ؟
 
السؤال مش راكب ، تحسه تقيل على اللسان والفهم ، لكن “إنت موبينيل ولا فودافون” ؟ سهل جدا ومنطقي ودايما فيه اجابة سريعة “انا موبينيل” او “انا فودافون” ..
 
النوع ده من التسويق بيكون قوي جدا لإنهم كشركات اتصال مش بس قدروا انهم يخلوا العميل يشتري الخط بتاعهم او يشترك في خدماتهم ، هما بيعملوا اللى اصعب من كده معتمدين على سيكولوجية المجتمع المصري اللى متغيرتش من عقود ، يعني ايه الكلام ده ؟
 
يعني بمنتهى البساطة كل شركات العالم لما تحب تعمل عروض ، بترخص السعر ، او بتدي دقايق خرافية ، او بتزود سرعة الانترنت ، الخ .. وده في حالة ازدهار الشركة وازدهار اقتصاد الدولة ، قطر مثلا ب 100 ريال قطري تقريبا بيديلك نص ساعة دولي ومحلي مفتوح وانترنت مفتوح وسرعة قصوى .. لكن هنا في مصر ، الموضوع مختلف ..
 
زي ما شركات العالم بتعمل عروض مع ازدهارهم ، احنا عندنا في مصر بنتعامل بطريقة “كل ما الاسعار ترخص ، غلي الخدمات” ، وكل ما الناس تشتري ، ارفع السعر ، وكل ما الموارد تزيد اضرب السعر مرتين وتلاتة وضاعفه ، يعني خليني اسالك مثلا ، عمرك سمعت عن سلعة غليت ورخصت تاني ؟ مستحيل .. على حد علمي .
 
ليه بقى ده بيحصل ؟
 
نرجع تاني لقطر (ربنا يكرمنا كلنا ونروح هناك) ، القطريين كبشر مختلفين في التعامل مع الدنيا والظروف ، يعني اختياراتهم اكتر ، مبيرضوش بالأقل ، حتى في التعامل معاك بطبيعتهم صعب يقبلوا لنفسهم الأقل مهما كان السبب . وعلى فكرة ممكن يعملوا ده من غير ما يقرروا بس هما شايفين ان ده الطبيعي جدا وحتى مش بيتجادلوا ان ده حقهم او لا ، ده الطبيعي !
 
هنا في مصر ، الموضوع مختلف ، لما عملت تجربة قبل كده مع الأخوة ، وجيت عند رصيف واسع وممر للمشاه ، وحطيت شارة صفرا بعرض الرصيف وثبتها فكانت بتمنع اللي عايز يطلع على الرصيف من انه يكمل طريقه زي كل يوم ، وكانت المفجأة لما لاقيت الناس بتعمل اكتر من تصرف علشان يكملوا طريقهم على الرصيف ، فيه اللى نزل من على الرصيف خالص وفيه اللى جيه عند الشارة الصفرا ووطى وعدى من تحتها ..
 
احنا شعب متكيف جدا ، بيطلع يطلع يطلع وينزل على مفيش ، وديه المفروض تكون صفة حلوة في الناس بس للأسف ديه صفة قبيحة جدا ! مش حلو ان الناس بتقول عليك “هو عصبي بس بيهدى بسرعة” انت عمليا “بتدرك المشكلة بس بتتكيف معاها بسرعة” ..
 
ومن النقطة ديه كشعب متكيف بطبعه ، قدرت الشركات انها تتحكم فينا ، واللى سهل عليها بقى حاجة كمان ، هقولهالكم دلوقتي ..
 
انا دلوقتي شبكة اتصالات جديدة جات مصر ، طبيعي انزل باحسن عرض عندي ، صح ؟ اكيد ! عايز انافس ، الناس هتبدأ تحبني ، (افتكروا اتصالات زمان) ، هيبدأوا يشتروا خدماتي ، ويرتبطوا بيا ، وبشكل تدريجي اوقف العروض واعلي السعر وابقى زيي زي اي شركة تانية ، السؤال الناس هتحس بحاجة ؟ لأ ! ليه بقى ؟ لإنك مشيت تاتا تاتا ، طيب اعمل ايه بعد كده ؟ ابدا اعلي الاسعار اكتر ، الناس برضه هتكمل معاك ، واللى هياخد باله من كده مش هيحط في دماغه (متكيف) علشان هو لسة محتفظ بفكرته عنك القديمة (احنا شعب بيصون العشرة) وهيفضل يعتقد ويأمل انك ترجع زي ماكنت وأحسن ، الموضوع خلص هنا ؟ لأ !
 
بص بقى ، هتبدأ الشركة الجديدة تنزل الاسعار لنقطة وسط ، لا عالية ولا رخيصة ، ولما الاسعار تنزل ، لنقطة (هي نسبيا اغلى طبعا من اول مرة زمان) الناس هتحس براحة (على اعتقاد انهم كده اثبتوا صحة اعتقادهم في الشركة) وده هما اضحك عليهم ولا صحة ولا حاجة ، الموضوع خلص كده ؟ لا طبعا ! هتبدأ الشركة تعلي سعرها اكتر من المرة السابقة ، وبعد كده ترجعه شوية للسعر اللى كان اغلى بكتير في البداية ..
 
حسيتك تهت مني .. انا هفسرهالك علشان تصدقني لما اقولك انه شعب متكيف ..
 
لو معاك طبق كشري تمنه 2 جنيه
وجيه المطعم خلى تمنه 3 وبعد كده 4 ثم 5 ثم 6 جنيه
وثبت على 6 جنيه لفترة
(هتبدأ تقول ايه ده هو السعر غلي ليه ! ) وتبدأ تزمزء
يقوم منزل السعر 4 جنيه
تقوم فرحان وتقول “انا كنت متأكد ان المطعم ده كويس”
يقومل ثابت على 4 جنيه فترة وبعد كده يرفعه ل 7 جنيه
تقوم تزمزء
يقوم منزله ل 5
تقوم مرتاح وواخد نفسك
 
انت عارف النقطة ايه بقى ؟ انه من البداية كان عايز يخليه ب 5 جنيه اصلا !
 
وبناءا على اننا شعب فيه الخصل الاتية :
 
بيصون العشرة
شعب متكيف
عصبي بس قلبه ابيض وكيوت وبينزل على مفيش
 
بتبدأ شركات زي موبينيل واتصالات وفودافون ، تستغلك اسوأ استغلال ، بس استنى !
مش الشركات بس اللى بتعمل كده ، مطاعم الكشري زي ماشوفنا ، المحلات ، الناس في الشوارع
 
عارف ليه ؟ انا مش عارف فلو عارف قولي بس اغلبنا بيحب الأذية . ومشهورين بجملة “اللى مش عاجبه ينزل يركب تاكسي”
 
الجملة اللى بتثبت المايكروباص كله وبتخليه يسمع كلام السواق ، اللى هو اصلا ميقدرش يطلع بواحد ناقص ، ونسينا انه هو اللى محتاجنا مش احنا اللى محتاجينه
 
اتمنى تكون المقالة عجبتكم يا شعب بيطلع وبينزل على مفيش
 
نهاد رجب
اللى بيصون العشرة .

مقالات مرتبطة

قانون التأثير المعاكس- تنويم ضمنى...
views 2030
  حاول على اد ماتقدر انك متشوفش الحروف المكتوبة ، حاول ، انت مش مضطر انك تشوفهم بس حاول وانا عارف انك لو حاولت مش هتقدر وكل ماهتعافر وتحاول هتفش...
عايز تنيم حد ضمنيا؟ ثبتة
views 1394
  بيقولوا ان التنويم الايحائي صعب ، وان الواحد لو نام ممكن يقول اسرار خطيرة المفروض ميقولهاش ، او انه ممكن يموت او يدخل في غيبوبة ، او ينسى مثلا...
من ضمن طرق التسويق انك تتابع بعض الناس .. #نهاد_رج...
views 1438
من ضمن طرق التسويق انك تتابع بعض الناس .. يعني ايه الكلام ده ؟ كلنا عارفين شخص ما في حياتنا ، تقيل في اعجابه بالاشياء ، صعب انك تشد انتباهه ولسانه...
تأثير الغموض فى الاقناع النفسى...
views 1246
  واحد كان بيشتغل في شركة أمريكية وخلاص عايز يسيبها علشان يروح شركة تانية ، المفروض انه بيقول انها احسن وانضف وحتى بيدوا فلوس اكتر ، بس علشان ي...
كيف يتم توجيه عقول الناس وغسيل المخ (كورس اونلاين ...
views 4218
لتحميل العرض الباوربوينت الخاص بالفيديو : www.nihadragab.com/lectures/NihadRagabArtofinfluencing.pptx في هذه المحاضرة تتعرف على بعض من الطرق التي يت...
حتى الانسان يقدر يتلون- غسيل المخ بالتنويم الضمنى...
views 1483
  تقدر تإذي حد ؟ او تسرقه؟ تعذبه ؟ لو كانت الاجابة على التلات اسئلة بلأ يبقى اقرى المقالة واعرف حاجة غريبة عن نفسك .. ولو كانت بأيوة "لو ه...
الإقناع بكسر الشخصية
views 1421
كسر الشخصية هي طريقة مستخدمة لهدم شخصية شخص ما او كينونة مجموعة من الاشخاص .. والطريقة ديه ببساطة بتخليك تقدر تخلي اكثر الاشخاص صعوبة بيقع وبيتكسر ...
منافسة كوكاكولا وبيبسي الاعلانية...
views 566
  عبقرية اختيار الكلمات والرد المفحم قامت شركة المشروبات الغازية المعروفة بيبسي في احدى اعلاناتها المنافسة لكوكاكولا (بمناسبة الاحتفال بعيد...
5 خطوات لكشف كذب الآخرين لـ نهاد رجب...
views 5660
قبل أن نبدأ دعونا نتفق "إن بعض الظن إثم"  وهذا معناه عزيزي القارىء أن هذه الخطوات التي أنا بصدد أن أعرضها عليك ، ومهما بلغت من علم ولكنها في النهاي...
فن الاقناع والتواصل الفعال
views 799
  الإقناع ، مهارة عايزينها، حتى انت ، ممكن علشان كده بتقرى المقالة ديه دلوقتي او هتهتم انك تعرف ان فيه برنامج لفن الاقناع والتواصل هيبدأ قريب ، ...

About the author

nihadragab

Leave a Comment