عيشها بدماغك

ايه رايك لو جيه حد معروف ونده وسط الف شخص وقال يجماعة احنا هختار فلان الفلاني (الي هو حضرتك) من وسطكم علشان يمثلكم ؟ طيب لو حد مشهور اكتر واختارك من وسط مية الف ؟ وكلهم سقفولك ؟ … طيب لو حد مشهور اكتر واكتر واختارك من وسط مليون وانت طلعت وسط ناس بتصفر وبتنده وبتدعي وبتصقفلك ، احساسك هيبقى عامل ازاي؟ اراهنك انك مشاعرك اتغيرت دلوقتي ، حافظ عليها … انت مش موهوم ، ده الي حصل كده ، انت عارف مين اختارك ؟ ربنا عز وجل ، مالك الملك ، عارف من وسط كام ؟ بالظبط … ملايين ، يعني انا مروحتش بعيد ، من وسط ملايين انت الي وصلت للحياة وانتي اندمجت فيها وخرجت للنور وعشتها ومريت بتجارب وبتقرى النوتة ديه دلوقتي .. 

كل واحد فينا ليه مسئولية هو اتولد علشانها ، بستغرب لما الاقي حد بيختار انه يفشل ، لانه لو كان مكتوبلك الفشل من البداية مكنتش جيت ، كان هيبقى حد تاني غيرك ، بس مسألتش نفسك .. اشمعنى انا؟ … وفين المسئولية ؟ شكلها ايه ؟ … كلنا جنود موجودين علشان مهمة محددة ، اول ما الواحد يخلص مهمته بيموت ، حتى لو طفل عنده شهرين ، هو ادى الغرض ومات ، او راجل عنده 80 سنة ممكن يكون عاش العمر ده كله علشان اخر ثانيتين في حياته ومات او شاب صغير او اب او ام او ابن او اخ ، كل واحد مهما كانت صلة قرابته بيك ، ليه وقت مرتبط بمهمة ، هتخلص المهمة هينتهي الوقت ولإيما هيتكافء عليها او هتيحاسب … 

النظرية بتقول “كل واحد ليه مهمة .. مسئولية .. تم اختياره علشانها .. انت فين منها ؟ ” 

تعالوا نتخيل مع بعض حاجة … انت قاعد هنا دلوقتي علشان كان المفروض تروح الشغل الصبح بس اتصل واحد صاحبك وقالك ان صاحب الشغل ابوه مات ، مات ازاي ؟ كان ماشي في الشارع بيعدي الشارع خبطته عربية بس قبل مايمشي في الشارع وقبل ماينزل من بيته بعد ما قفل الباب افتكر انه نسي الموبايل بتاعه دخل تاني علشان يجيبه تليفون البيت رن فرد عليه طلعت نمرة غلط ، قفل التليفون وخرج من الباب قبليها بساعة كان فيه سواق تاكسي حب انه يركن شوية يدخل قهوة يقعد ويخرج يكمل شغله ولما قعد ربع ساعة خرج ومشي بالعربية وقفته واحدة الست ديه كان متخانقة مع جوزها قبل ماتنزل فسابتله البيت ومشيت نزلت ركبت التاكسي ومشي في الشارع الى كان فيه صاحب الشغل فخبطه سواق التاكسي فالراجل مات وبسببه الشغل وقف والنهاردة كان اجازة علشان كده انت فاتح الفيس بوك … (روح عزي يبني) 

طيب لو صاحب الشغل مكنش نسي الموبايل ؟ او النمرة الغلط مكنتش نمرته والي اتصل كان كتب الرقم صح واتصل على طول بالي هو عايزه، ولو كانت الست ديه متخانقتش مع جوزها ولو كان سواق التاكسي موقفش عند القهوة علشان يريح شوية ، كان زمانك فين دلوقتي ؟ 

كل حاجة بتحصل مدروسة وبتمشي بطريقة مشابهة للي قولتهالك من شوية فلو شايف ان فيه حاجات ناقصاك ، الحقيقة انه مفيش .. لان الحاجات ديه كانت هتعطلك عن مهمتك مش اكتر الا اذا قررت انها تبقى في حياتك..، مهما كان المكان الي انت فيه دلوقتي فانت دايما عندك فرصة انك تغير الاحداث انك تعيد الشريط من جديد وتختار انك تعيشها بدماغك .. 

عيشها بدماغك مهما كان الناس الي حواليك ، لانه تم اختيارهم زيك ، فمفيش فيهم حد احسن منك ، كلنا خلقنا في احسن تقويم ، بس فيه واحد بيروح الجيم فبتطلعله عضلات وفيه واحدة بتدرب صوتها فبتغني وواحد اختار انه يشرب مخدرات فبقى ضعيف وواحد اختار انه يشرب سجاير فبقى مدخن ، كلها اختيارات ، حياتنا عبارة عن اختيارات ، اختيارات كتيرة اوي ، بقالها زمن وقديمة ، بسبب انها قديمة بننسى اننا احنا الي اخترناها من البداية لما وافقنا نسمع كلام ده او ده لما وافقنا نخضع لقيود وقوانين احنا مش فاهمينها ومش عارفين ليه بس احنا بنعملها وبنتمسك بيها ، ولو سالت حد هيقولك انا ابويا كان كده وهعيش كده وابن الوز عوام .. 

واحد كان محكوم عليه بالاعدام علشان بطلجي وقتل ناس ، قبل مايموت كان عنده ولدين 12 سنة ، واحد منهم بعد 10 سنين من محاكمة ابوهم اتحاكم هو كمان لنفس السبب والتاني عنده شركة ومتجوز ومخلف وعايش حياه ناس كتيرة بتتمناها لما سألوا الاتنين انت ليه بقيت كده ، الاتنين جاوبوا نفس الاجابة … “مستني ايه من واحد ابوه اتحكم عليه بالاعدام “… واحد منهم اختار انه يمشي على نفس الخط ويعيش بدماغ ابوه والتاني قال لا ، ده معناه اني هكتب قصتي وهعيش حياتي انا الخاصة بتاعتي انا ، وهرفض الي حصل وفعلا نجح .. ببساطة لانه اختار انه يعيشها بدماغه .. وليه متعيشهاش بدماغك مدام انت عارف ان كل حاجة مكتوبة ومتنسقة ، كل حاجة متظبطه ، ممكن تغيرها بالدعاء والاجتهاد والعمل .. “وقل اعملوا فسيرى الله عملكم ورسوله والمؤمنون” و كل حاجة انت مجرد انك فكرت فيها واتمنيتها ده معناه انك تقدر توصلها “لا نكلف نفسا الا وسعها” .. لسة بتتنفس ؟ لسة بتتحرك ؟ متكملش النوتة ، قرر انك تعيش .. قرر انك ترفض تموت قبل ماتعيش ، فيه ناس كتير اوي اختارت حياة ملهاش معنى غير المعنى الي غيرهم شايفنه مناسب ، وناس كتير اوي ماتت وهي فاكرها انها ماتت مظلومة وكانت ضحية لمؤامرات ، وناس تانية ماتت بس عايشة معانا لحد دلوقتي . الناس صنفان موتى وهم أحياء وأخرون ببطن الأرض أحياء. 

وفي النهاية احب اختم بجزء ل
Bob Dylan
قال فيه

I’ll not go down under the ground because someone is telling me that death is coming around… I’ll not carry myself to die .. when I go to my grave , my head will be high..

فكر تاني اختار انك تنج وتتميز ولما تقرر انك تعيش … عيشها بدماغك …

مقالات مرتبطة

الرضا والتقبل .. الطريق الاسرع للنجاح مع نهاد رجب...
views 1303
  يوم الجمعة اللى فاتت بعد صلاة الجمعة ماخلصت والناس اتفرقت ، شوفت اتنين ماشيين قدامي واحد منهم بيعرج والتاني بيسنده ، فهمت من النظر انه غالبا...
وقف الكالاكس وامشي بهدوء #نهاد_رجب...
views 2463
  ماشي في الطريق الكالاكس بتاع العربية اختفى .. مات مشيت حسيت احساس واحد محبوس في اوضة ازاز وعمال يصرخ ومحدش سامعه ده خلاني امشي بالعربية بر...
تخلص من المشاعر السبية بالتحكم في اهواءك .. نهاد ر...
views 927
تحكمك في شهواتك ، تحكمك في نفسك والبعد عن الضعف قصاد المحرمات او الملذات ، هو في حد ذاته بيضمنلك النجاح في اي مشكلة نفسية بتواجهها . فلو كنت على سب...
اسرع طرق التخلص من العادات
views 2788
  من كام يوم كنت ف فرح اسطوري ، عريس قاعد على كوشته معاه نضارته وبدلته وساعته وقميصه وكرافتته ، عرفته من فترة صغيرة وعزمني في فرحه وروحت وكان يو...
حب اهدافك وافكارك
views 2021
تجربة ف معلومة النهاردة اكتشفت حقيقة فكرة كانت بتجيلي من فترة للتانية .. اني لو حبيت فكرة معينة وعشقتها واندمجت معاها عاطفيا ، هشوفها متجسدة في الدن...
English | A very simple formula to win ! Nihad Rag...
views 3105
Listen : https://youtu.be/71hLNx4R40U A very simple formula to win ! Nihad Ragab Hi! My Name is Nihad Ragab, i'm speaking to you from Cairo, Egypt ,...
الاستمتاع الحر ل نهاد رجب
views 1272
فيه حاجات الاجمل انك تسيبها اتعودنا نحب اللى معانا ، نستمتع بس باللي ماسكينه في ايدينا فقطفنا الورود علشان نمسكها ونحطها وسط كتاب والعصافير حطيناه...
تعلم لغة كاملة اثناء نومك ! التعلم نائما وطرق التأ...
views 9153
اهلا بيكم ، انا نهاد رجب اهلا ومرحبا بيكم في حلقة جديدة من حلقاتي على اليوتيوب ، والنهاردة هكلمكم عن موضوع ممكن يكون غريب بس مؤخرا الابحاث الامريكية ...
عن العنوسة اتحدث… للبنات فقط .. من راجل زي أ...
views 10402
  للبنات فقط .. من راجل زي أخوكي العنوسة مشكلة تواجه بنات كتير .. بس هل هي فعلا مشكلة ؟ خليني اقولك من واقع معاملتي لناس كتير ، ازاي ديه ممك...
النظرية الجزء الثانى
views 1063
  كتير منا بيمر بذكريات صعبة ، بيحس انه عايز يتخلص منها ، في شغلي بالتنويم الايحائي كنت كتير بقابل ناس شايفين ان الحل الوحيد لحالتهم النفسية انه...

About the author

Engy Ragab

Leave a Comment