الصدفة في حياتي

reflecting on my life

اكتشفت ان الصدفة ليها وجود عجيب لو مهتم اعرفها لو مش مهتم تقدر تقراها وكإنك مش مهتم وكده

انا عندي 29 سنه ، واسمي نهاد رجب ، مكنش ليا اي ارادة في اختيار اسمي ، (واضح طبعا) ..

بس انا بكلمكم دلوقتي من اللاب ، بعد 29 سنة ، متجوز من سنة ونص تقريبا ، مدرب للتنويم بالايحاء ومؤسس منهج التنويم الضمني ..

في البداية … لا لا ولا اقولكم .. في النهاية قصة جوازي كانت صدفة

غادة سمعتلي جلسة بالصدفة ، شافتني عالفيسبوك بعدها بشهور بالصدفة ، كلمتها بالصدفة ، وطلعت ساكنه جمبي صدفة . وكانت قبلها بكتير في محاضرة بالصدفة وواحد صديق قالها تحضرلي صدفة وهي محضرتش برضه بالصدفة ..

— قبلها بشوية …

التدريب ..

كنت في محاضرة مع صديق ليا بالصدفة ، واختارني المدرب اقول كلمة بالصدفة ، فاتعرفت على التوستماسترز بالصدفة واتعلمت التدريب بالصدفة .. شافني كذا منظم بالصدفة ، قابلني ناس في كورسات بالصدفة ، وبدات ادرب بالصدفة ..

— نرجع بضهرنا شوية اكتر ..

التنويم بالايحاء ..

في 2006 اتفركشت خطوبتي الاولى بالصدفة ، ومشيت في شارع عجيب بالصدفة ، اتصادفت مع واحدة ست قاعدة بالصدفة ، وبتبيع كتب لاقيتها صدفة ، وسط الكتب عنيا وقعت بالصدفة على كتاب لدكتور ابراهيم الفقي بالصدفة ، وبالصدفة اكتشفت ان الكتاب بيتكلم عن مشاكل كانت عندي ، حبيت دكتور ابراهيم ولاقيت موقعه على الانترنت بالصدفة ، بعت لمنظمين دوراته ايميل وقالولي انهم شافوه بالصدفة ، اتفقنا ، وقالولي اختار اي كورس تحرضه لدكتور ابراهيم الفقي ، فاخترت التنويم بالايحاء بالصدفة ..

— وقبلها بحبة …

تصميم مواقع الانترنت …

كنت مع مصطفى علي بالصدفة ، دخلنا انترنت كافيه بالصدفة ، واتفتح قدامنا باب ال Free website templates بالصدفة ، حسيت ان ده المجال بتاعي بالصدفة ، ودخلت فيه بالصدفة ، اتكعبلت في موقع للشعر العربي بالصدفة وبعتلهم ايميل بتصميم جديد لموقعهم وبرضوا شافوا الايميل بالصدفة .. وافقوا على تصميمي وبدات اتعرف بالصدفة على عملا تانيين كانوا عايزين يصممموا مواقعهم برضه بالصدفة ..

— قبل كده بشوية ..

اكاديمية المقطم قسم لغات وترجمه ..

انا جبت في ثانوية عامة 65% ، وبالصدفة دخلت خدمه اجتماعيه ، ومعجبتنيش فخرجت منها واتفقت مع ابويا الله يرحمه اني مش هكمل غير كورسات كمبيوتر واسافر برة مصر ، ابويا وافق ، وبالصدفة ابويا مات في نفس اليوم ، قررت ادور على اكاديمية واكمل تعليمي وبالصدفة سمعت عن اكاديمية المقطم للكمبيوتر ، ودخلت المعهد بالصدفة ، وعرفت بالصدفة ان مجموعي اقل من كمبيوتر ، فبالصدفة كان فيه واحد من الادارة معدي بالصدفة ، عرض عليا ادخل لغات وترجمة وقبلت ودخلت انجليزي بالصدفة ..

— قبل كده بشويتين …

اتولدت لأب مصري وجد تركي في عيله يملؤها الاتراك وبالصدفة كان اسم نهاد مشهور ، فسموني نهاد .. وعشت حياتي بعدها مستاء من اسمي العجيب اللى يدي على ولد وبنت ومسلم ومسيحي …

بس خلونا نقرا الصدفة …

لولا ان ابوي مات مكنتش اكاديمية ولولا ان الراجل الاداري معدي مكنتش دخلت لغات وترجمه مكنتش عرفت انجليزي ، ولولا اني عرفت شوية انجليزي ولولا الانجليزي واننا انا ومصطفى دخلنا الانترنت كافيه اللى في شارع خيرت ، مكنتش دخلت في تصميم مواقع الانترنت اللى كل كورساته بالانجليزي ولولا اني بقيت مصمم مواقع انترنت مكنتش عرفت اعيد تصميم موقع دكتور ابراهيم الفقي واخد كورس من كورساته ولولا اني فركشت قبلها بحبه ومشيت من الشارع العجيب مكنتش شوفت كتاب دكتور ابراهيم الفقي ، ولولا انهم شافوا الايميل مكنوش بعتولي ولولا اني اخترت التنويم بالايحاء مكنتش عملت جلسات تنويم ولولا الجلسات والتنويم واني كنت مع صديقي في المحاضرة ديه مكنتش قدرت ادرب ولولا اني بدات ادرب بعد ماعرفت التوستماسترز والسي سي تي طبعا مكنتش عملت قناة ليا على اليوتيوب وعملت فيها جلسات تنويم بالايحاء ولولا كل ده مكنتش غادة سمعتني في جلسة على الانترنت واتجوزنا ..

كل ده وعايز تقنعني انه ده كان صدفة ؟

لحظة واحدة : لولا ان اسمي نهاد ، مكنتش اتميزت عن باقي المدربين التانيين بالاسم ، واغلب الناس عارفة ان اسمي كان السبب في سهوله تذكره وبالتالي كان اسهل الوصول ليا .

مفيش صدفة 🙂

 

نهاد رجب

مقالات مرتبطة

عايز مليون جنيه ؟ #نهاد_رجب
views 8220
عايز مليون جنيه ؟   خد مليون جنيه انا عارف انك مش مصدقني بس انا مش بضحك عليك والله خد مليون جنيه دلوقتي .. الحاجة الوحيدة اللي هتفرق ان الف...
النهاردة بداية الأسبوع التالت والأخير من كورس ممار...
views 21
النهاردة بداية الأسبوع التالت والأخير من كورس ممارس التنويم الايحائي في القاهرة حبيتكم جدا واستمتعت بوجودي معاكم جدا جدا جدا وايها العالم الجميل ا...
معنى الحرية #نهاد_رجب نهاد رجب...
views 2054
أن تكون حرا هو أن لا تسمع إلا صوتك والذي يأمرك بالنهوض في الوقت الذي يتكاتف فيه الناس لإيقافك بأصواتهم هو أن تلتزم بوعدك وأنت تعلم أنك غير مجبر ...
تم الانتهاء دبلوم التنويم الإيحائي في تونس ، سوسة ...
views 133
تم الانتهاء دبلوم التنويم الإيحائي في تونس ، سوسة في قاعة فندق رويال سالم ، بتنظيم مركز المتفائل للتدريب والاستشارات استمتعت جدا بالجودة التنظيمية ...
هل انت داعش؟
views 1138
    داعش من خلال رؤيتي للموقف اكتشفت الاتي : داعش مش مخيفه علشان بتقتل الناس ، داعش مخيفة علشان مجموعه الناس ديه كانت بالشجاعه انها ...
ناس
views 1816
  الانسان ده غريب ، عنده قدرة بشعة انه يحب اين كان حتى لو مكنش فاهمه او عارف هو ايه. تلاقي واحد بيحب قطة وواحدة بتحب كلب وواحد بيحب واحدة شافها ...
بجهز لكورس التنويم الايحائي الجديد (مارس ٢٠١٧) أح...
views 158
بجهز لكورس التنويم الايحائي الجديد (مارس ٢٠١٧) أحب اقولكم وداعا لل showmanship ووداعا للتنمية البشرية ❤️ الكورس الجديد نظامه غير اي كورس تعرفه عن ال...
عقلك الباطن هيعملك اللي انت عايزه واللي انت مش عا...
views 73
عقلك الباطن هيعملك اللي انت عايزه واللي انت مش عايزه الطاقة اللي بتربطها بالشئ هتحركة في اتجاه تركيزك مش مهم حاطط بنزين ٩٢ ولا ٨٥ ، السواق هو اللي...
كلنا بنحاول ننتصر على منافسينا الاحباط الحقيقي لم...
views 133
كلنا بنحاول ننتصر على منافسينا الاحباط الحقيقي لما ننجح ونكتشف اننا بقينا لوحدنا في فضاء شاسع من غيرهم تمني الشر لعدوك مش هينفعك لو اختفى فعلا من ح...

About the author

nihadragab

Leave a Comment