الكلاب بتشم الخوف

والبني آدمين بيشموا الاحتياج ، وده بيديهم احساس من اتنين اما غرور وبيؤدي في النهاية ان صاحبه يبدأ يتعالى على صاحب الحاجة ، وبالبلدي “بيتنطط عليه” واما “خوف” اي ان الشخص يبدأ يخاف من المسئولية فيحاول يبعد جدا ، وتلاقي النموذج ده بالتحديد لما بنت تحب ولد وتتعلق بيه اكتر من اللازم ، هي بتكون متوقعة انه هيحبها اوي وانه بالطريقة ديه هيرتبط بيها اكتر ، لكن اللى بيحصل عادة ان الولد بيخاف من الارتباط بسبب ان ديه فطرة جواه ، وبيخاف من الالتزام وتحمل المسئولية فبيبدأ يبعد ويرتبط بواحدة هتطلع عين اهله بس يحس انه تعب علشانها .. اما البنت اللى اتعلقت من البداية فتقعد حياتها مش فاهمها ازاي تدي لواحد الحب ده كله وفي الاخر يسقعلها ..

ونبدأ نطلع اقاويل زي “البنت زي الطابع البريد تتف عليه يلزق” والغريب ان فيه بعض البنات بتعتمد المقولة ديه فعلا وموافقة جدا عليها وبيقولوا ان البنت اللى تقول عكس كده هي عارفة من جواها انها موهومة ، ومع ذلك الجملة ديه بتنطبق على الولد كمان ، ان الولد برضه طبيعته كده ، وكل مابيكبر بتزيد ، قلة الاهتمام بتزود من استثارته ناحية الطرف التاني ، وفي حالة وجود تطرف في الاهتمام والحب والمشاعر بيبدأ ينسحب .. هو عايز غالبا اللى يديله على دماغه .. وف حقيقة الأمر مش الولد او البنت بس ، او مش البني آدمين بس يعني ، الحيوانات كمان عندهم نفس النزعة ديه ، بمعنى مقولة “ألقط بيحب خناقه” تقدر تاخدها كجملة حقيقية بشكل كبير ، عن معظم الحيوانات ..

كونك محتاج حد وتظهرله مدى احتياجك ليه سواء عن طريق الاهتمام المتزايد او الكلام الكتير زي “بحبك بحبك بحبك بحبك وحشتني بحبك وحشتني بحبك” ده بيؤدي في النهاية ان الشخص يبدا يبعد عنك ويتهرب منك .. البنات اللى بتقول “انت لو سبتني هموت نفسي” كانك بتقوليله “سبني دلوقتي حالا واوعى ترتبط بيا” والولاد اللى بيحاولوا ينتحروا علشان بنات “انت كده بتبعدها اكتر عنك”

والكلام مش عن الحب بس ، عن المجاملة على سبيل المثال ، انك تجامل حد كتير ده ممكن يكون في العرف حاجة جميلة لكن فيه ناس كتير جدا وانت واحد منهم ، بيزهئوا من المجاملة .. في الوقت اللى انت بتكره فيه بني آدم علشان لسانه تقيل وبيحدف طوب وظلط ، هتعشق جدا وتحب وتدوب في اي كلمة كويسة عن اي حاجة انت عملتها وهتقدرها جدا ، عن واحد تاني ماشي بيوزع مجاملات في كل مكان ..

احنا بنحب الخناقين ، او اللى بيغلسوا علينا ، النتيجة اللى بنحصل عليها منهم بتكون جميلة جدا ، مؤثرة اوي وظريفة ، عكس اللى بيكونوا دايما موجودين ، دايما حوالينا ، فبننسى اقرب الناس لينا وبنفتكر وبنتعلق جدا باي حد بعيد عننا ، ومتعرفش اهمية اللى كان معاك الا لما تخسره ، وتلاقي اعظم قصة حب بدأت والاتنين اتجوزوا بس معاشوش في تبات ونبات ، الحقيقة انهم عاشوا واحد منهم كرسي والتاني فوتيه ، الوجود المستمر لكل واحد فيهم خلاهم “عادي” مش مهمين في حياة بعض ، الحل هنا ان كل واحد فيهم يبدا يتغير للتاني ، يبدأ ينفصل ولو لفترة بسيطة ، ميبقاش دايما متاح وموجود ، يدي للتاني احساس الفراق ولو يوم كل اسبوع ..

ويحضرني هنا مقولة محمد عبد الوهاب لما قال “بفكر في اللي ناسيني وبنسى اللى فاكرني” ، حقيقة مطلقة ، وديه مش حاجة وحشة في اللي “فاكره” بس لان اللى بينسانا بيكونوا اهم بكتير من الباقيين المرطرطين اللى حوالينا ..

تقدر تطبق النظرية ديه على التسويق ، البيع ، الدعاية ، السياسة ، الكورة حتى ، متبقاش متاح اكتر من اللازم ولو فعلا بتحب فلان ، ابدأ ابعد حبة عنه علشان تديله فرصه يعمل هو مجهود علشان يقرب منك ، قلل احتياجك للناس ، انشغل بنفسك ، وهتلاقي الناس كلها وراك ..

نهاد رجب 

اول مدرب عربي لفن الاقناع والتأثير النفسي بالتنويم الضمني

مدرب ومعالج بالتنويم الإيحائي

مقالات مرتبطة

وهم المستقبل ل #نهاد_رجب
views 738
المستقبل هو الوهم الوحيد اللي معظمنا عايشين بسببه حاضرهم مش عاجبهم عايشين في الاحتمالات لا عارفين يعيشوا دنيا ولا اخره طظ في مستقبلي مستقبلي مش ...
لا تغضب – مقالة ل نهاد رجب...
views 1716
  لا تغضب ليس فقط لأن الغضب يخرجك عن شعورك ، ولكن الغضب هو أعلى مراحل تحكم العقل على من انت .. فعندما تصل الى قمة احساسك بذاتك "الإيجو" الخاص ...
انا المراقب ، انا المراقب انا المراقبة...
views 891
i'm the observer , the observed , the observation انا المراقب ، انا المراقب انا المراقبة راقب افعالك تتغير زي مابيتغير تنفسك لما بتراقبه راقب نفسك...
الاستمتاع الحر ل نهاد رجب
views 1271
فيه حاجات الاجمل انك تسيبها اتعودنا نحب اللى معانا ، نستمتع بس باللي ماسكينه في ايدينا فقطفنا الورود علشان نمسكها ونحطها وسط كتاب والعصافير حطيناه...
اتريق قبل ما حد يتريق عليك
views 4261
  اتريق قبل ماحد يتريق عليك مقالة جديدة لنهاد رجب من فترة اتكلمت عن كسر المعارضة وازاي تقدر تغير طريقة تفكير حد لما يلاقيك بتفكر زيه وكانت...
النظرية الجزء الثانى
views 1060
  كتير منا بيمر بذكريات صعبة ، بيحس انه عايز يتخلص منها ، في شغلي بالتنويم الايحائي كنت كتير بقابل ناس شايفين ان الحل الوحيد لحالتهم النفسية انه...
في الألم القوة وفي الألم الحياه #نهاد_رجب مقالة لـ...
views 6609
سنة 1985 ، دان اريلي - مؤلف كتاب توقع لا عقلاني- كان بيتعالج من حروق من الدرجة التالتة على مستوى جسده بالكامل . وحكى تجربته مع العلاج ووصفها بالمؤلم...
في الوقت اللي كلهم هيجمعوا انها نهايتك ووقوعك....
views 652
في الوقت اللي كلهم هيجمعوا انها نهايتك ووقوعك. وانت بتقع وقبل.ماركبتك تتعفر بالتراب ، اسند بايدك وقوم تاني خليهم دايما يحسوا انك مبتخلصش ، لسه ع...
تعلم طريقة قوية تتخلص بها من الارتباط بشخص ما الجز...
views 5582
  جزء من كتاب "تغلب على الام الانفصال" هل تجد صعوبة في نسيان او تخطي شخص ما دخل الى حياتك ولا زال يأتي الى خيالاتك من آن الى اخر ؟ يمر الك...
إنتشها
views 1350
زمان كانوا بيخلونا نبص على ترابيزة عليها شوية حاجات وتحت الحاجات ديه فيه مفرش يقوموا جايين عند المفرش وينتشوه فجأة فالمفرش يطلع والحاجات الي فوق الترا...

About the author

Engy Ragab

Leave a Comment