هستعرض معاكم النهاردة ، فكرة جديدة مطورة من افكار التنويم الضمني ، بعض منكم اتعرف على التنويم الضمني وجاتله فرصه انه يتعرف على المجال الواسع ده الي بيؤهلك انك تقدر تخلي حد يفكر بدماغك وتخليه يقتنع بالكلام الي بتقوله عن طريق كلامك والفاظك والتقنيات المستخدمة في حوارك وناس كتير اوي راسلوني بتجارب تحفة مع التنويم الضمني والاقناع النفسي.. اما بالنسبة للي مجتلوش فرصة انه يتعرف على التنويم الضمني ، فهو باختصار القدرة على الاقناع والتأثير باستخدام تقنيات نفسية عالمية في حالة التنويم الضمني ، والمرة ديه هتكلم عن تقنية في الاقناع اسمها زرع الافكار كنت اتكلمت عنها من فترة بس المرة ديه هتكلم عن اسلوب مختلف لزرع الافكار الي هيؤهلك انك تخلي الاشخاص متقبلين كلامك قبل ماتقوله ومستعدين انهم يوافقوك عليه قبل ماتعرض فكرتك ..

يعني ايه زرع افكار ؟ زرع افكار يعني الموقف التالي :

“انت : اهم حاجة يا أندرو ان الواحد يقول الحق وميكدبش، قولي بقى مين الي اكل الجزرة ديه ؟

أندرو : اوكي ، مش انا الي كلتها وانا مش بكدب عليك”

ببساطة ، الي انت عملته انك رسمت للشخص اطار ، كسرت فيه المعارضة وبنيت الفة واستخدمت التدفق اللغوي ..

ببساطة اكتر ، المحادثة الي فاتت انت قولت فيها لأندرو سؤال بس قبل ماتسال السؤال كسرت المعارضة (والمعارضة هي اي رد فعل معاكس الشخص ممكن ياخده ضدك) وانت كسرتها من خلال استخدامك لتدفق لغوي او نمط لغوي ربط فيه بين اندروا والواحد ال بيقول الحق ومبيكدبش والظريف ان في رد اندرو هتكتشف انه استقبل الكلام ده على نفسه لما استخدم كلمة “انا مش بكدب عليك” وفي الاساس انت الي قولت الجملة ديه من البداية …

كنت بكلم شخص فطلب مني اننا نتقابل ، قولتله طيب نتقابل ايه المشكلة يعني .. وبعدها بفترة في خلال نفس المحادثة قولتلها انتي عارفة ، اكتر حاجة بتشدني في البنت انها متبقاش سهلة ، تكون حد فاهم ولما يقرر حاجة يكون عنده اسبابه كاملة … وفي اخر المحادثة بختبر زرع فكرتي عندها (متبقيش سهلة) بسالها خلاص على ميعادنا ؟ ، لاقيتها بتقولي الحقيقة يانهاد انا مش هقدر اقابلك لاننا لسة متعرفناش على بعض كفاية ، قولتلها بس احنا كنا متفقين قالتلي اصل انا مش عارفة انت عايز تقابلني ليه (مع العلم انها فكرتها هي من البداية) قولتلها “علشان انتي حلوة” ، قالتلي لا ده مش سبب كافي علشان يخليني اوافق اشوفك ، قولتلها طيب براحتك …

من فترة اول ماتعلمت تقنيات التنويم الضمني نزلت علشان اجربها على الناس وليا واحد صاحبي عنده تاكسي فوافق اني لمدة يومين ادخل التاكسي واتكلم مع الناس ، وبقول كده بصراحة لاني مش مجرد واحد دارس تنويم ضمني ، التنويم بالنسبة لي متعة لانه بيخليني افهم الناس اكتر واعرف انسب طريقة للتعامل معاهم ، ومن يومين تكملة لتجربة التقنية الي بكلمكم عنها ، روحت محل موبايلات في القصر العيني ، وكان واحد صاحبي هناك ومع انه كان قلقان لانه عارف اني مليش في الموبايلات اساسا بس انا اقنعته يديني بس فرصة اتكلم مع عميل واحد ، قالي ماشي .. 5 دقايق دخل واحد شيك بدلة سودا ونضارة طلب يشتري موبايل في حدود 500 جنيه فشاف موبايل فعجبه شكله فقالي ممكن اشوفه ، قولتله طبعا ، فتحت التابلوه جيبتهوله وشغلناه وركبت فيه خط ورنينا على الموبايل ، رنته كانت ضعيفة بس الموبايل كان شيك اوي ، قالي ايه ده ده صوته واطي اوي ، ابتسمت وقولتله عندك حق نوعية الموبايلات ديه صوتها واطي لانها كلاسيك بس لو عايز حاجة صوتها ( كبير ) ، وجهته لموبايل تاني ، قالي ماشي ، كملت وقولتله الموبايل ده صوته كبير لو انت بتحب الدوشة ، وهنا وقف شوية وقالي امال ايه الفرق بينه وبين التاني قولتله ابدا ،التاني الماني جديد اتصمم علشان صوته يبقى (هادي) لانه كلاسيك متصمم لرجال الاعمال واصاحب المؤسسات والناس الكلاس يعني ، فمفيش حد فيهم هيحتاج ان رنة تليفونه تبقى دوشة وكبيرة وعالية، هو بس الي بيميزه عن باقي الانواع انه بيستحمل ، خفيف فيه امكانيات كويسة ، غالي شوية ، لما سالني كام ، قولتله 400 جنيه ، الجملة ديه كانت كافية ان الراجل يطلب انه يشوفه تاني ، ومسكه وقالي انت عارف ؟ انا ميهمنيش الشكل انا بس عايز حاجة تكوني خفيف كويسة وبتستحمل ، قولتله بس ده ب 400 جنيه ، قالي مش مشكلة ، بس كلاسيك !!

الموقف ده بيوضح ان الشخص ده بدأ يستخدم المصطلحات الي عرضتها عليه وبدأ يختار الي انا وجهته ليه ، وده اسمه زرع افكار وهو انك تخلي حد يفكر بدماغك ويختار الحاجة الي انت اقترحتها عليه ..

معادلة زرع الافكار كالآتي : كسر المعارض + بناء ألفة (وسلطة) + تدفق لغوي = زرع فكرة ..

او انك تعرف الشخص رد فعله ممكن يبقى ايه ، وتعكسه قبل ماتتكلم ، فلو واحد مثلا عنده فكرة ان كل العربيات الماروتي نوعها وحش متقولوش ان العربيات الماروتي حلوة ، لا قوله في الاول عارف لازم الواحد لما يقرر حاجة يتاكد الاول منها بنفسه قبل مايسمع لكلام الناس واللي يضحكك ان واحد ممكن يقولك ان الماروتي وحشة وهو مجربهاش او حتى لانه معرفش يتعامل معاها … اراهن انك فهمت الجملة ديه تاثيرها شكله ايه لما تيجي تكمل كلامك وتعرض النوع ده على الشخص الي قدامك ، بنسبة كبيرة هيبدأ يتجاوب معاك لانك لغيت المعارضة بتاعته المبنية على رأي الناس بجملة بسيطة اوي انا الفتها في ثانية ، فمش هينفع يرفض (علشان الناس رايهها كده والا هيكون بيناقض نفسه) فهيبدأ يحاول يجرب بنفسه فعلا ، ولو انت بتعرض حاجة كويسة بجد هو نفسه هيقتنع بيها .. ديه اول جزئية في زرع الافكار ، تاني خطوة انك تبني الفة افكار ومعناها انك تحط الشخص في غرفة الموافقة وده من خلال اطار اسمه المراجعة ، لما تكسر المعارضة وتقول للشخص ، “…. ، بس احنا ان شاء الله هنجرب دلوقتي عربية تكون سريعة وقوية ومريحة من جوا وشبابية ” الموافقة حصلت لما قولت سريعة لانه الشخص ده اكيد قالك في البداية انا عايز عربية سريعة وقوية ومريحة من جوا وشبابية فلما تقول انت المواصفات ديه تاني عليه هينسى انه هو الي قالها في البداية فهيقتنع بالعربية قبل مايشوفها وفي النهاية تختم بربط لغوي باستخدام كلمة علشان او وده معناه ..

تعالوا نشوف نموذج كامل :

عارف لازم الواحد لما يقرر حاجة يتاكد الاول منها بنفسه قبل مايسمع لكلام الناس واللي يضحكك ان واحد ممكن يقولك ان الماروتي وحشة وهو مجربهاش او حتى لانه معرفش يتعامل معاها ، احنا لو هنقول عايزين عربية فالواحد عايز عربية تكون سريعة ، هادية وقوية وبتستحمل ، صح ؟ علشان كده فانسب عربية ليك ولعيلتك هي العربية الماروتي لانك لما هتشوفها هيشدك شكلها الشبابي ولما تدخلها هتكتشف اد ايه مريحة من جوا وحتى صوتها واطي ومبتسمعوش ، عربية قوية ، بيني وبينك انا برضه كنت واخد عنها فكرة زي الزفت بس السمع لوحده مش كفاية لاني لما جربتها حسيت باختلاف رهيب …

الي هيحصل كالآتي / نفس الشخص ده بعد ماتتكسر المعارضة معاه وتبني معاه الفة الافكار هيبدأ يركز على امكانيات العربية وايجابياتها وبكده انت بتزرعله فكرة انه محتاج العربية ديه بجد … طبعا انت ممكن تستخدم التقنية ديه في اي عملية اقناع في الدنيا، لو تحب ممكن تشاركني موقف ونفكر سوا ايه انسب جملة ممكن تقولها علشان تزرع للشخص التاني فكرة يوافقك عليها ، وحبيت اقول ان الجملة الي فاتت مفيهاش زرع افكار بس ، ده فيها بناء الفة مبني على تحليلات الشخصية والبرامج العليا للشخص وربط شرطي ، يعني اكتر من تقنية ، لضيق الوقت مش هقدر اتكلم عنهم كلهم بس ان شاء الله في خلال الدورة بتتعلم تحط تقنياتك في جملة واحدة تأثيرها قوي ومميز لما هتلاحظه هتتاكد من قوة التنويم الضمني كمنهج قائم بذاته في فنون الاقناع والتاثير …

وفي النهاية ، انا اول ماسمعت عن التنويم الضمني قولت ايه الكلام الفارغ ده ، تنويم وتقنيات واسمه كان غريب بالنسبة لي ، بس انت عارف اي حاجة في بدايتها بتبقى غريبة بس لما تروح وتشوف بنفسك غير لما تسمع بودانك او تقرى بعنيك ، فلما الواحد فكر هو محتاج ايه في حياته اكتشف ان اهم حاجة في الدنيا انك تقدر تقنع الناس بيك لان ساعتها بس نجاحك او فشلك بيعتمد على قدرتك في الاقناع والتاثير في الناس من حواليك … انا مش عارف انت حسيت ولا لسة باهمية ده في حياتك بس لو جربت وشاركت الناس الي عاشوا الحياة الجديدة هتكتشف انك جيت في وقتك …

لو عايز تلحق مكانك في دورة سبتمبر يوم 24 الجاي او اكتوبر (15 اكتوبر) ، بس ابعت ايميل على arabhd@maktoob.com واكتب في العنوان “تسجيل دورة سبتمبر ” او “تسجيل دورة اكتوبر” وجوة اسمك ورقم تليفونك ، وان شاء الله تكون ضمن فريق التنويم الضمني

نهاد رجب

اول مدرب عربي في تقنيات الاقناع والتأثير بالتنويم الضمني

http://www.nihadragab.com

مقالات مرتبطة

كيف يتم توجيه عقول الناس وغسيل المخ (كورس اونلاين ...
views 4335
لتحميل العرض الباوربوينت الخاص بالفيديو : www.nihadragab.com/lectures/NihadRagabArtofinfluencing.pptx في هذه المحاضرة تتعرف على بعض من الطرق التي يت...
كيف يتم خداعك بال Common Sense لـ نهاد رجب...
views 8452
  ده ال Common Sense يعني ايه ؟ يعني حد مسمي نفسه جمايكا على الفيسبوك يكتب يقول ان سورة يس بتفتح 11 ثقب في المخ ، وربط ده بصعوبة الدراس...
مبادىء النصابين الخمسة
views 3748
  مباديء النصابين الخمسة مقالة ليا -نهاد رجب- منقولة من مجلة فورورد اقوى مجلة شبابية مصرية نتية حمل العدد وخليك فوروردي جوه كل واحد فينا...
فن الدعوة نهاد رجب
views 662
  لو بتحاول تهدي حد للصلاة ، بلاش تقوله لو مصليتش هتدخل النار وتخوفه من الثعبان الاقرع ! كإنك بتقوله "معلش استحمل طعم دوا الكحة المر علشان متموت...
فن التأثير في الأخرين – نهاد رجب...
views 3465
  منذ ايام قليلة تقابلت مع احد الاصدقاء وتحدث معي بخصوص عدم قدرته على التأثير في الأخرين ، وعندما سألته عن ذلك قال لي عن موقف حدث له وفيه قام صد...
كيف تصبح مقنعا وتحصل على الشخصية المقنعة مع هذه ال...
views 2834
ان من اهم المهارات والتي ينبغي على كل شخص اكتسابها في هذا الزمان ، هي مهارة الاقناع والتأثير ، فلا ينبغي لنا ان نفرق ما بين الاقناع والتأثير ولكن علين...
تقنية الاقناع بالارباك والقولبة #نهاد_رجب...
views 1153
  اقناع وتأثير نفسي من أكتر الاعلانات اللى بحب فكرتها هي اعلانات PicPac الاعلان بالكامل بيستخدم تقنيه نفسة من تقنيات التنويم الضمني بتعتمد على...
فن الاقناع والتأثير النفسي
views 4982
انك تدخل جوة دماغ الشخص الي بتكلمه وتفهم نفسيته وتعرف ازاي ممكن تتعامل معاه وتشوف الدنيا بعين مختلفة ، عين فاهمة ، عين عارفة وعين بتقدر تقيم ، ده ممكن...
فن الاقناع والتواصل الفعال
views 842
  الإقناع ، مهارة عايزينها، حتى انت ، ممكن علشان كده بتقرى المقالة ديه دلوقتي او هتهتم انك تعرف ان فيه برنامج لفن الاقناع والتواصل هيبدأ قريب ، ...
التنويم الضمنى- تقنية الربط المزدوج والربط الوهمى...
views 1490
  تحب تقرى المقالة ديه للآخر ولا تقراها كلها وبعد كده تكملها للآخر ؟؟ بلاش ديه تاخد الكيس الاسمر ولا الاسود ؟ بلاش ديه تحب تروح السينما نتفر...

About the author

Engy Ragab

Leave a Comment